Սիլվա Հակոբյանի և Հարութ Բալյանի առաջին զուգերգի մանրամասներն ու լուսանկարները

Երգչուհի Սիլվա Հակոբյանն ու երգիչ Հարութ Բալյանը զուգերգ ունեն, որի հիման վրա նկարահանված տեսահոլովակը մի քանի օրից կներկայացնեն իրենց լսարանի դատին։ Tert.am Life–ի հետ զրույցում Սիլվան ու Հարութը պատմել են իրենց առաջին համագործակցության մասին։

«Քեզ գտա» կոչվող ստեղծագործությունը երջանիկ սիրո մասին մեղեդային երգ է, որի երաժշտությունը գրել է Հարութ Բալյանը, խոսքերի հեղինակը Սաթենիկ Թորոսյանն է, գործիքավորումն արել է «ԿարենՍևակ» փրոդաքշընը, տեսահոլովակի ռեժիսորը Խաչիկ Եղոյանն է, օպերատորը` Սուրեն Թադևոսյանը։

Սիլվան հայտնեց, որ աշխատանքային թիմն իր համար նոր էր, սակայն առաջընթաց ունենալու համար կարևորում է պարբերաբար նոր մարդկանց հետ աշխատելը, այնպես որ, հաճելի համագործակցություն են ունեցել։

Հարութն ու Սիլվան վաղուց են իրար ճանաչում, սակայն համագործակցելու առիթ ունեցել են ամիսներ առաջ, երբ մասնակցել են նավի վրա կազմակերպված համատեղ համերգի։

«Սիլվային գիտեի ու շատ հարգում էի որպես երգչուհի։ Մեր համատեղ համերգից հետո  բացահայտեցի նաև նրա մարդ տեսակը, ինչն ինձ համար շատ կարևոր է։ Որոշել էի, երբ զուգերգ ունենամ, առաջարկեմ իրեն միասին կատարել։ Այդպես էլ արեցի։ Այս երգը վաղուց էի գրել, որոշեցի փոփոխել և զուգերգով ներկայացնել։ Նա էլ սիրով համաձայնեց»,– պատմեց Հարութը։

«Քեզ գտա»–ն Սիլվայի չորրորդ զուգերգն է։ «Կարծում եմ` երգչին զուգերգեր էլ են պետք, դրանք հետաքրքրություն են մտցնում կարիերայում, սակայն զուգերգ կատարելիս պարտադիր է, որպեսզի երգիչների ձայները համապատասխանեն։ Առաջին հայացքից հնարավոր է` ես ու Հարութն անհամատեղելի թվանք, սակայն շատ գեղեցիկ երգ է, մեր ձայների համատեղելիությունն էլ գեղեցիկ է ստացվել»,– ասաց երգչուհին։

Սիլվան կարծում է, որ զուգերգ ներկայացնելիս երգիչը նաև լսարանն ընդլայնելու հնարավորություն է ունենում։ Հարութից հետաքրքրվեցինք` արդյոք մենահամերգի շեմին Սիլվայի հետ զուգերգ ներկայացնելով նպատակ ուներ մեծացնել հետաքրքրությունը մենահամերգի հանդեպ։ «Մենահամերգ ունենայի, թե ոչ, Սիլվայի հետ ուզում էի զուգերգ ունենալ։ Իհարկե, կարծում եմ` զուգերգն էլ կնպաստի մենահամերգի հանդեպ հետաքրքրությանը»,– ասաց նա։

Ինչ վերաբերում է երգի կոմերցիոն լինել–չլինելուն` Սիլվան ասաց, որ կոմերցիոն երգ ստեղծելու մտադրություն չեն ունեցել։ «Հատուկ չենք մտածել կոմերցիոն երգ ունենալ։ Պարզապես ցանկություն ունեինք մեր երգադարանը համալրելու ևս մի գեղեցիկ զուգերգով։ Գուցե և կոմերցիոն դառնա, չեմ բացառում»,– ասաց նա։ Հարութն էլ վստահություն հայտնեց, որ իրենց զուգերգը կհամալրի լավագույն երգերի շարքերը։

Ինչ վերաբերում է տեսահոլովակին` երգիչները հայտնեցին, որ սյուժետային կոնկրետ գիծ չկա, թեև տեսահոլովակն ունի իր զարգացումը։ «Գեղեցիկ գույներով տեսահոլովակ ենք ներկայացրել, սակայն սյուժետային գծի վրա հատուկ շեշտադրում չենք արել, որպեսզի երգի խոսքն ու ասելիքը տեղ հասցնենք»,– նշեց Հարութը։

Լուսանկարները` Շաքե Հովհաննիսյանի և Սիլվա Հակոբյանի անձնական արխիվից