«Սիրային այդ գծի ձևավորումն անակնկալ էր ինձ համար». «Էլենի օրագրի» Ռոբը` խաղընկերների հետ հարաբերությունների, մասնագիտական ուղու ու անձնական կյանքի մասին

Դեռ փոքր տարիքից մտապահված ցանկություն, որն ավելի ուշ վերածվեց նպատակի ու դարձավ հիմնական մասնագիտություն. երիտասարդ դերասան Պողոս Գույումջյանը, ով հեռուստադիտողներին ներկայանում է «Էլենի օրագիրը» սերիալում, ասում է, որ փոքր հասակից է ընտրել մասնագիտական այս ճանապարհը, թեև իր ընտանիքում դերասաններ չկան:

Tert.am Life-ի հետ զրույցում Պողոսը խոսել է սիրելի մասնագիտության, թատրոնում խաղալու, Ռոբի կերպարում ներկայանալու մասին և կիսվել անձնական կյանքի մանրամասներով:

«Երևի թե, տատիկիս դաստիարակության շնորհիվ է ինձ գրավել դերասանի մասնագիտությունը: Նա ուսուցչուհի էր և հաճախ էր դպրոցում տարբեր հանդեսներ կազմակերպում, հեքիաթներ բեմադրում, ես էլ մասնակցում էի: Այդ ժամանակվանից էլ հասկացա, որ հետագայում պետք է զբաղվեմ դերասանի մասնագիտությամբ: Ծնողներս իմ որոշումը ողջունեցին ու օգնեցին, որ ես հասնեմ նպատակիս»,-ասաց Պողոսը:

Թատերական ինստիտուտի ավարտական կուրսի ուսանողը նշեց, որ այս շրջանում զբաղված է նաև դիպլոմային ներկայացման փորձերով: Պողոսը պատմեց, որ սիրելի մասնագիտությունից չի կտրվել նաև բանակում ծառայելու ընթացքում. «Այդ ընթացքում լինում էին КВН–ի խաղեր, մշակութային տարբեր միջոցառումներ, որոնցում ներկայանում էի: Կարելի է ասել, միշտ իմ մասնագիտական ռիթմի մեջ եմ եղել, անհամբեր սպասում էի՝ երբ եմ զորացրվելու ու շարունակեմ ուսումս»:

Այս շրջանում, ուսմանը զուգահեռ դերասանը ներկայանում է նաև Մալյանի անվան թատրոնում, որտեղ խաղում է «Ատամնաբույժը՝ նորեն» ներկայացման մեջ: Թեև արդեն երկու տարի է` դերասանը համագործակցում է «Շանթ» հեռուստաընկերության հետ և նկարահանվել է «Սահմանին 2», «Օտարը» սերիալներում, Պողոսին  ճանաչում բերեց «Էլենի օրագիրը» սերիալը: Նա նշեց, որ սերիալներում հայտնվել է քասթինգի մասնակցելուց հետո: «Էլենի օրագրում» Պողոսը մարմնավորում է Ռոբին: Բացասական կերպարում հանդես գալը, նրա կարծիքով, ավելի բարդ է:

«Ռոբի կերպարն իր բնավորության գծերով, արարքներով, ինձ հետ ընդհանրապես կապ չունի։ Չնայած դրան, ես ըմբռնեցի իմ դերն ու կարողացա արագ մտնել կերպարի մեջ: Հաճելի է, որ մարդիկ հավանում են խաղը՝ չնայած կերպարի բացասական լինելուն և քեզ չեն նույնացնում քո հերոսի հետ: Իհարկե, նաև հակառակ մոտեցումը կա, բայց ես ըմբռնումով եմ մոտենում բացասական մեկնաբանություններին: Ռոբը շատ բացասական կերպար է: Ճիշտ է, ես արդարացում չեմ գտնում իր արած քայլերին, բայց կարծում եմ, որ այդ ամենն իր հիմքն ունի, դա գալիս է նրա մեջ կուտակված նախանձից, որ ինքը չունի այն ամենը, ինչ ունի դիմացինը, չի ապրում այնպես, ինչպես օրինակ՝ Մաքսը»,- ասաց նա:

«Էլենի օրագրում» սիրային գծերից մեկն էլ Ռոբ-Իզա զույգի միջև է ծավալվում: Պողոսի խոսքով` Լիա Զախարյանի կերպարի հետ սիրային գծի ձևավորումը, անակնկալ էր նաև իր համար. «Սկզբում մտածում էի, որ Ջենիի հետ սիրային գիծ կբացվի, բայց իրադարաձությունները զարգացան Իզայի հետ, քանի որ իրենք շատ լավ են հասկանում իրար»:

Նա նշեց, որ սերիալի խաղընկերների հետ ոչ միայն գործնական, այլև ընկերական հարաբերություններ է հաստատել։ Թեև չցանկացավ ընկերներից որևէ մեկի անունն առանձնացնել, ասաց, որ հաճախ են առիթներ ունենում հավաքվելու նաև նկարահանման հրապարակից դուրս:

Պողոսի խոսքով` թե՛ թատրոնում, թե՛ հեռուստատեսությունում անընդհատ մասնագիտական նոր հմտություններ է ձեռք բերում: «Բարեխճողրեն կատարում եմ իմ աշխատանքը: Ես աշխատում եմ սիրով։ Որքան էլ հոգնեցուցիչ կամ ծանր իրավիճակներ ստեղծվեն, չեմ ընկճվում: Երբ նոր էի ընդունվել, մի շրջան կար, որ մինչև ուշ գիշեր փորձեր էինք անում, բայց ես չէի հոգնում, փոխարենը սպասում էի՝ հաջորդ օրը նորից բեմ բարձրանալուս»,-ասաց նա:

22-ամյա դերասանն անկեղծացավ, որ ավելի վաղ տարիքում, իրեն փորձել է այլ աշխատանքի մեջ. «Շատ կարճ ժամանակով, ընդամենը մեկ ամիս առևտրով եմ զբաղվել, բայց իմ հիմնական աշխատանքը սկսել եմ դերասանությունից: Ես չեմ սիրում պարապ մնալ, քանի որ ինչպես ասում են՝ աշխատանքը գեղեցկացնում է մարդուն:) Դեռ իմ մասնագիտությամբ եմ փորձում առաջ գնալ, ոլորտս փոխելու մտադրություն չունեմ, ապագայում ինչպես կդասավորվեն հանագամանքները, չեմ կարող ասել, բայց կարծում եմ, որ այս տարիքում  և իմ ներկայիս կարգավիճակում իմ վաստակածն ինձ բավականացնում է, իհարկե, երբ արդեն կազմեմ իմ սեփական ընտանիքը, պետք է մտածեմ ֆինանսապես ավելի կայունանալու մասին»:

Անդրադառնալով անձնական կյանքին՝ Պողոսը նշեց, որ մինչ այս ունեցել է հարաբերություններ, սակայն ոչ երկարատև, իսկ երկրորդ կեսի փնտրտուքներով չի զբաղվում, կարծում է՝ կյանքն ու ժամանակը այդ հարցը կլուծեն:

«Որպես այսպիսին սիրտս զբաղված չէ, ընտրյալ չունեմ: Ես նման բաները չեմ ծրագրում։ Կարծում եմ՝ լինում է այն, ինչ պետք է լինի: Ես դրանով եմ առաջնորդվում,- ասաց նա և ավելացրեց, որ հակառակ սեռի մեջ ամենից շատ կարևորում է անկեղծությունն ու բարի լինելը։ –Ինձ համար կարևոր է, որ երկրորդ կեսս լինի հավատարիմ, ինձ հասկացող և սիրող մարդ՝ ամենակարևորը, մաքուր սրտով:  Ես չեմ ընդունում, երբ մարդու հետ շփվում ես նյութական ակնկալիքներով»: