«Որոշել եմ 41-ամյակս Երևանում նշել». Արա Մարտիրոսյանը` Երևան այցի, 2019-ին սպասվող մենահամերգի ու ԱՄՆ–ում հիմնական բնակություն չհաստատելու մասին

Երգիչ Արա Մարտիրոսյանն այս օրերին Հայաստանում է։ Ապրիլի 20–ին նա և երգչուհի Սոնան համատեղ համերգ կունենան Երևանում, որի ժամանակ կներկայացնեն իրենց նոր զուգերգը։ Tert.am Life–ը զրուցել է Արայի հետ ԱՄՆ–ում բնակվելու, Հայաստան այցի և առաջիկա ծրագրերի մասին։ Արան առաջին անգամ խոսել է 2019–ին սպասվող մենահամերգի մասին, որին այս փուլում ինտենսիվ պատրաստվում է։

Արան հայտնեց, որ այս անգամ իր այցը Հայաստան ավելի երկար ժամանակով է, քանի որ հաջորդ տարի պատրաստվում է մենահամերգ ունենալ Երևանում։ Այս ընթացքում երգիչը պատրաստվում է թողարկել նոր երգեր, ձայնասկավառակ։ Արան հայտնեց, որ առաջիկայում կներկայացնի ոչ միայն Սոնայի հետ զուգերգի, այլև անհատական աշխատանքների հիման վրա նկարահանված տեսահոլովակներ։

Մենահամերգին ընդառաջ Արան պատրաստվում է առավել ակտիվ գործունեություն ծավալել։ «Մենահամերգից առաջ պատրաստում ես նոր ծրագիր, ուստի` գործունեությունն առավել ակտիվ է դառնում։ Պետք է նոր ինֆորմացիա, նոր երգեր տաս մարդկանց։ Մենահամերգս հաջորդ տարի է, սակայն այս տարի ևս սպասվում են անհատական տեսահոլովակներ։ Գոնե 3-4 տեսահոլովակ կներկայացնեմ իմ լսարանին։ Կլինեն նաև նոր երգեր»,– ասաց նա։ Երգչի խոսքով` կենտրոնացած չէ միայն հեղինակային երգեր ներկայացնելու վրա։ «Ոչ շատ հաճախ, բայց աշխատել եմ տարբեր հեղինակների հետ։ Եթե կա լավ երգ, ես պատրաստ եմ կատարել այն, կարևոր չէ` ե՞ս եմ հեղինակել, թե՞ ոչ»,– նկատեց Արան։

Մենահամերգը ենթադրում է պատասխանատու և ծավալուն աշխատանք։ Թեև վերջին տարիներին համերգային գործունեությունը Հայաստանում կրկին ակտիվացել է, շատերը մտավախությամբ են մոտենում այս մենահամերգ ունենալուն` համարելով այն ռիսկային։ Արան նկատեց, որ Հայաստանում մենահամերգ անելը միշտ է ռիսկային եղել։

«Հայաստանում յուրաքանչյուր մենահամերգ ռիսկային է։ Հասկանալով մեր ժողովրդի վիճակը` դա նորմալ է։ Դա պայմանավորված չէ ունկնդիրների ակտիվությամբ կամ պասիվությամբ։ Այդ ամենը պայմանավորված է նախապատրաստական աշխատանքներով, ծախսով։ Եթե խոսենք ֆինանսական կողմի մասին, թող լաց կամ բողոք չհնչի, սակայն նույնիսկ լեփ–լեցուն  դահլիճների դեպքում ֆինանսական կողմը չի վերադառնում։ Դա ներդրում է այնպես, ինչպես տեսահոլովակ նկարահանելիս։ Համերգի տեսքով մենք փորձում ենք տեղ հասցնել մեր երգը, մեր խոսքը, մեր նոր երաժշտությունը»,– ասաց նա։

Երաժշտից հետաքրքրվեցինք, թե ինչպես է գոյանում իր եկամուտը` որպես երգիչ։ «Չեմ սիրում խոսել երաժշտության շնորհիվ գումար աշխատելու մասին։ Ինձ համար իմ երգը, երաժշտությունն ապրելակերպ է,– ասաց նա, իսկ դիտարկմանը, որ երաժշտությունը, որպես ապրելակերպ, պահելը թանկ հաճույք է, արձագանքեց,– Ես ունեմ տարիների գործունեություն, որի շնորհիվ այսօր վաստակում եմ իմ գումարը։ Ես ելույթ եմ ունենում նաև կորպորատիվների ժամանակ»։

Ինչ վերաբերում է տարիներ առաջ ԱՄՆ–ում հիմնական բնակություն հաստատելուն` Արան այս հարցին ունի իր մոտեցումը. «Աշխարհն այնքան է մեծացել և տեղափոխությունն այնքան է հեշտացել, որ ասել, թե ես բնակվում եմ ԱՄՆ-ում, հավասար է ոչինչ չասելուն։ Ես կարող եմ բնակվել որտեղ ուզում եմ` կլինի ԱՄՆ, Ռուսաստան, թե որևէ այլ երկիր։ Ես գտնվում եմ այնտեղ, որտեղ այս պահին պետք է լինեմ աշխատանքի բերումով»։

Երգիչն այս անգամ փոքր–ինչ երկար ժամանակ է անցկացնելու Հայաստանում։ Նա նշեց, որ մինչև մենահամերգը հաճախ կմեկնի ԱՄՆ և կվերադառնա Հայաստան, սակայն այս փուլում դեռ կմնա Հայաստանում։ Հունիսի 3-ին Արան նշելու է 41–ամյակը։ Երգիչը հայտնեց, որ որոշել է տարեդարձը նշել հայաստանաբնակ երկրպագուների հետ` երևանյան փոքրիկ մենահամերգով։