«Փորձը մեզ դուր է եկել, սակայն կան բաներ, որոնք կփոփոխենք». Սևակ Խանաղյանի հարցազրույցը` «Եվրատեսիլին» ընդառաջ

Սևակ Խանաղյանի` Լիսաբոնում կայացած առաջին փորձից հատվածը Tert.am Life–ը ներկայացրել է իր ընթերցողներին։ Փորձից հետո Սևակը հարցազրույց է տվել եվրոպական մամուլի ներկայացուցիչների հետ և պատասխանել նրանց հարցերին։

«Մեր առաջին փորձը անցել է շատ լավ, շատ դրական էներգիա կար։ Անհամբեր սպասում եմ մյուս փորձին։ Փորձը մեզ դուր է եկել, սակայն կան բաներ, որոնք մենք կփոփոխենք ու կանենք մեր սրտով»,– ասաց երգիչը։

Հաշվի առնելով Սևակի մրցութային փորձը` նրանից հետաքրքրվեցին, թե ինչ մրցույթների է մասնակցել, իր համար ավելի հեշտ է լինել մրցողի՞, թե՞ մարզչի կարգավիճակում. «Չեմ կարող ասել, որ շատ եմ սիրում մրցել, սակայն շատ եմ մասնակցել մրցույթների։ Սկսել եմ Ռուսաստանի Главная сцена, Голос նախագծերից, հետո մասնակցել եմ X-factor–ին, այնուհետև որպես մարզիչ ներկայացել եմ «Հայաստանի ձայնում»։ Իհարկե, շատ դժվար է անընդհատ մրցույթների մասնակցել։ Ես միշտ ասել եմ, որ շատ ավելի հեշտ է, երբ դու ես բեմում, ամեն ինչ քեզնից է կախված։ Երբ մարզիչ ես, դու ես ընդունում որոշումը, իսկ ես երբևէ չեմ սիրել որևէ մեկին քննադատել կամ դատել։ Դրա համար ավելի դժվար էր լինել մարզիչ, քան մասնակից»։

Խոսելով իր շրջագայության մասին` Սևակը նշեց, որ բոլոր երկրներում իրեն ընդունել են շատ լավ ու ջերմ, ինչի համար բոլորին շնորհակալ է, սակայն իրեն ամենից շատ դուր է եկել Իսրայելում։

Եվրատեսիլյան «Քամի» երգի մասին պատմելիս Սևակը շեշտեց, որ կարևորում է երգի հայալեզու կատարելը։ «Ինձ համար շատ կարևոր է սկզբից մինչև վերջ երգել հայերեն։ Ըստ իս` «Եվրատեսիլն» այն մրցույթն է, որտեղ տարբեր երկրների ներկայացուցիչները գալիս են, որպեսզի  իրենց մշակույթով կիսվեն մյուսների հետ։ Քո լեզվից լավ միջոց չկա դա փոխանցելու համար»,– ընդգծեց երգիչը։

Սևակը նկատեց, որ երաժշտությունն իր համար ամեն ինչ է։ «Ես երաժշտությամբ չեմ զբաղվում, ես ապրում եմ երաժշտությամբ` սկսած 7 տարեկանից։ Երգեր մանկուց չեմ գրել։ Ստեղծագործել սկսել եմ ավելի ուշ։ Առաջին երգս գրել եմ 20 տարեկանում»,– ասաց երգիչը:

Սևակի որդին՝ Բագրատը, ևս սիրում է երաժշտություն։ Սևակը խոստովանում է` շատ կուզեր որդուն տեսնել որպես երաժիշտ. «Շատ կուզեի, որ որդիս դառնար երաժշտ։ Ինքը սիրում է երաժշտություն, մեկ–մեկ երգում է։ Թեև չեմ կարող ասել, որիմ չափ շատ է սիրում, որովհետև ես գիշեր–ցերեկ էի երգում, ինքը` ոչ այդքան շատ։ Կարող եմ հստակ ասել, որ ինքն է ընտրելու իր մասնագիտությունը։ Ինձ համար ամենակարևորն այն է, որ նա դառնա լավ մարդ, թե ինչով կզբաղվի կարևոր չէ»։

Երգչից հետաքրքրվեցին նաև, թե որքանով է հետևում նորաձևությանը։ «Ես երբեք չեմ ընկել նորաձևության հետևից։ Նորաձև է այն, ինչը քեզ սազում է, ինչի մեջ քեզ հարմարավետ ու լավ ես զգում։ Բոլորը կարծում են, թե իմ միրուքը այժմյան թրենդով է պայմանավորված։ Իրականում, ես 6-7 տարի է` միրուքով եմ և իմ կերպարը կապ չունի թրենդի հետ»,– նկատեց նա։