Ելենա Արշակյանն ու Անահիտ Մխիթարյանն այսօր մեկնեցին Կաննի կինոշուկա` ներկայացնելու Դանիել Վարուժանի «Հարճի» հիման վրա նոր նախագիծը

Մայիսի 8-19-ը Կաննի 71-րդ կինոփառատոնի շրջանակում գործող կինոշուկային մասնակցելու համար ՀՀ մշակույթի նախարարությունը հայտարարել էր մրցույթ, որի մասնակից 6 կինոնախագծերից հաղթող են ճանաչվել Ելենա Արշակյանի «Հարճը», Արտյոմ Բաղդասարյանի «Իններորդ ալիք-Այվազովսկին» և Մերի Աղախանյանի «Մոռացված բնակիչները»։

Նրանք արդեն մեկնել են Կանն` ներկայացնելու իրենց նախագծերն ու համարտադրողներ գտնելու։ Թռիչքից առաջ  Tert.am Life–ը հանդիպել է «Հարճը» նախագծի ռեժիսոր, պրոդյուսեր Ելենա Արշակյանի և սցենարի հեղինակ Անահիտ Մխիթարյանի հետ, ովքեր իրենց ֆիլմն իրականացնում են PANARMENIAN FILMS–ի հետ։

Ելենան պատմեց, որ «Հարճի» սցենարը գրվել է մոտ 2 տարի. ««Հարճը» ստեղծագործությանը, երևի, բոլորը ծանոթ են։ Մովսես Խորենացու պատմական հիմքով  հետագայում Դանիել Վարուժանը գրեց «Հարճը» պոեմը։ Անահիտ Մխիթարյանն այդ ամենը  վերածեց կինոսցենարի։ Բավականին ծանր աշխատանք ենք արել։ Սցենարը համապատասխանում էր մրցույթի կանոնակարգին, դարձավ 3 հաղթողներից մեկը և այսօր արդեն մեկնում ենք Կաննի կինոշուկա` ներկայացնելու  մեր նախագիծը։ 301 թվականին մենք  աշխարհում առաջինն ենք ընդունել Քրիստոնեությունը` որպես պետական կրոն։ Շատերը չգիտեն այդ մասին։ Կարծում եմ` ճիշտ տեղն ու ժամանակն է այդ ամենը բարձրաձայնելու։ Մենք շատ արժանի մշակույթի գործիչներ ունեք, որոնցով մեզ ճանաչում են, սակայն շատերը չգիտեն, որ առաջինը մենք ենք ընդունել Քրիստոնեությունը` որպես պետական կրոն։ Կարծում եմ` սա լավ հարթակ է ներկայացնելու Հայաստանը»։

Պրոդյուսերը հայտնեց, որ սցենարը գրելու փուլում ունեցել են խորհրդատու` Տ. Նաթան արքեպիսկոպոս Հովհաննիսյանը։

Ելենան և Անահիտը մեծ ակնկալիքներով են մեկնում Կանն։ Պրոդյուսերը նկատեց, որ կինոշուկայում ներկայանալու փորձ ունի, սակայն Կաննում առաջին անգամ է լինելու։ «Ռուսական «Կինոտավր» փառատոնում ներկայացրել եմ «Անավարտ թռիչքը» որն ունեցել  է հաջողություն։ «Կինոտավրից» հետո հաջող համագործակցություններ եղան, ԱՊՀ մի շարք երկրներ պաշտոնապես գնեցին ֆիլմը։ Սա իմ երկրորդ  քայլն է, սակայն Կաննում առաջին անգամ եմ։ Շատ բան չգիտեմ, ինչից չեմ ամաչում։ Իհարկե, հասկանում եմ` ուր եմ գնում, սակայն սա մեծ փորձ կլինի` հասկանալու արտադրողների պահանջը։ Արդեն իսկ ունենք պայմանավորվածություններ տարբեր երկրների կինոարտադրող ընկերությունների հետ։ Սա համագործակցության լավ հնարավորություն է, քանի որ կինոաշխարհի կիզակետում ենք լինելու։ Ինչ–որ առումով հուզված եմ, ինչ–որ առումով պարտավորեցնող է ներկայացնել Հայաստանը։ Իհարկե, յուրաքանչյուրս ներկայանում ենք որպես անհատ պրոդյուսեր, սակայն ես պետք է ներկայացնեմ իմ երկրի արտադրանքը։ Կարծում եմ` սա այն նախագիծն է, որը բարձր գլխով կներկայացնենք»,– ասաց Ելենան։

«Հարճը» դեռևս չի մտել արտադրական փուլ։ Մի շարք հարցերի պատասխաններ պարզ կդառնան բանակցություններից հետո։ Ելենան հայտնեց, որ նախագծի գլխավոր հերոսին` Տրդատին կմարմնավորի Խորեն Լևոնյանը։ Նազենիկի և Երանյակի դերերում քննարկվում է Քրիստինա Կույումչյանի և Անի Երանյանի մասնակցությունը, սակայն դերակատարները դեռ վերջնական հաստատված չեն։ Սա այն կազմն է, որով Ելենան ներկայացնում է նախագիծը Կաննում, սակայն համարտադրող գտնելու դեպքում հնարավոր է` դերասանական կազմում փոփոխություններ լինեն։

Ելենան հույս հայտնեց, որ ֆիլմը պատրաստ կլինի կհանձնեն 2-3 տարվա ընթացքում։

Լուսանկարները` Շաքե Հովհաննիսյանի 

Ֆիլմի ֆոտոշարքը տրամադրել է PANARMENIAN FILMS–ը