«Երևանում TOYOTA եմ վարում, Բարսելոնայում՝ BMW». Աստղիկ Սաֆարյանը՝ ղեկին

13:34 • 14.05.18

Շոուբիզնես

Տրամաբանություն, զգուշություն, դիմացինի վարքագիծը կանխատեսելու ունակություն և զգոնություն. հենց այս հատկանիշներն է կարևորում երգչուհի Աստղիկ Սաֆարյանը վարորդ դառնալու համար: Tert.am Life-ի «Ղեկին կանայք են» խորագրում այս անգամ ներկայացնում ենք Աստղիկին՝ վարորդի կարգավիճակում:

Նա պատմեց, որ մեքենա վարել սկսել է 2008 թվականից, երբ 22 տարեկան էր, չնայած վարորդական իրավունքը ձեռք է բերել ավելի վաղ՝ 2006 թվականին: Երգչուհու խոսքով՝ վարորդ դառնալն իր համար եղել է անհրաժեշտություն:

«Որոշեցի վարորդ դառնալ, քանի որ աշխատանքիս բնույթը տարածքային առումով բազմազան էր. Ժամանակս արդյունավետ բաշխելու համար զգացի, որ իմ մեքենայով տեղափոխվելու անհրաժեշտություն ունեմ,- ասաց երգչուհին, ապա ավելացրեց, որ մինչև օրս վարում է իր առաջին մեքենան,- Քանի որ բնույթով միասեր եմ, դեռ ոչ մի կերպ չեմ կարողանում հրաժարվել իմ առաջին մեքենայից, չնայած գիտակցում եմ, որ արդեն ժամանակն է։ Ես վարում եմ թե՛ Երևանում, թե՛ Բարսելոնայում։ Երևանում TOYOTA մակնիշի մեքենա, իսկ Բարսելոնայում՝ ավելի ամուր մեքենա՝ BMW մակնիշի»,-ասաց նա:

10 տարվա վարորդական փորձի ընթացքում Աստղիկը նկատել է, որ կանայք, որպես վարորդ, որոշակիորեն զիջում են տղամարդկանց. «Ինչ-որ տեղ համաձայն եմ, որ կանայք տղամարդկանցից լավ վարորդներ չեն, քանի որ ինչպես բոլոր հարցերում, այս դեպքում ևս կանանց և տղամարդկան մտածելակերպը տարբերվում են, ինչն անդրադառնում է վարելու վարքագծի վրա։ Տղամարդիկ ավելի համարձակ են վարում, մյուս կողմից՝ կանայք ավելի զգույշ են, ինչը լավ է»:

Երգչուհին իրեն բնորոշեց որպես շատ կարգապահ վարորդ և դժվարացավ մտաբերել, թե վերջին անգամ, երբ են Ճանապարհային ոստիկանության ծառայողները կանգնեցրել իր մեքենան. «Վարում եմ առանց խախտումների և միայն կանոններով, գրեթե միշտ, զիջում եմ դիմացինիս»:

Երգչուհին նշեց, որ շատ վաղուց վթարային իրավիճակներում չի հայտնվել. «Վարելուս առաջին տարիներին եղել են վթարային թեթև իրավիճակներ, փառք Աստծո, ոչ լուրջ: Նման իրավիճակներում առաջին հերթին զանգահարում եմ եղբորս և մեքենայի մեջ սպասում եմ մինչև նա գա, այդ ընթացքում նա տեղեկացնում է ԱՊՊԱ-ին և ամեն բան օրինական կերպով լուծվում է»:

Չնայած տարիների փորձին` Աստղիկը նշեց, որ, միևնույն է, մեքենայի ցանկացած անսարքության դեպքում ինքնուրույն խնդիրը կարգավորել չի կարողանում և կրկին դիմում է եղբայրների օգնությանը: Ամենաերկար ճանապարհը, որ իր մեքենայով գնացել է երգչուհին Իսպանիայում է եղել։

«Երևի Բարսելոնայից Ջիրոնա ճանապարհն էր, բայց եվրոպական շատ քաղաքներ այնքան մեծ են, որ մի կետից մյուսը տեղափոխվելը իրենով արդեն դառնում է երկար ճանապարհորդություն, այդ առումով Երևանն ուղղակի հրաշալի է, երբ մի տեղից մյուս տեղը գնալու համար պահանջվում է մոտ 10 րոպե։ Ուղղակի հրաշալի է, քանի որ օրվա ընթացքում կարողանում ես հասցնել անել շատ աշխատանք, իսկ դրսում քաղաքների մեծության պատճառով օրվա ընթացքում հասցնում ես անել լավագույն դեպքում 2 կարևոր գործ և օրվա վերջում հոգնածությունդ ավելի մեծ է լինում»,– նկատեց նա։

Բարսելոնայում վարելուց հետո, երևանյան երթևեկությանն ու, հատկապես, խցանումներին Աստղիկը հերոսաբար դիմադրում է և, գրեթե, չի նյարդայնանում։ «Ես վարելուց հանգստանում եմ, և եթե շտապելու խնդիր չի լինում, եթե չեմ ուշանում, օրինակ, ուղիղ եթերից կամ այլ կարևոր նկարահանումից, հանդիպումներից, երբեք չեմ նյարդայնանում խցանումներին։ Միգուցե, ինձ նյարդայնացնի դիմացինիս սխալ ու ոչ գրագետ վարելաձևը։ Բացի այդ, խցանումների ժամանակ, երբ պարապ եմ մնում, երբեմն, սելֆիներ եմ անում, ինչը, իհարկե, ճիշտ չէ և երբեք խորհուրդ չեմ տալիս իմ երկրպագուներին, իմ հետևողներին:)»,– ժպիտով ասաց երգչուհին ու հավելեց, որ միայն այդ ժամանակ է իրեն թույլ տալիս սելֆիներ անել։

Աստղիկի խոսքով` իր մեքենայի հիմնական ուղևորը քույրն է, ով ևս վարում է մեքենան անհրաժեշտության դեպքում, և սիրելի ընկերները: Երգչուհին նշեց, որ վարելու ընթացքում սիրում է երաժշտություն լսել և բացահայտեց իր վատ սովորությունը՝ լսել բարձր հնչողությամբ:

Ինչպես հայտնի է, շատ կին վարորդներ մեքենայում հասցնում են անել կիսատ թողած գործերը՝ շպարը թարմացնել կամ աշխատանքային եռուզեռի արանքում ընդմիջել: Աստղիկն ասում է, որ այս տեսանկյունից ավելի զուսպ է. «Բարսելոնայում վարելիս միգուցե ճանապարհների երկար լինելու պատճառով, երբեմն, ստիպված զուգահեռ սնվում եմ, բայց Երևանում վարելիս, հավանաբար, միայն սուրճն է, որ ղեկին կարող եմ հանգիստ վայելել, դա ևս անում եմ ժամանակի սղության պատճառով»:

Աստղիկը թվարկեց նաև իրերը, որոնք մշտապես իր մեքենայի մեջ են։ «Սիրելի կատարողների դիսկո-դարան, օծանելիք, իմ ձայնասկավառակներից, և այն ամսագրերից, որոնց շապիկին եղել եմ ես, վերջինները հիմնականում նվիրելու նպատակով պահվում են մեքենայիս մեջ»,- եզրափակց երգչուհին: