Սարգսի և Մանոյի նվերներն իրենց դստեր 8-ամյակին և խնջույք չանելու պատճառը

Դերասան Սարգիս Գրիգորյանի միջնեկ դուստրը` Էվան, այսօր դառնում է 8 տարեկան։ Թեև Սարգիսն ու Մանոն սովորաբար մեծ խնջույք են կազմակերպում փոքրիկների տարեդարձի առթիվ, այս տարի զերծ են մնացել նման խնջույք կազմակերպելուց։

Tert.am Life–ի հետ զրույցում Մանոն ասաց, որ պատճառը Հայաստանի ներքաղաքական իրավիճակն է, սակայն աղջիկների հետ հետաքրքիր օր են ծրագրել։

«Այս օրերն այնքան արագ անցան, որ չհասցրեցինք էլ ինչ–որ բան կազմակերպել։ Էվան չնեղվեց, որ խնջույք չենք անելու։ Միշտ մեծ խնջույք ենք արել, այս տարի թող այսպես լինի, կարևորը ինքն ուրախ է։ Այսօր միասին կգնանք ատրակցիոններ»,– ասաց Մանոն ու հավելեց, որ ամուսինը` Սարգիսը, չի կարողանա միանալ իրենց, քանի որ ամբողջ օրը նկարահանումների է լինելու։ Մանոյի և 2 դուստրերի հետ կլինի նաև Սարգսի ավագ դուստրը` Նարեն։

8–ամյա Էվան մեզ պատմեց, թե ինչ նվերներ է ստացել և ինչի մասին է երազում. «Մաման ինձ տիկնիկ է նվիրել, պապան՝ մեծ ականջակալներ, քույրիկս` Նարեն, ֆլոմաստեր և հեքիաթի գիրք։ Յանան դեռ պետք է տա իր նվերը,  ինձ թվում է` կամ կպարի, կամ կերգի, ու դա կլինի իր նվերը։ Ես երազում եմ մե՜ծ Պոնի Կինդեր ունենալ, որի մեջ լիքը Պոնիներ կլինեն, բայց ինձ համար ամենակարևոր երազանքն այն է, որ միշտ իմ ընտանիքի հետ լինեմ»։

Էվայի 2 երազանքի համադրությունը, որոնցից մեկն իր տարիքին համապատասխան էր, մյուսը` մեծ մարդուն բնորոշ, զարմանալի էր։ Պարզվում է` դա միակ բանը չէ, որով աղջնակը զարմացրել է շրջապատին։ Մայրիկը պատմեց, թե ինչպես է նա արձագանքել նվերները ստանալիս. «Նվերները տվեցի, սկսեց արտասվել։ Հարցրեցի` դուրդ չե՞ն գալիս, ասաց` չէ, դու ինձ այսքան բան ես նվիրում, բա ես ի՞նչ պետք է տամ։ Անհարմար եմ զգում։ Զարմացած էի»։

Վաղը Սարգսի ավագ դստեր` Նարեի տարեդարձն է։ Էվայից հետաքրքրվեցինք, թե ինքն ինչ նվեր է պատրաստել նարեի համար։ «Իր ծնունդը կգա, կմտածեմ,– ասաց նա, իսկ մայրիկի դիտարկմանը, որ իրենք նվեր են պատրաստել, արձագանքեց,– բայց դա դու ես գնել, ես իմ կողմից ուրիշ բան կնվիրեմ։ Երևի, սիրուն երգ կնվիրեմ իրեն»։

Մանոն նշեց, որ երջանիկ մայրիկ է։ Մեր նախորդ զրույցում պարուհին  նշել էր, որ իր դուստրերը մեծացել և իր երազած աղջիկներն են դարձել։ «Էվայի շնորհիվ առաջին անգամ զգացի մայրության բերկրանքը։ Դա անբացատրելի զգացողություն է։ 8 տարի առաջ հենց այս ժամերին է ինքը ծնվել (ժամը 15։55–ին)։ Հնարավոր չէ բացատրել` ինչ է նշանակում, երբ նոր կյանք ես տալիս ինչ–որ մեկին։ Շատերն ասում են` էլ չեմ ուզում երեխա ունենալ, ես միայն երեխայի ծննդի այդ վայրկյանի համար պատրաստ եմ շատ երեխաններ ունենալ,– ասաց Մանոն ու հավելեց,– Շատ երջանիկ մայրիկ եմ։ Աղջիկներիս հաճախ իրենց նմանեցնում են, սակայն իրենք շատ տարբեր են։ Երբ ինձ հարցնում են` ում ես ավելի շատ սիրում, չեմ կարողանում պատասխանել, որովհետև երկուսն էլ օժտված են այն հատկություններով, որոնք սիրում եմ աղջիկների մեջ` Յանան ակտիվ է ու համառ, Էվան` խորը ու զգացմունքային։ Ինձ համար իրենք շատ լավն են»։

Մանոն կարևորում է, որ երեխաներն իրենց տարիքին համապատասխան են մեծանում և չեն կորցնում մանկությունը։ «Իրենք մեծանում են հայտնի ընտանիքում, ոչնչից զուրկ չեն, սակայն դրա հետ մեկտեղ այնքան մանկական ու մաքուր են։ Իրենց տարիքային այս հատվածում ինձ համար ամենակարևորն է, որ այս ամենի մեջ իրենք երեխա են մնացել»,– նկատեց մայրիկը։