«Երազանքներն, ամեն դեպքում, կատարվում են». Սաթենիկ Հազարյանը՝ Կաննի կինոփառատոնին մասնակցելու և Պենելոպե Կրուզի հետ կարմիր գորգով անցնելու մասին

Դերասանուհի Սաթենիկ Հազարյանն օրերս վերադարձել է Կաննի կինոփառատոնից։ Նա իր տպավորությունների մասին պատմել է Tert.am Life-ին և նշել, որ անմոռանալի, հագեցած ու տպավորիչ օրեր է ունեցել:

Սաթենիկը մեկնել էր Կանն` ՀՀ մշակույթի նախարարության հայտարարած մրցույթում հաղթած կինոնախագծերից մեկի` Արտյոմ Բաղդասարյանի՝ «Իններորդ ալիք-Այվազովսկին» ֆիլմի պատվիրակության կազմում` որպես հերոսներից մեկի դերակատար:

«Ֆիլմը պատմում է Այվազովսկու մասին։ Ես ներգրավվել եմ դեռ տարիներ առաջ անցկացված քասթինգին մասնակցելուց հետո:  Չեմ կարող սցենարային բացահայտումներ անել, բայց իսկապես բավականին մեծ նախագիծ է ՝ և՛ բյուջետային, և՛ խաղարկային առումով: Այն լինելու է տարբեր երկրների համատեղ աշխատանք: Կաննի կինոշուկայում եղան բազմաթիվ գործնական հանդիպումներ, նախնական պայմանավորվածություններ ձեռք բերվեցին և հիմա արդեն ֆիլմի ֆինանսավորումը գտնելու ընթացքի մեջ ենք»,- ասաց դերասանուհին:  

Սա դերասանուհու առաջին շրջագայությունը չէր Եվրոպայում, բայց ասում է`ամենատպավորիչն էր: Նա նշեց, որ եղբայրը Ֆրանսիայում է ապրում և իրենց համար էքսկուրս է կազմակերպել դեպի Մոնակո, Մոնտե Կառլո: Այնուամենայնիվ, ամենավառ տպավորությունները Սաթենիկը քաղել է հենց Կաննից: Դերասանուհին անկեղծացավ, որ որ կինոփառատոնին հայտնվելն ու կարմիր գորգով քայլելը եղել է իր մանկության երազանքներից մեկը. «Երազանքներն ամեն դեպքում կատարվում են, և ես բոլորին ասում եմ՝ երազեք: Տպավորություններս հրաշալի են: Կարծում եմ՝ յուրաքանչյուր դերասան կցանկանար ներկա լինել, տեսնել ու զգալ այդ ամենը, որովհետև այն մշակույթը, պատրաստվածոթյունն ու շքեղությունը, որ կար այնտեղ, անբացատրելի է: Մենք էլ ունենք «Ոսկե ծիրան» կինոփառատոնը, բայց բոլորս էլ կուզեինք, որ դա նույնքան շքեղ լիներ, իհարկե, դա նաև մեծ գումարների հետ է կապված, բայց կարող ենք այդ շունչը հաղորդելու հնարավորություն ունենալ»:  

Դերասանուհին նշեց, որ հազիվ է կարողացել զսպել իր էմոցիաները, երբ կարմիր գորգին տեսել է հոլիվուդյան աստղ Քեյթ Բլանշետին ու քայլել Պենելոպե Կրուզի կողքով. «Ես տեսա ժյուրիին, որոնց թվում էին հոլիվուդյան աստղեր: Այս տարի արգելք էր դրվել, իրավունք չունեինք այնտեղ սելֆի անել: Լուսանկարիչներն իրենք էին հուշում՝ ինչ դիրք ընդունենք, ինչպես լուսանկարվենք կարմիր գորգին: Չէի հասցնում միաժամանակ  վայելել կարմիր գորգը, լուսանկարվել ու զգալ այն պահը, որ անցնում եմ Պենելոպե Կրուզի կողքով, տեսնում Քեյթ Բլանշետիին»:

Այդուհանդերձ, դերասանուհին հաջողացրել է լուսանկար ունենալ կարմիր գորգին, որտեղ հետին պլանում Կաննի կինոփառատոնի ղեկավարն է:

Սաթենիկը պատմեց, որ հնարավորություն է ունեցել ամեն երեկո մասնակցելու բացօթյա կինոդիտումների, որոնց ժամանակ ծովի ափին մեծ էկրաններին ցուցադրվել են փառատոնին մասնակցած բոլոր ժամանակների ֆիլմերը: Դերասանուհու ֆիտած առաջին ֆիլմը եղել է ճապոնացի ռեժիսոր Հիրոկաձո Կորեդանի «Խանութի գողերը» աշխատանքը, որն այս տարի  արժանացել է Կաննի բարձրագույն մրցանակին՝ «Ոսկե արմավենուն»։

«Այդ կինոդիտումները հրաշալի էին, հատկապես, կինոսերների համար: Իսկապես, ես վայելեցի ամեն վայրկյանը: Հասել էինք Մոսկվա, չէի ուզում շփվել, խոսել, որ ներսումս մնար այն հարստությունը, որ քաղել էի այդ օրերից: Վստահ եմ, որպես դերասանուհի, կկարողանամ վերարտադրել այդ ամենը։ Իսկապես, ներաշխարհդ հարստացնում է»,- եզրափակեց դերասանուհին: