«Անվիճելի գեղեցկություն ունեցող կին էր պետք». Արսեն Սաֆարյանը` նոր տեսահոլովակի, հերոսուհու ընտրության և Էրիկի օգնության մասին

Երգիչ Արսեն Սաֆարյանը տևական դադարից հետո նոր տեսահոլովակ կներկայացնի իր երկրպագուների դատին։ «Էս ինչ սիրուն ես» կոչվող երգի երաժշտության հեղինակն Արսենն է, խոսքերը գրել է Ավետ Բարսեղյանը, գործիքավորումն արել է  Սերգեյ Հովհաննիսյանը, ով  զբաղվել է նաև երաժշտական պրոդյուսինգով։

Արսենն առաջին մանրամասներն ու լուսանկարները վստահել է Tert.am Life–ին ու նշել, որ նոր աշխատանքով ակնկալում է մարդկանց փոխանցել դրական, ուրախ էմոցիաներ։

«Ուրախ, թեթև երգ է, որը, կարծում եմ, հիթային տարրեր ունի։ Ի սկզբանե երգն այլ տեմպի մեջ էր, ավելի մեղեդային էր, սակայն Սերգեյի շնորհիվ դարձավ էլ ավելի ուրախ ու ռիթմիկ»,– ասաց երգիչը։

Արսենի կարծիքով`  երգը մասսայական դառնալու պոտենցիալ ունի, սակայն կանխատեսումներ անել նա զգուշանում է. «Իմ կարծիքով` հիթային երգ է։ Դեռ տեսահոլովակ չունենք, սակայն երբ ինչ–որ տեղ երգում եմ, տարբեր տարիքի մարդիկ միանգամից  սկսում են ձայնակցել ինձ։ Առաջին արձագանքները հուշում են, որ երգը կարող է ունենալ հաջողություն։ Միաժամանակ, որևէ մեկը չի կարող խոսել գործի հաջողության մասին, քանի դեռ այն չի ներկայացրել հանրությանը։ Երբեք հատուկ կոմերցիոն չեմ մտածել, նման շեշտադրումներ չեմ արել, սակայն շատ երգեր հիթային են ստացվել։ Ինձ համար շատ կարևոր է  այս աշխատանքը, որովհետև վաղուց նոր աշխատանք չէի ներկայացրել»։

Արսենը նշեց, որ աշխատանքին շատ է օգնել երգիչ Էրիկը, ով ձայնակցել է իրեն` երգելով  խոռային հատվածները։ «Ես շատ մտերիմ եմ Էրիկի հետ։ Երբ իրեն ցույց տվեցի երգի նախնական տարբերակը, իր օգնությունն առաջարկեց և ձայնակցեց ինձ, ինչի համար շատ շնորհակալ եմ»,– նշեց երգիչը։

Տեսահոլովակի ռեժիսորը Խաչիկ Եղոյանն է, օպերատորը Սուրեն Թադևոսյանը։ Տեսահոլովակը նկարահանվել է «Հայֆիլմի» տաղավարներից մեկում։ Սյուժետային գիծ, որպես այդպիսին, չկա։ Տեսահոլովակում Արսենին կտեսնենք կիթառով` իր կերպարին բնորոշ, իսկ հերոսուհու դերում կներկայանա  դերասանուհի Լուիզա Ղամբարյանը։

«Քննարկումների ժամանակ հասկացանք, որ երգն արդեն իսկ լսվող է և պետք չէ ծանրաբեռնել հնդկական կինոյի սցենարով։ Մեզ պետք էր կնոջ կերպար, որն անվիճելի գեղեցկություն  կունենա, գոնե, մեծամասնության համար։ Միաժամանակ կարևորում էինք, որպեսզի գեղեցկուհին նաև դերասանուհի լինի, որովհետև միայն գեղեցկուհիների հետ աշխատելը դժվար է:) Ընտրեցինք Լուիզա Ղամբարյանին, երգն ուղարկեցի նրան, պատմեցի մտահղացման մասին։  Երգը լսելուց հետո նա սիրով համաձայնեց և անշահախնդիր նկարահանվեց տեսահոլովակում»,– պատմեց Արսենն ու հավելեց, որ հաջորդիվ քասթինգի միջոցով ընտրել են երաժիշտների դերերում նկարահանվողներին ու անցել գործի։

Տեսահոլովակի ոճով զբաղվել է Արամ Նիկոլյանը։ Արսենի նոր աշխատանքը, գրեթե, պատրաստ է։ Մնացել են վերջին շտրիխները։ Երգիչը նախատեսում է աշխատանքը ներկայացնել մայիսի վերջին կամ հունիսի սկզբին։

Մինչև նոր տեսահոլովակի պրեմիերան` մայիսի 21–ին, Արսենը մենահամերգ կունենա Գյումրիում։ Այս համերգը նախատեսված էր դեռևս նախորդ ամիս, սակայն քաղաքական իրողություններով պայմանավորված երգիչը որոշել է հետաձգել այն։ Արսենն առաջիկայում համերգներ ունի Ռուսաստանի 3 քաղաքում, իսկ հուլիսին կմեկնի Լոնդոն` մասնակցելու միջազգային փառատոնի։

Հարցին` արդյոք սա նշանակում է, որ որոշակի  դադարից հետո ինքը վերադառնում է շոուբիզնես, երգիչը պատասխանեց. «Եթե աշխատանքները չկանգնեն, կնշանակի, որ սա վերադարձ էր։ Այս ընթացքում էլ չէի դադարում աշխատել, զբաղվում էի ակումբային գործունեությամբ, սակայն հանրային աշխատանքի առումով սա կարելի է վերադարձ համարել»,– եզրափակեց երգիչը։