«Այնպիսի նկարներ էին գտել, որոնք միշտ թաքցրել եմ». Լիլիթ Բաբասյանը հյուրընկալվել է Մալախովի հաղորդմանը

18:27 • 25.05.18

Շոուբիզնես

Դերասան Ալեքսանդր Բաբասյանի կինը՝ դիետոլոգ Լիլիթ Բաբասյանը, հյուրընկալվել է Россия 1 հեռուստաալիքով Անդրեյ Մալախովի Прямой эфир հաղորդմանը, որի շրջանակում պատմել է, թե ինչպես է կարողացել նիհարել։ Դիետոլոգը Tert.am Life-ին պատմեց, որ շոկի մեջ էր, երբ իրեն առաջարկեցին մասնակցել հաղորդմանը։

«Երբ ինձ գտան և հրավիրեցին հաղորդմանը, մտածում էի՝ ինչ-որ մեկն ինձ խաղարկում է, սա կատակ է։ Հասկացա, որ այդպես չէ, երբ ինձնից խնդրեցին անձնագրիս տվյալներն ու տոմս գնեցին, որպեսզի մեկնեմ Մոսկվա,- ասաց Լիլիթն ու հավելեց, որ Մոսկվա մեկնելու ծախսերը հոգացել է հեռուստաընկերությունը։ -Հիացած էի իրենց ցուցաբերած վերաբերմունքով։ Ամեն ինչ շատ կազմակերպված էր։ Քեզ այնպես էին վերաբերում, կարծես, աստղ լինեիր»։

Լիլիթը հաղորդման ժամանակ պատմել է, թե ինչպես է ազատվել ավելորդ կիլոգրամներից, կիսվել սեփական փորձով։

«Ժամանակին ես դեղահաբեր էի խմում, ոչինչ չէի ուտում։ Արդյունքում այնքան էի հյուծվել, որ մեքենա վարելիս ուշագնաց էի եղել ու վթարի ենթարկվել։ Ապաքինվելուց հետո որոշեցի, որ այլևս երբեք այդպես չեմ անելու։ Հիմա նույնիսկ շատ սուր գլխացավի դեպքում դեղահաբ չեմ օգտագործում, իսկ նիհարելու համար ընտրեցի առողջ սնվելու տարբերակը։ Շատ ուրախ եմ, որ ինձ հյուրընկալեցին։ Ես եթերում շեշտը չէի դրել այն փաստի վրա, որ դիետոլոգ եմ, ինձ գովազդելու խնդիր չունեի, պարզապես, ուզում էի իմ խնդրով մարդկանց պատմել իմ փորձի մասին»,- պատմեց նա։

Հաղորդման ժամանակ Լիլիթին անակնկալի են բերել։ Գտել են նրա համակուրսեցուն, ում չէր տեսել 7 տարի։ Վերջինս տաղավարում պատմել է Լիլիթի նախկին տեսքի մասին։

«Ես իմ նախկին լուսանկարների մեծ մասը պատռել եմ։ Արխիվային նկարներ հրապարակել եմ, սակայն ավելի վատերը կան։) Դասընկերներիս, կուրսընկերներիս միջոցով այնպիսի նկարներ էին գտել, որոնք միշտ թաքցրել եմ, շոկի մեջ էի։ Այնուամենայնիվ, համաձայնեցի, որ հրապարակեն, միայն մի տեսանյութ եմ խնդրել չհրապարակել, որը դպրոցական տարիներից էին գտել»,-ասաց Լիլիթը։

Դիետոլոգը մեծ ոգևորությամբ է մասնակցել հաղորդմանը, որտեղ ձեռք է բերել նոր ծանոթություններ և անհամբերությամբ սպասում է այսօրվա եթերին։