«Երևի» սերիալից Նորայր Եղյանը՝ սիրելիից բաժանվելու, Քրիստինա Եղոյանի հետ մտերմության և աշխատանքի մասին

Դերասան Նորայր Եղյանը, ով հեռուստադիտողներին այս շրջանում ներկայանում է «Երևի», «Ավազե դղյակ» հեռուստասերիալներում, դեպի հեռուստատեսություն քայլերը սկսել է որպես հաղորդավար: Tert.am Life-հետ զրույցում Նորայրը խոսեց ինչպես իր գործունեության, այնպես էլ  անձնական կյանքի մասին։

Նորայրը պատմեց, որ ի սկզբանե նպատակ է ունեցել հաղորդավար դառնալ. «Մասնագիտությամբ դերասան եմ, բայց ընդունվեցի Թատերական ինստիտուտ, որպեսզի հաղորդավար դառնամ։ Մտածում էի, թե դա ամենաճիշտ դպրոցը կլինի ինձ համար, հետո սիրահարվեցի դերասանի մասնագիտությանը, էլ հնարավոր չէր կանգ առնել»: 

Ուսանողական տարիներին՝ մինչև 2015 թվականը, Նորայրն աշխատել է Կամերային թատրոնում, ավելի ուշ՝ մասնակցել է «Դար 21» հեռուստաընկերության հայտարարած քասթինգին ու աշխատել որպես հաղորդավար, այնուհետև հեռուստասերիալներում խաղալու հրավերներ է ունեցել:

«Սկզբնական շրջանում հրաժարվում էի շատ առաջարկներից, որովհետև չէի կարողանում հասկանալ՝ ինչը ինձ կտանի հաջողության: Առաջարկն ընդունելիս կարևորում եմ այն  հանգամանքը, թե ովքեր են նախագծի հեղինակաները, ինչպիսի թիմ է ներգրավված այնտեղ, ինչպես նաև սցենարն ու կերպարային գիծը, որ պետք  է տանեմ: Սկսեցի նկարահանվել Հանրային հեռուստաընկերության ֆիլմաշարերում, առաջին հեռուստասերիալը, որում հանդես եկա, «Դեպի երազանք» 25 մասանոց հեռուստասերիալն էր,  հիմա զբաղված եմ նախագծի երկրորդ եթերաշրջանում»,- ասաց նա: 

Վերջին շրջանում շատ է խոսվում Քրիստինա Եղոյանի ու Նորայր Եղյանի բարեկամական կապի մասին: Քննարկումների տեղիք են տվել դերասանի գրառումներն ու Քրիստինայի հետ համատեղ լուսանկարները, որոնցում Նորայրը Քրիստինային ներկայացնում է որպես իր քույրիկ: Խոսակցություններն առավել ակտիվացան, երբ պարզվեց, որ Քրիստինան ու Նորայրը ծնվել են միևնույն օրը՝ մայիսի 13-ին և շատերը նրանց դիտարկեցին որպես երկվորյակ. «Մենք նույն օրն ենք ծնվել և ունենք նման ազգանուններ` մեկ տառի տարբերությամբ, բայց մեր միջև ազգակցական որևէ կապ չկա, մենք ուղղակի միմյանց ասում ենք՝ որդեգրված քույր ու եղբայր»:

Դերասանի խոսքով` Քրիստինային որպես իր քույր ներկայացնելը պայմանավորված է դեռ ուսանողական տարիներից ձևավորված մտերմությամբ և ընկերական ջերմ հարաբերություններով: «Ես ու Քրիստինան սովորել ենք Թատերական ինստիտուտում, հետո երկուսս էլ ընդունվեցինք Կամերային թատրոն և ավելի մտերմացանք: Այնուհետև ես թատրոնից դուրս եկա, ինքը՝ նույնպես, մեր ճանապարհները որոշ ժամանակով բաժանվեցին, քանի որ այդ շրջանում չէի զբաղվում դերասանական գործով,-պատմեց Նորայրն ու ավելացրեց, որ մեկուկես տարվա դադարից հետո իրենց ընկերությունը շարունակվել է պատահական հանդիպումից հետո։ –Մենք հանդիպեցինք «Դեպի երազանք» նախագծում: Երբ ես մասնակցում էի քասթինգին, նա պետք է լիներ այն տեսարանում, որը փորձելու էի: Այդ պատահական հանդիպումով մեր կապն ավելի ամրապնդվեց, ընկերությունն ավելի ուժեղ դարձավ, սկսեցինք ավելի հաճախ հանդիպել»:

Նորայրը վստահ է հակառակ սեռի ներկայացուցիչների միջև կարող է լինել իրական ընկերություն, ավելին, ելնելով սեփական փորձից, նա վստահեցնում է, որ այդպես ավելի լավ է: Նա նշեց, որ ինքն ու Քրիստինան հաճախ են միմյանց խորհուրդներ տալիս:

«Եթե ես ունենում եմ առաջարկներ, առաջինը Քրիստինային եմ ասում այդ մասին, նա խորհուրդ է տալիս, թե որ տարբերակն ընտրեմ: Վերջին շրջանում ավելի շատ նրա երաժշտական գործունեության, տեսահոլովակների հետ կապված ենք քննարկումներ ունենում, որոշում, թե, օրինակ, ինչ հագուստ ընտրի: Եթե ես նվիրվում եմ մարդուն, մինչև վերջ եմ անում դա, նույնն էլ՝ Քրիստինան: Մեր ընկերության մեջ իսկապես այդպես է»,-ասաց նա:

Անդրադառնալով իր անձնական կյանքին` Նորայրը նշեց, որ ներկայումս հարաբերությունների մեջ չէ։ Նա հայտնեց, որ ինքն ու  պարուհի Սիլվի Մարդոյանը բաժանվել են։ «Մեր հարաբերություններն ընդհատվել են, բայց չեմ ցանկանում որևէ մեկնաբանություն տալ այդ թեմայի շուրջ»,-եզրափակեց դերասանը: