Քրիստինա Եղոյանի և Դավիթ Աֆրիկյանի սիրո պատմությունը` նոր տեսահոլովակում

Դերասանուհի Քրիստինա Եղոյանը մոտ մեկ տարի առաջ սկսեց ակտիվորեն զբաղվել նաև երգչուհու կարիերայով։ Այսօր Քրիստինան նոր տեսահոլովակ կներկայացնի իր երկրպագուների դատին։ Մինչև այդ նա Tert.am Life–ին պատմել է նոր աշխատանքի մասին և տրամադրել լուսանկարներ նկարահանման հրապարակից։

«Երգս այն մարդկանց մասին է, ովքեր իրենց կյանքում ունեն մեծ սեր, գեղեցիկ պահեր ու անփոխարինելի զգացողություններ: Այն զույգերի մասին է, որոնք պարզապես «շնչել» չեն կարողանում առանց իրար, իրարից հեռու օդը չի հերիքում։ Երգս հենց այդպես էլ կոչվում է` «Օդս չի հերիքում»,– պատմեց Քրիստինան։

Երգչուհու նոր կատարման  հեղինակն Արման Անտոնյանն է։ Տեսահոլովակը նկարահանել է  Կարեն  Ամյանը, պրոդյուսերն Արմեն Պետրոսյանն է։ Տեսահոլովակում  ներկայացված է զույգի սիրո պատմություն, որը սահմաններ չի ճանաչում։

Օրեր առաջ Քրիստինան լուսանկար էր հրապարակել դերասան Դավիթ Աֆրիկյանի հետ, ինչը տարատեսակ քննարկումների տեղիք էր տվել, մինչդեռ սիրային լուսանկարը նկարահանման հրապարակից էր։

«Տեսահոլովակում հերոսը ապրիլյան պատերազմի մասնակից է, ով պատերազմից հետո ունի շարժողական խնդիր, սակայն այդ խնդիրը չի խանգարում զույգի լիակատար երջանկությանը: Տեսահոլովակում ներկայանում ենք ես և դերասան Դավիթ Աֆրիկյանը, այլ մասնակիցներ չկան,որովհետև ուզում ենք ներկայացնել զույգին արտաքին աշխարհից կտրված. բացի իրարից նրանց աշխարհում ոչինչ ու ոչ ոք պետք չէ լիակատար երջանկության համար: Ուզում եմ բոլորը հասկանան, որ անկախ նրանից, թե ինչ խնդիր ունի իր կողակիցը, միևնույն է, յուրաքանչուրս պարտավոր ենք սիրել և ընդունել նրան այնպիսին, ինչպիսին կա»,– նշեց Քրիստինան։

Դեռ մեկ տարին չի բոլորել, ինչ Քրիստինան սկսել է ակտիվ ներկայանալ նաև որպես երգչուհի։ Նրանից հետաքրքրվեցինք, թե ինչ արդյունքներ է գրանցել այս ընթացքում, որքանո՞վ է հաջողված համարում իր` երգչուհու կարիերան. «Բնականաբար յուրաքանչուրս ունենք մեր կարծիքը և գնահատականը մեր արած աշխատանքի վերաբերյալ, սակայն ինքս երբեք   գնահատական չեմ տա իմ մասնագիտական որևէ հարցին, որովհետև դա պետք է անի իմ հանդիսատեսը: Ես միայն շատ ուշադիր հետևում եմ նրանց կողմից հնչած յուրաքանչուր մեկնաբանությանը, բոլորի կարծիքը կարևորում եմ,որովհետև նույնիսկ խիստ քննադատող մեկնաբանության մեջ կարող է լինել ճշմարտություն, որի մասին ես չէի մտածել նախքան աշխատանքը հանրայնացնելը»։

Նոր աշխատանքից երգչուհին միայն մեկ ակնկալիք ունի մնալ միշտ սիրված և սպասված հանդիսատեսիս կողմից: