«Երբ տեսա Սարգսի նվերը, սկսեցի արտասվել». Մանոյի 34–ամյակի միջոցառումն ու ամուսնու յուրահատուկ անակնկալը

13:51 • 20.04.18

Շոուբիզնես

Դերասան Սարգիս Գրիգորյանի կինը՝ պարուհի Մանո Գրիգորյանը, երեկ նշել է ծննդյան տարեդարձը։ Մանոյի տարեդարձը սկսվել է աշխատանքային մթնոլորտում։ Tert.am Life–ը լուսանկարել է Մանոյի օրն ու ներկայացնում է, թե ինչպես է դերասանուհին տոնել 34–ամյակը։

Իրենց երեխաների համար միշտ մեծ խնջույքներ կազմակերպող Սարգիսն ու Մանոն իրենց տարեդարձերի խնջույքներն ավելի համեստ են կազմեկերպում` նեղ շրջանակում։ Նրանք նշում են, որ մեծ միջոցառումների մասնակից լինում են, գրեթե, ամեն օր, իսկ տարեդարձի օրերին նախընտրում են շփվել ամենամտերիմ մարդկանց հետ։ Պարուհին նախ ընկերների հետ տոնեց իրենց նոր գրասենյակի բացումն ու ու իր 34–ամյակը, այնուհետև հարազատների հետ շարունակեց խնջույքն իրենց ամառանոցում։

Մանոյի տարեդարձի առթիվ ամուսինը նրան հաճելի անակնկալ է մատուցել` ձեռքին դաջելով սիրելիի դիմանկարն ու «Երանի ինձ, որ ունեմ քեզ, forever» մակագրությունը։ Պարզվում է` Մանոն Սարգսի անակնկալները փչացնելու սովորություն ունի, սակայն այս անգամ նրան չի հաջողվել գուշակել, թե ինչ նվեր է իրեն մատուցելու ամուսինը։

«Բացարձակ չէի սպասում նման անակնկալի։ Սարգիսը միշտ փորձել է ինձ անակնկալ մատուցել, սակայն չի ստացվել, քանի որ ես շատ ուշադիր եմ, ամեն անգամ նախապես հասկացել եմ` ինչ է ուզում անել։ Սա իսկապես մեծ անակնկալ էր։ Երբևէ խոսք չի եղել նման դաջվածք անելու մասին։ Սարգիսն ասում էր` քեզ այնպիսի նվեր եմ տալու, որը քոնն է լինելու, բայց միշտ ինձ մոտ։ Չգիտեմ ինչու, մտածեցի, որ թանկարժեք մեքենա է նվիրելու, բայց, ինչպես տղամարդիկ սիրում են անել, սկզբում ինքն է վարելու։ Միաժամանակ, հասկանում էի, որ հիմա մի քիչ խառը շրջան է, դրա ժամանակը չէ, ինչպես է նման գնում անելու։ Պարզվում է` մոտ 10 օր առաջ Սաքոն գնացել է Գագոյի մոտ, նայել են իմ նկարները, որոշել են աչքերս դաջել։ Մոտ 4 օր Սարգիսն անընդհատ երկարաթև հագուստ էր ուզում, ասում էր` մրսում եմ, նույնիսկ քնելիս ասում էր` ինձ երկարաթև շոր տուր, չմրսեմ։ Զարմանում էի, բայց մտքովս ընդհանրապես չէր անցնում, որ ինչ–որ բան է թաքցնում, չէի խորանում,– պատմեց Մանոն ու հավելեց, որ ամուսինը 4 օր տանջվել է` անակնկալը չփչացնելու համար,– Այդ վերքը պետք է բաց լիներ, որ լավանար, բայց քանի որ Սաքոն միշտ կողքիս էր, փակ էր պահում ու տառապում»։

Խոսելով իր զգացողությունների մասին` Մանոն ասաց, որ աննկարագրելի ապրումներ է ունեցել, երբ տարեդարձի առավոտն ամուսինը ցույց է տվել նվերը։ «Երբ տեսա, շատ հուզվեցի, սկսեցի լացել։ Ես հանդարտ մարդ եմ, սակայն նման զգացմունքային բաներից միանգամից հալչում եմ։ Գրված խոսքերը շատ ազդեցիկ էին։ Կարծում եմ` տղամարդու համար նման տատու անելը չափազանց համարձակ ու պատասխանատու քայլ է։ Իհարկե, այդ ամենն ունի իր նախապատմությունը:) Այդ բառերի տակ այնքա՜ն տողատակեր կան։ Ինքը գիտի, որ Մանոն իրեն շատ է հանդուրժում։ Սարգիսը բարդ բնավորության տեր է։ Իրեն պետք է հասկանաս, իսկ հասկանալու համար պետք է սիրես։ Եթե չհասկանաս ու չսիրես, 1 վայրկյանից ավելի չես կարող մնալ իր կողքին։) Միաժամանակ, ես անչափ գնահատված եմ ու գնահատում եմ իր այդ հատկանիշը»,– ոգևորությամբ ասաց Մանոն։

«Տատուն մնայուն է, այնպես որ, սա նշանակում է, որ Մանոն իմ վերջին` հավերժ սերն է»,– իր քայլը մեկնաբանեց Սարգիսը։

Մանոն երջանիկ է, ամենակարևորը, ունի ներդաշնակ ընտանիք, կայուն գործ, միաժամանակ, ունի երազանքներ, առաջին երազանքն այն է, որ բոլորն առողջ լինեն, երկրորդն անձնական է։

«Երազում եմ, որ այս տարի մեր ընտանիքը համալրվի ևս մեկով։ Շատ–շատ եմ ուզում այս տարի գոնե ցրցամը տանք:) Երեկ մեծ աղջիկս` Էվան էլ խաղում էր փոքր երեխայի հետ, հետո եկավ ինձ այնպես խնդրեց, որ էլի երեխա ունենանք, որ մերժել չէի կարող։) Աստված առաջ։ Մենք շատ ենք ցանկանում նորից երեխա ունենալ, սակայն ամեն ինչ Աստծո ձեռքերում է։ Սարգիսը տղա ունենալու վաղեմի երազանք ունի, սակայն ես բժիշկներին դիմելուն, հաշվարկներին չեմ հավատում։ Ես հավատում եմ Աստծուն և գիտեմ, որ կլինի Աստծո կամքը։ Սպասում եմ այդ օրհնությանը»,– լիահույս ասաց Մանոն։

Անդրադառնալով դստրերի` Էվայի և Յանայի շնորհավորանքներին` Մանոն ասաց, որ աղջիկները սկսել են շնորհավորել իրեն 3 օր առաջվանից` իրենց մանկական մաքրությամբ ու ձեռքի աշխատանքներով։ «Իրենք ինձ համար ամեն օր նվեր են։ Երկուսն էլ շատ լավն են, թիթիզ աղջիկներ են։ Իրենք, իսկապես, իմ երազած աղջիկներն են` իրարից շատ տարբեր են, բայց շատ ցանկալի` իրենց թերություններով ու առավելություններով հանդերձ»,– եզրափակեց Մանոն։