«Ամուսինս իր կյանքում ամենից շատ Տաթևին է սիրում». Հասմիկ Կարապետյանը` ընտանեկան կյանքի, ամուսնու հետ վեճի առիթի և Կանադայում ապրելու բարդության մասին

Երգչուհի Հասմիկ Կարապետյանը շուրջ վեց ամիս է՝ ընտանիքի հետ Կանադայում է բնակվում: Երգարվեստում հարաբերական դադար վերցրած երգչուհին այս շրջանում իրեն ամբողջությամբ նվիրել է ամուսնուն ու դստերը: Tert.am Life-ի հետ զրույցում երգչուհին պատմել է Կանադայում իր առօրյայի, դստերը մեծացնելու բարդ, բայց հաճելի պարտավորության, Հայաստան վերադառնալու ծրագրերի մասին:

Հասմիկն անկեղծացավ, որ թեև Կանադա մեկնել են ժամանակավորապես՝ պայմանավորված ամուսնու աշխատանքով, միևնույն է, ինքը մեծ դժվարությամբ է համակերպվել այնտեղ ապրելու մտքի հետ:

«Ընտանիքի՝ միասին լինելու գաղափարը դրական է թե՛ ամուսինների, թե՛ երեխայի համար։ Չնայած այն փաստին, որ եկածս օրվանից միտքս, սիրտս ու հոգիս Երևանում են, շատ մեծ կարոտախտ եմ զգում,  այս ամենի ժամանակավոր բնույթ ունենալն օգնում է, որ ավելի հեշտ և թեթև տանեմ իրականությունը: Կանադայում իմ առօրյան հիմնականում անցնում է ընտանիքիս հետ: Բալիկիս եմ մեծացնում, հոգ տանում նրա մասին։ Դեռ ոչնչով չեմ կարող զբաղվել, քանի որ ընտանիքի հոգսը ինքն իրենով արդեն շատ ժամանակ և ջանքեր է պահանջում,- ասաց երգչուհին և տեղեկացրեց, որ  հունիսի սկզբին ընտանիքի հետ վերադառնալու են Հայաստան։ –Շատ ոգևորված եմ վերադառնալ արդեն նոր Հայաստան: Կարոտել եմ ընտանիքիս և բոլոր ընկերներիս, մթնոլորտը, որն ինձ համար անփոխարինելի է: Ուր էլ լինեմ, մեկ է, ինձ օտար եմ զգում: Կարոտել եմ Երևանս, փողոցներն ու Հայաստանի բնությունը, մարդկանց ջերմ տեսակը, որը, ի դեպ, որևէ տեղ չկա»:

Հասմիկ Կարապետյանը մայր լինելու հաճելի ու պարտավորեցնող կարգավիճակում հայտնվեց հասուն տարիքում: Երգչուհին խոստովանեց, որ Տաթևի ծնունդը իրեն, լավ իմաստով, մեծացրել է. «Մայրությունը շատ հզոր երևույթ է: Այն ինձ իմաստնացրեց և փոխեց շատ ու շատ հայացքներ կյանքի և աշխարհընկալման իմաստով: Ես հիմա ամեն ինչին շատ ավելի հասուն և թեթև եմ նայում։ Իհարկե, առաջին հերթին մտածում եմ երեխայիս, հետո՝ իմ մասին: Կարծում եմ` հենց այդ պատճառով էլ դեռ պասիվ եմ արվեստում»:

Հասմիկն իրեն բնորոշեց որպես բծախնդիր մայրիկ, ով փորձում է  ուժերի ներածին չափով ամեն բան կատարյալ անել իր դստեր համար։ «Գերհոգնած եմ, իսկապես դժվար է մենակ, առանց մորս, հորս կամ քրոջս օգնության երեխա մեծացնել, սակայն գնում եմ առաջ: Երևի թե, կցանկանայի շատ հարցերում ավելի հանգիստ լինել, որովհետև մեկ է՝ չես կարող քո ուզած ձևով անել: Բոլոր երեխաներն էլ մեծանում են, պետք է գիտակցես, որ միևնույն է՝ ինչ-ինչ հարցերում հնարավոր է թերանաս, դա էլ նորմալ է»,– նկատեց երգչուհին:

Հասմիկի խոսքով` երեխայի խնամքի հարցում Շանթն իրեն օգնում է որոշ չափով, թեև աշխատանքային զբաղվածությունը հայրիկին խանգարում է իրեն հավասար կիսել այդ պարտականությունը։ «Ամուսինս արտակարգ հայր է՝ հոգատար, իր կյանքում ամենից շատ Տաթևին է սիրում և պատրաստ է ամեն ինչի հանուն աղջկա: Հնարավորության դեպքում շատ է օգնում ինձ: Երբեմն վիճում ենք Տաթևի հետ կապված այս կամ այն հարցերով, քանի որ տարբեր կարծիքներ ունենք, տարբեր երկրներում ենք մեծացել, վերջում հաղթում է ոսկե միջինը»,– պատմեց նա։

Երգչուհին նշեց, որ Կանադայում ստեղծագործելու համար ոչ ժամանակ, ոչ էլ ներուժ է ունեցել, բայց բավականին մեծ ասելիք է կուտակվել իր մեջ, որը  հանդիսատեսի հետ է կիսելու նոր երգերի տեսքով: Դրանցից մեկի մասին երգչուհին շտապեց հայտնել. «Դստերս նվիրված «Իմ Տաթևը» երգն արդեն պատրաստ է: Շատ մեծ ցանկություն ունեմ Երևան գալուց հետո տեսահոլովակ նկարահանել: Երգի երաժշտության և խոսքերի հեղինակը ես եմ: Գործիքավորումը Դերհովայինն է: Շատ գեղեցիկ և հուզիչ երգ է ստացվել: Տա Աստված, շուտով այն հանձնեմ լսարանի դատին, բոլորը լսեն ու տեսնեն»:

Ստեղծագործական պասիվ շրջանին նախորդող ժամանակատվածում Հասմիկը նաև որպես հաղորդավարուհի էր հանդես գալիս: Երգչուհին եթեր վերադառնալու հետ կապված ծրագրեր առայժմ չունի։

«Ժամանակը և կյանքը ցույց կտան` արդյոք նորից հանդես կգամ հաղորդավարուհու դերում, թե ոչ: Հստակ գիտեմ, որ շարունակելու եմ զբաղվել երգարվեստով, մնացյալը դեռ շատ անորոշ է», -ասաց նա և ավելացրեց, որ երկրպագուներն իրեն չեն հասցնի շատ կարոտել։ –Այս ընթացքում շատ կուտակումներ են հավաքվել հոգումս: Վստահ եմ, որ նոր երգեր պիտի ծնվեն շուտով: Երևի հայրենիքիս էներգիան պիտի նորից զգամ, որ ստեղծագործեմ: Աստված ինձ շնորհ է տվել և ամեն ինչ իր ժամանակին նորից ծնունդ կառնի»: