«Ամուսնությունս սարերի հետևում չէ». Դիանա Գրիգորյանը՝ ընտրյալի հետ ծանոթության ու նշանվելու մասին

Դերասանուհի Դիանա Գրիգորյանը մայիսի 18-ին նշանադրվել է: Tert.am Life-ի հետ զրույցում դերասանուհին պատմեց իր կյանքի կարևոր օրվա, ընտրյալի հետ ծանոթության և սպասվող ամուսնության  մասին:

Դիանան, նշեց, որ անձնական կյանքը հանրայնացնել չի սիրում, թեև նշանադրվելու մասին դերասանուհին նախընտրել էր հայտնել սոցցանցերի իր անձնական էջերում՝ հրապարակելով արարողությունից լուսանկար, որում երևում էր տոնական տորթն ու զույգիբ ձեռքերը:  «Այդ լուսանկարը հրապարակեցի, քանի որ ուզում էի կիսվել իմ ուրախությամբ, նաև մարդկանց հայտնել, որ իմ կյանքում լուրջ փոփոխություն է եղել: Ես, իսկապես, շատ երջանիկ եմ և մաղթում եմ աշխարհի բոլոր աղջիկներին զգալ այդ երջանկությունը»,-ասաց դերասանուհին ու ավելացրեց, որ նշանադրության արարողությունը շատ մեծ չի եղել՝ նշել են ամենամոտ մարդկանց միջավայրում:

Ընտրյալի անունը և ինքնությունը բացահայտել Դիանան առայժմ չցանկացավ, միայն ասաց, որ սիրելին իր ասպարեզի հետ որևէ կապ չունի, այլ մասնագիտություն ունի, իրենից մեկ տարով մեծ է:

«Մենք ծանոթացել ենք անցյալ տարի։ Երբ պահը հասունացավ, նշանվեցինք: Նման դեպքերում ես հավատում եմ ճակատագիր ասվածին՝ մեր պարագայում ոչինչ պատահական չի եղել: Պարզապես, պիտի ճիշտ ժամանակին հանդիպես ճիշտ մարդու, մնացած ամեն ինչ, ինքնըստինքյան, ստացվում է»,- ասաց Դիանան:

Դիանայի խոսքով` ընտրյալը նորմալ է վերաբերվում իր մասնագիտությանը, դերասանական գործունեությանը, որևէ արգելք չի ստեղծել այդ հարցում: «Ինչպես ցանկացած աղջիկ, ինքս ինձ համար այս պահին ավելի շատ կարևորում ու տեղ եմ հատկացնում իմ անձնական կյանքին, ընտանիք կազմելուն»,- ասաց նա ու ավելացրեց, որ այս փուլում գործնական դադարի մեջ է:

Նրանից հետաքրքվեցինք, թե ե՞րբ են նախանշել պսակադրության արարողությունը. «Ամուսնությունս սարերի հետևում չէ, այս տարվա ընթացքում կլինի»:

Դերասանուհին դեռ չի շտապում ընտրյալի հետ լուսանկարներ հրապարակել իր անձնական էջում: Հարցին, դա ի՞ր, թե՞ սիրելիի նախընտրությունն է, Դիանան պատասխանեց, որ դա իրենց համատեղ ցանկությունն է. «Ես, ընդհանրապես, չեմ սիրում հայտնվել ուշադրության կենտրոնում, ընտրյալս՝ նույնպես: Չգիտեմ, հետո մեր համատեղ լուսնակրաները կհրապարակե՞մ, թե՞ ոչ»:

Դիանան նշեց, որ ինչպես այս, այնպես էլ շատ այլ հարցերում ընտրյալի հետ միակարծիք են, թեև տարբերություններ էլ շատ ունեն։ «Շատ հարցերում էլ փոխլրացնում ենք իրար: Մեզ մոտ ամեն ինչ ճիշտ է ու ներդաշնակ»,-եզրափակեց նա: