14 տարվա դադարից հետո Արա Մարտիրոսյանի ակումբային համերգը Երևանում, Սոնայի անկեղծ ելույթն ու նրանց զուգերգի պրեմիերան

Էներգետիկ 2 երգիչ` մի բեմում. երեկ Երևանում կայացավ Արա Մարտիրոսյանի ու Սոնայի ակումբային համատեղ համերգը։ Եթե Սոնան պարբերաբար ակումբային համերգներ է ունենում Երևանում և հայ հանդիսատեսից երկարատև բաժանումներ չի ունենում, Արայի համար օրն առավել, քան հուզումնալից էր։ Երգիչը Երևանում հանդես եկավ 14 տարվա դադարից հետո։

Tert.am Life–ը ներկայացնում է երեկոյի հետաքրքիր պահերն ու մանրամասները։

Ինչպես արդեն հայտնել ենք, Արա Մարտիրոսյան–Սոնա երաժշտական զույգին միավորել է զուգերգը, որի մասին երկար տարիներ խոսում էին, բայց այդպես էլ չէին իրագործում։ В сердце 40 градусов ռուսալեզու երգի երաժշտությունը գրել է Արան, խոսքերը` Ավետ Բարսեղյանը։ Զուգերգի պրեմիերան Սոնան և Արան արեցին համատեղ համերգով, որի ժամանակ նոր երգը բավականին բուռն ընդունվեց։ Հանդիսատեսի ջերմ արձագանքը երգիչներին ստիպում էր կրկին ու կրկին  կատարել այն։ Արդյունքում համերգի ընթացքում զուգերգը հնչեց 4 անգամ։

Առաջին բուռն արձագանքը երգիչներին շատ ոգևորեց։ «Արդեն հասկացանք, որ երգը սիրվելու է, դուք դա այսօր ցույց տվեցիք։  Շուտով կներկայացնենք նաև տեսահոլովակը»,– ասաց Սոնան ու պատմեց, որ մտադիր էին այսօր ներկայացնել նաև տեսահոլովակի պրեմիերան, սակայն չհասցրեցին։ Երգչուհին անկեղծացավ, որ տեսահոլովակը նկարահանելու վայրի մասին երկար են մտածել և մտքով հասցրել են պտտվել ամբողջ աշխարհում։

«Մենք ամբողջ աշխարհում եղանք` Իտալիայից մինչև Ռուսաստան, հետո Թիֆլիսով վերադարձանք Երևան։ Ռեժիսոր Արեն Բայադյանն ասաց` վերադարձեք  տուն։ Այսօր չհասցրինք ներկայացնել տեսահոլովակը, սակայն դա իր դրական կողմն էլ ունի` մի անգամ էլ տեսահոլովակի պրեմիերայի առթիվ կհավաքվենք»,– ասաց Սոնան ու հավելեց, որ Արենն իրավունք չունի ավարտին չհասցնելու տեսահոլովակի աշխատանքները, որոնք կսկսվեն շուտով։

Մինչև համերգը Tert.am Life–ին տված հարցազրույցում Արան զգուշանում էր կանխատեսել` զուգերգը հաջողություն կունենա՞, թե՞ ոչ։ Համերգից հետո նա մեծ ոգևորությամբ խոսեց հաջողության մասին։

«Հանդիսատեսի արձագանքը նշանակում էր, որ չենք սխալվել։ Եվս մեկ անգամ  ապացուցվեց, որ մեր ընկերներից շատերի կարծիքը, որ ես ու Սոնան պիտի միասին երգենք, ճիշտ էր։ Հանդիսատեսը հոտնկայս լսում էր երգը և արդեն  շարունակում երգել մեզ հետ։ Կարծում եմ` սա հաջողություն է»,– նկատեց նա։

Համերգի ընթացքում Արան և Սոնան կատարեցին 17–ական երգ։ Ծրագիրը բավականին երկար էր, հանդիսատեսը` բավականին ջերմ ու երեկոն շարունակվեց մինչև ուշ գիշեր։

Հայաստանում Արան ելույթ ունեցավ 14 տարվա դադարից հետո։  «Ինձ համար սա մեծ պատասխանատվություն էր` 14 տարվա լռության կարոտ։ Ես չեմ կարող խոսքերով արտահայտել այն տաքությունն ու էներգիան, որ այսօր ստացա։ Հասկացա, որ ապրելու, արարելու և նոր երգեր ստեղծելու իմաստ կա»,– նկատեց Արան։

Լուսանկարները՝ Հրանտ Մարինոսյանի