Անատի Սաքանյանը՝ ոճային կտրուկ փոփոխության պատճառի մասին

18:34 • 09.05.18

Շոուբիզնես

Դերասանուհի Անատի Սաքանյանը փոխել է սանրվածքը և հրաժարվել երկար վարսերից: Tert.am Life-ի հետ զրույցում դերասանուհին ասաց, որ նոր կտրվածքը կապված էր արտաքին տեսքում փոփոխություն անելու ցանկության հետ։

Դերասանուհին բացառեց տարածված կարծիքը, որ կանայք շատ հաճախ ոճային փոփոխություն անում են սթրեսային իրավիճակում հայտնվելիս։ «Նման խնդիր չեմ ունեցել: Պարզապես, արդեն քանի տարի է՝ երկար մազերով էի, ինքս ինձնից հոգնել էի: Չեմ սիրում երկար ժամանակ նույն տեսքով մնալ»,- ասաց նա։

Անատին պատմեց, որ 16 տարեկանում էլ է «կառե» կտրվածք ունեցել։ Դրանից հետո արդեն 10 տարի է՝ երկար վարսերով էր:

«Երբ եթերում հայտնվեց «Ավազե դղյակ» հեռուստասերիալի անոնսը, որի գլխագրի նկարում դեմքիս կեսն էր երևում, կարծես «կառե» սանրվածքով լինեի: Այնքան հավանեցի այդ նկարը, որ անընդհատ նայում էի։ Կարելի է ասել, դրանից ոգեշնչված որոշեցի կտրել մազերս։ Ընդհանրապես, եթե ես մի բան որոշում եմ, անպայման, պետք է անեմ, դա կլինի փոփոխություն կապված սանրվածքի, աշխատանքի, թե այլ հարցի հետ»,- պատմեց նա։

Խոսելով նոր սանրվածքի վերաբերյալ արձագանքների մասին՝ դերասանուհին ասաց, որ հիմնականում դրական կարծիքներ է լսել. «Հիմնականում ասում են, որ շատ է սազում, բայց կան նաև մարդիկ, ովքեր ասում են՝ սանրվածքս ինձ մեծացրել է: Ոմանք էլ ասում են՝ ինչո՞ւ ես կտրել, չե՞ս ափսոսում։ Դեռ չեմ ափսոսում: Գուցե մեկ շաբաթ կամ մեկ ամիս անցնի, ափսոսեմ, բայց հիմա դրան էլ լուծում կա՝ թեև արհեստականորեն, բայց կարող ես ընդամենը մեկ ժամվա ընթացքում մազերդ երկարացնել»:

Վարսերի երանգը, սակայն, դերասանուհին չի փոփոխել։ Նա նշեց, որ չի էլ պատրաստվում հրաժարվել շիկահեր լինելուց. «Մոտ օրերս ամբողջությամբ կբացացնեմ մազերիս երանգը: Շատ կուզեի որոշ ժամանակով մգեցնել, բայց ինձ չի սազում: Բաց երանգի մազերի խնամքը շատ ավելի դժվար է, քանի որ ամեն անգամ վարսերդ ենթարկում ես քիմիական միջամտության»,-ասաց նա:

Անատին ասաց, որ ամենևին չի կաշկանդվում շիկահերների մասին կարծրատիպային մոտեցումներից։ «Իմ դեպքում բացարձակ նման խնդիր չկա: Միայն մի շատ մոտ ընկեր ունեմ, որ միշտ կատակում է այդ թեմայով, հետո ասում է՝ չէ, բացարձակ քեզ հետ կապ չունի»,- ասաց նա: