«Ուսանողի համար դա ամենամեծ ու ամենաանսպասելի «առաջարկն» է». Իննա Խոջամիրյանը Կարմիր դիպլոմով ավարտեց ԵՊՀ–ն

«Շանթ» հեռուստաընկերության դերասանուհի Իննա Խոջամիրյանն այս տարի ավարտեց Երևանի պետական համալսարանի Հոգեբանության ֆակուլտետը։ Դերասանուհին արդեն մագիստրոսի կոչում ունի, իսկ Մագիստրոսական թեզի պաշտպանության, իբրև հոգեբան աշխատելու ծրագրերի մասին խոսել է Tert.am  Life-ի հետ:

Իննան հայտնեց, որ Թեզի պաշտպանությունը սահուն է անցել։ Նրա խոսքով` իրենց ֆակուլտետում ամեն բան չափազանց կազմակերպված է։

Այնուամենայնիվ, դերասանուհին համարում է, որ 2 անգամ են պաշտպանել թեզը։ Բանն այն է, որ նրանց պաշտպանության օրը նշանակված էր մայիսի 2-ին, սակայն ամբողջ կուրսով բոյկոտել էին այն՝ ելնելով քաղաքական վիճակից։

«Հուրախություն մեզ ռեկտորատը 2-րդ հնարավորությունն ընձեռեց մեզ՝ վերանշանակելով օրը մայիսի 7-ին։ Երևանի պետական համալսարանի պատմության բացառիկ պաշտպանություններից էր մերը, եթե ոչ միակը և բացառիկը»,- նկատեց նա։

Իննան համալսարանն ավարտում է Կարմիր դիպլոմով։ «Մեծ հույս ունեմ, որ Նոր Հայաստանում այն իր նպատակին կծառայի։ Չնայած «կարմիր օժիտն» էլ վատ նպատակ չէ։)»,– կատակեց Իննան։

Դերասանուհին կարևորում է բարձր գնահատական ստանալը, սակայն շեշտում է, որ դա ինքնանպատակ չէ. «Երբեք գնահատականին սկզբունքորեն չեմ վերաբերվել, սակայն գաղտնիք չէ, որ այն մեծ բան է փոխում կրթական համակարգում։ Միջին որակական գնահատականից է կախված անվճար համակարգո՞ւմ ես, թե՞ ոչ, վարձավճարդ կզեղչվի՞, թե՞ ոչ, այլ կրթական ծրագրերի կկարողանա՞ս դիմել, թե՞ ոչ։ Գնահատականը սկզբունք չէ, այն զուտ լավ սովորելը մատնանշող ֆենոմեն է»։

Առհասարակ, կյանքում Իննան իրեն «գերազանցիկ» կամ «ծույլիկ» չի համարում։ Ասում է` կյանքը շատ կարճ է միայն «գերազանցիկ», կամ «ծույլիկ» լինելու համար։ «Պիտի հասցնես լինել գերազանցիկ, ծույլ, ալարկոտ, աշխատասեր, նպատակասլաց, շուտ կոտրվող։ Ժամանակ առ ժամանակ կտրուկ գերազանցիկ եմ, բայց դադարների պահերը ևս շատ են»,– խոստովանեց նա։

Թեև Իննան հաջողել է աշխատանքը դերասանական ոլորտում, հոգեբանությունն անտեսել չի պատրաստվում։ «Մասնագիտական կրթական ոլորտում դեռ ծրագրեր ունեմ։ Մեծ պատվով պիտի նշեմ, որ մեր մասնագիտացման  ամբիոնի վարիչը պաշտպանությունից հետո արդեն 2-րդ անգամ հարցրեց` արդյոք չեմ ուզում ասպիրանտի հայտ ներկայացնել։ Դա ուսանողի համար ամենամեծ, ամենաանսպասելի ու անբացատրելի «առաջարկն» է, որ կարող է լինել։ Շատ հավանական է, որ ասպիրանտուրա դիմեմ»,– ասաց նա։

Աշխատանքային ծրագրերի մասին խոսել դեռևս չցանկացավ։ «Չեմ կարող և չեմ ուզում՝ մինչև դրանց ձեռնամուխ չլինեմ։ Այս տարի դեռ մասնագիտական գործունեություն չեմ ծավալի, համալսարանական կրթությանը կից վերապատրաստման պրակտիկ թրեյնինգների եմ մասնակցում, դրանք բավարար են։ Մյուս տարվա հետ կապված արդեն որոշակի մասնագիտական պլաններ կան»,– հայտնեց դերասանուհին։