«Նա շատ խստապահանջ ու բծախնդիր է». Զարուհի Բաբայանը՝ նոր տեսահոլովակի և Ռոբերտ Ամիրխանյանի արձագանքի մասին

Զարուհի Բաբայանը շուտով նոր տեսահոլովակ կներկայացնի իր լսարանին։ Երգը, որի հիման վրա Զարուհին նկարահանել է իր տեսահոլովակը, նոր չէ: Նա  ներկայանալու է Ռոբերտ Ամիրխանյանի հայտնի ստեղծագործությամբ՝ «Հայի աչքեր» երգով:

Tert.am Life–ի հետ զրույցում երգչուհին մանրամասներ ներկայացրեց նոր աշխատանքի մասին և տրամադրեց լուսանկարներ նկարահանման հրապարակից։

Զարուհու խոսքով` կոմպոզիտորի հայտնի երգն իր կատարմամբ էական փոփոխության չի ենթարկվել. «Այդ ստեղծագործությունը մեզանում հնչել է հենց հեղինակի կատարմամբ: Շատերն են այն երգել, բայց մեզ համար միշտ հասանելի է եղել Ամիրխանյանի տարբերակը: Այս պարագայում, բնականաբար, փոքր-ինչ նոր մոտեցում ենք ցուցաբերել, սակայն փորձել ենք պահել երգն այնպիսին, ինչպիսին կա: Ես պարզապես իմ զգացողությունն եմ արտահայտել»:

Երգչուհին նշեց, որ Ռոբերտ Ամիրխանյանից ոչ միայն երգը կատարելու համաձայնություն է ստացել, այլև կոմպոզիտորին ցույց է տվել իր կատարումը մինչև տեսահոլովակի նկարահանումը:

«Շատ ուրախալի է, որ նա դրական արձագանքեց և իրեն շատ դուր եկավ իմ տարբերակը: Ամիրխանյանը բոլորիս հայտնի է որպես խստապահանջ, բծախնդիր և լուրջ կոմպոզիտոր, ես կասեի` հանճարեղ կոմպոզիտոր։ Բնականաբար, իր արձագանքն ու խոսքն ինձ համար շատ կարևոր էին: Դեռ ծրագրեր ունենք ապագայում միասին աշխատելու։ Հուսով եմ՝ այն, ինչ մտածել ենք, կդառնա իրականություն»,- ասաց նա՝ առայժմ չցանկանալով ներկայացնել այլ մանրամասներ:

Նոր  տեսահոոլովակի ռեժիսորը Մարիամ Գևորգյանն է: Երիտասարդ ռեժիսորի հետ Զարուհին առաջին անգամ չէ համագործակցում: Նա եղել է նաև երգչուհու նախորդ երկու տեսահոլովակների ռեժիսորը: Տեսահոլովակը նկարահանվել է սև ու սպիտակ գույներով:

«Ռեժիսորի հետ մտածեցինք, որ ամենահուզիչ տարբերակը հենց դա կլինի: Ինչպես տեսահոլովակը, այնպես էլ կերպարները մինիմալիստական են։ Տեսահոլովակում շեշտը դրվել է աչքերի և էմոցիաների վրա, իսկ իմ կերպարը լրացրել են Նուռի հեղինակած զարդերը, որոնց մեջ կա և՛ ֆոլկ, և՛ ժամանակակից մոտեցում։ Կերպարս մոտ է ազգայինին, բայց նաև ժամանակակից մոտեցումներ կան»,- ասաց երգչուհին:

Զարուհին նշեց, որ տեսահոլովակում սյուժետային զարգացում չկա ու որևէ հայտնի մարդ չի նկարահանվել:

«Բոլորը հասարակ մարդիկ են, ինչպիսիք կան մեզանում: Պարզապես, փորձել ենք աչքերի  խորությունը փոխանցել»,- ասաց երգչուհին: