«Ոսկե դպրոց»-ից Գոշի նոր տեսահոլովակի մանրամասներն ու հերոսուհին

Երիտասարդ երգիչ, դերասան Գոշ Հակոբյանը, ով հեռուստադիտողներին ներկայանում է «Ոսկե դպրոց» սիթքոմում, վաղը  կներկայացնի նոր տեսահոլովակ՝ նկարահանված «Սրտիս հասցեն» երգի հիման վրա: Գոշը Tert.am Life-ին տրամադրել է  լուսանկարներ տեսահոլովակի նկարահանման հրապարակից ու բացել սյուժետային որոշ փակագծեր:

Նա նշեց, որ տեսահոլովակի հերոսուհին սիթքոմի իր խաղընկերուհին` Եվա Զոհրաբյանն է. «Տեսահոլովակում մենք  հանդես են գալիս հենց «Ոսկե դպրոցի» կերպարներով: Կարելի է ասել, Դավիթ-Անի և Դավիթ-Մաշա սիրային գծերի կարճ, սեղմված տարբերակն է, բայց նույնիսկ այն մարդը, ով ծանոթ չէ սիթքոմին, տեսահոլովակը դիտելով պատկերացում կկազմի՝ ինչ կատարվեց կամ ինչ է լինելու: Տեսահոլովակում կան դրվագներ, որոնք արդեն եղել են սիթքոմում, բայց ռեստավրացիայի են ենթարկվել»:

Տեսահոլովակի ռեժիսորը «Ոսկե դպրոցի» ռեժիսոր Դավիթ Զոհրաբյանն է: Գոշը նշեց, որ տեսահոլովակի մտահղացման համահեղինակ է, բայց ի սկզբանե երգը սիթքոմի սյուժետային գծով մատուցելու նպատակ չեն ունեցել: Գաղափարն ավելի ուշ է առաջացել։ «Քանի որ սիթքոմը որոշակիորեն իր լսարանն ունի, որն արդեն իսկ հետաքրքրված է այդ կերպարներով, դա ավելի խելացի քայլ էր նոր երգը սիրված սիթքոմի մոտիվներով ներկայացնելը,-ասաց նա և ավելացրեց, որ տեսահոլովակի նկարահանումները տևել են երկու օր և իրականացվել են հենց սիթքոմից հայտնի վայրերում, այդ թվում` դպրոցում։ –Մտածեցինք, որ նոր վայրեր ընտրելն ավելորդ կլինի և  որոշեցինք նկարահանումներն անել հեռուստադիտողին արդեն ճանաչելի և հոգեհարազատ դարձած տարածքներում»:

Տեսահոլովակի պրեմիերան տեղի կունենա հենց սիթքոմի այս եթերաշրջանի 14-րդ սերիայի շրջանակում` հինգշաբթի` ժամը 21:00-ին, «Արմենիա Պրեմիումի» եթերում, այնուհետև հասանելի կլինի նաև երգչի՝ Յութուբի պաշտոնական ալիքում: Մեկուկես տարվա երաժշտական գործունեության ընթացքում սա Գոշի երրորդ տեսահոլովակն է: «Սրտիս հասցեն» երգի երաժշտության հեղինակը Վարդան Գալստյանն է, խոսքերը գրել է Գրիգոր Կյոկչյանը, գործիքավորումը կատարել է Մարտին Միրզոյանը: Այն մեղեդային երգ է, որը, երգչի խոսքով, դրական շեշտադրում ունի, բայց փոքր-ինչ թախծելու առիթ էլ կտա ուկնդրողներին: Գոշից հետաքրքրվեցինք՝ իրական կյանքում իր սրտի հասցեն արդեն բնակեցվա՞ծ է, թե ոչ, ինչին նա արձագանքեց. «Որքան էլ, որ կուզեի սրտիս հասցեատեր լիներ, բայց չկա: Երբ Կյոկչյանն առաջարկեց երգի այդ վերնագիրը, այն միանգամից սիրտս մտավ»:

Հարցին, դժվար չէ՞ երգել սիրո մասին և փոխանցել էմոցիաները՝ սիրահարված չլինելով, Գոշը նկատեց. «Ընդհանրապես, ստեղծագործող մարդու համար դա կարևոր հանգամանք է և անմիջական կապ ունի ստեղծագործության հաջողության հետ։ Երբ սրտանց ես գրում երգը, ունկնդիրը հաստատ զգում է: Հնարավոր է՝ մի օր սիրահարվեմ կամ սիրեմ և ինչ-որ բան փոխվի, բայց դա արդեն ոչ թե ես, այլ ունկնդրողը կհասկանա»: 

Գոշի խոսքով` չնայած դերասանական գործունեությանը, երգն իր համար առաջնային տեղում է։ Նա հույս հայտնեց, որ սիրո մասին իր նոր աշխատանքը շատերին հոգեհարազատ կդառնա: