«Միակ մասնակիցն էի, որի դեպքում տեղում հաստատվեց երկրի հիթը». Գևորգ Հարությունյանը՝ 5-րդ փորձից հետո «Նոր ալիք»–ում Հայաստանը ներկայացնելու մասին

Tert.am Life-ն իր ընթերցողներին  հայտնել է, որ «Նոր ալիք» երգի միջազգային մրցույթում Հայաստանն այս տարի կներկայացնի Գևորգ Հարությունյանը, ով լսարանին հայտնի դարձավ «Դեպի Եվրատեսիլ» նախագծից:

Գևորգը Tert.am Life-ին է ներկայացրել առաջին մանրամասները «Նոր ալիք»-ում իր մասնակցության, եզրափակչում հայտնվելու և առաջիկա անելիքների մասին: Նա այսօր առավոտյան է Մոսկվայից վերադարձել։

Պարզվում է՝ Գևորգը հինգերորդ անգամ է հայտ ուղարկում «Նոր ալիք»-ին մասնակցելու համար:  «Գրեթե միշտ, հայտ ուղարկելս պատահական էր ստացվում և վերջին պահին: Այս տարի ապրիլի 10-ն էր հայտ ուղարկելու վերջնաժամկետը: Ունեի աշխատանքներ, որոնք համապատասխանեցրի մրցույթի պայմաններին և ուղարկեցի վերջին պահին: Ապրիլի 13-ին կազմակերպիչներից ստացա ծանուցում, որ անցել եմ կիսաեզրափակիչ փուլ և ապրիլի 17-ին պետք է Մոսկվայում լինեմ, որպեսզի պարզվի՝ անցնո՞ւմ եմ եզրափակիչ փուլ, թե՞ ոչ»,-պատմեց Գևորգը:

Գևորգը հայտնեց, որ Մոսկվայում կայացած կիսաեզրափակչի առաջին օրը մրցել է 68 կատարող, որից 27-ն անցել են լսումների հաջորդ փուլ։ Այդ օրն արդեն ընտրվել է  16 մասնակից եզրափակչում հանդես գալու համար, այդ թվում` Հայաստանի ներկայացուցիչը: Հայաստանից մրցույթին ներկայացել են 4 կատարող, բայց առաջին օրվա լսումներից հետո մնացել է  միայն Գևորգը: Առայժմ հայտնի չէ, թե Հայաստանի մասնակիցը երաժշտական պրոդյուսերներից ում հետ է աշխատելու, փոխարենը, արդեն ընտրվել է մրցութային երգերից մեկը՝ երկրի հիթը, որը նա կկատարի մրցութային երկրորդ օրը:

Սեպտեմբերի 4-11-ը Սոչիում կայանալիք մրցույթը, կանոնակարգի համաձայն, կընթանա երեք փուլով`առաջին օրը մասնակիցները կկատարեն միջազգային հիթ, երկրորդ օրը՝ իրենց երկրի հիթը, երրորդ օրը՝ իր սեփական երգացանկից:

«Շատ ուրախ եմ, որ արժանացա մրցույթին մասնակցելու պատվին:  Երևի, միակ մասնակիցն էի, որի դեպքում տեղում հաստատվեց երկրի հիթը:  Կատարելու եմ Արթուր Գրիգորյանի «Կյանք ու Կռիվ» երգը։ Իսկապես, շատ էի ուզում, որ այդ երգն ընտրվեր։ Նրանք շատ հավանեցին երգը, նույնիսկ, երկրորդ օրը ինձ խնդրեցին, որ  նորից երգեմ»,-ասաց Գևորգը:

Հարցին, թե մրցույթի նախապատրաստական աշխատանքներն ինչ թիմի հետ է անելու, Գևորգը պատասխանեց.« Փառք Աստծո, «Դեպի Եվրատեսիլ»-ի ժամանակ մեծ թիմ  էր ձևավորվել։ Հիմնականում կփորձենք հենց այդ թիմով էլ աշխատել: «նոր ալիքում» հստակ ժամկետներ են նշվում` մինչև սեպտեմբեր յուրաքանչյուր ժամանակահատվածում պիտի կարողանանք ինչ-որ  պահանջներ  կատարել: Ես աշխատում եմ մեծ թիմով, բայց դեռ համալրումներ կլինեն` կախված նրանից, թե պատվիրակության կազմում քանի հոգի կարող է լինել: Իմ հարազատները, ընկերները, գործընկերները բավականին մեծ աջակցություն ցույց տվեցին ինձ։ Ուրախ եմ, որ մասնակցությունս այսքան բուռն ընդունվեց»:

Գևորգի կարծիքով` այս տարի շատ դժվար կլինի մրցույթում բարձր հորիզոնական զբաղեցնելը՝ հաշվի առնելով, որ նախորդ տարի առաջին և երկրորդ տեղերում հայտնվեցին հենց Հայաստանի մասնակիցները՝ Էռնա Միրը և Սյուզաննա Մելքոնյանը: Միաժամանակ, նա նշեց, որ ամեն ինչ անելու է լավագույնս ներկայանալու համար: Նա նկատեց, որ այս տարի մասնակիցների թվում տղաները զգալիորեն շատ են՝ 16 մասնակցից 10-ը տղա է:

Վերջին տարիներին  Հայաստանում «Նոր ալիք»-ի հեռուստատեսային ուղիղ հեռարձակում չի լինում։ Այս տարի կլինի՞, թե՞ ոչ՝ Գևորգը տեղյակ չէ, բայց դա կարևոր է համարում մրցույթի վրա ուշադրություն հրավիրելու առումով:

«Պետք է ցավով փաստել, որ մրցույթի նկատմամբ հետաքրքրությունը մի քիչ անկում է ապրել, այսինքն` այն ոգևորությունը, որ կար 2008-2010 թվականներին, հիմա չեմ տեսնում: Միգուցե, դա պայմանավորված է արդեն տարբեր նախագծերի ի հայտ գալով։ Ես հիշում եմ, թե տարիներ առաջ, երբ  որպես ջոկատավար ճամբարում էի աշխատում, ինչպես էի գիշերվա ժամին հետևում Սոնա Շահգելդյանի ելույթներին և ինչ մեծ արձագանք եղավ Հայաստանում, երբ նա հաղթեց։ Սակայն անցյալ տարի մեր աղջիկների 100 տոկոսանոց արդյունքը այդքան մեծ արձագանք չունեցավ»,– նշեց երիտասարդ երգիչը։

Գևորգը համառորեն մասնակցել է ոչ միայն «Նոր ալիքի», այլև «Եվրատեսիլի» նախընտրական փուլերին։ «Դեպի Եվրատեսիլին» երկու տարի անընդմեջ մասնակցությունը Գևորգը բացատրում է իր մեծ երազանքով՝ մի օր հայտնվել «Եվրատեսիլի» բեմում: Նա նշեց, որ փորձելու է մասնակցել այնքան ժամանակ, մինչև ստացվի:

«Արդեն 13 տարի է` ցանկանում եմ լինել այդ բեմում: Եթե պատանեկան տարիներին դա ուղղակի ֆանատիզմով էր պայմանավորված, հետագայում, երբ դարձա արտիստ, հասկացա, որ պետք է կատարեմ հստակ քայլեր երգարվեստում, դա ինձ համար դարձավ նպատակ։ Ես ուզում եմ դուրս գալ եվրոպական բեմ և ներկայացնել իմ երաժշտությունը: Ճիշտ է, իրականում, ես արդեն հոգնել եմ մրցույթների մասնակցելուց, քանի որ դրանք շատ սթրեսային փուլեր են, սակայն ճիշտ չեմ համարում, երբ ասում են՝ հերիք է մասնակցես մրցույթին:  Եթե կա ուժ, նպատակ, պետք է անընդհատ փորձել։ Ես, լինելով  անկախ կատարող, չունենալով ինչ-որ կապեր, լինելով հեռու մի քաղաքից՝ Կապանից, իմ բարեկամներից, ընտանիքից անընդհատ լսում էի՝ դու ինքդ պիտի քո քայլերը կատարես: Ի սկզբանե գիտեի, որ եթե մյուսների մոտ ճանապարհն արագ է առաջ գնում, ինձ մոտ տևելու է  տարիներ»,-ասաց նա:

Երիտասարդ երգիչը շատ է կարևորում միջազգային հարթակներ դուրս գալու հնարավորությունն ու տարբեր մրցույթներին մասնակցելը:  «Հայաստանը, լինելով փոքր պետություն՝, հաշվի առնելով մեր սոցիալ-տնտեսական, քաղաքական վիճակը, ես հասկացա, որ պետք է փորձել միջազգային հարթակ դուրս գալ: Ցավոք, մենք ինքներս գնահատելու տաղանդ չունենք: Եթե դրսում մարդուն արդեն ծափահարել են, ասել են՝ լավն է, ուրեմն, իսկապես, լավն է: Շատ դեպքեր կան, որ վստահ եմ, եթե տվյալ արտիստը չգար Ուկրաինայից, Ռուսաստանից, Գերմանիայից, ապա Հայաստանում այդ հաջողությունը չէր ունենա: Ես չգիտեմ` դա լա՞վ է, թե՞ վատ, բայց միանշանակ է, որ մեր ժողովուրդը այդքան չի կարևորում սեփական «X–factor »-ը, սեփական «Հայաստանի Ձայնը»»,– կարծում է երգիչը:

Գևորգը նշեց, որ չի ցանկանում մշտապես մնալ որպես մրցութային կատարող և պատրաստվում է նոր երգով ու տեսահոլովակով ներկայանալ իր լսարանին. «Ես ունեի աշխատանք, որը պետք է կատարեի մինչև «Դեպի եվրատեսիլ»–ը, բայց տեսահոլովակի նկարահանումները դադարեցրեցինք` պայմանավորված մրցույթով: Հիմա պատրաստվում ենք վերսկսել աշխատանքները: Մինչև «Նոր ալիք»-ը պետք է ներկայացնեմ իմ առաջին տեսահոլովակը՝ «Ես ու դու» երգի հիման վրա: Ցանկանում եմ դուրս գալ մրցութային վիճակներից  և ներկայացնել իմ երգերը, պարզապես, գալիս է մի փուլ, որ ամեն ինչ կախված է լինում բավականին մեծ ֆինանսից։ Հայաստանի պայմաններում այդ գործընթացը ձգձգվում է, բայց հուսով եմ`  «Նոր ալիք»-ը ինձ համար նոր ազդակ կլինի»-եզրափակեց երգիչը:

Անահիտ Հակոբյան