«20 տարի է՝ բեմում եմ և կարող եմ ինձ թույլ տալ նման երգեր կատարել». Սոնա Շահգելդյանը նոր տեսահոլովակ կներկայացնի

Երգչուհի Սոնա Շահգելդյանը շուտով նոր տեսահոլովակ կներկայացնի լսարանին, որը նկարահանված է մի քանի ժողովրդական երգերի՝ Ջիվանու «Քանքարավոր ընկերը»,  Ներսիկ Իսպիրյանի «Հայոց երկիրը», Անդրանիկ Սարկավագի «Վերցունկ տղեք ըզ հրացանը» և աշուղ Ռազմարի «Անցնինք Սասունը» միքսի հիման վրա: Երգչուհին Tert.am Life-ին տրամադրել է լուսանկարներ տեսահոլովակի նկարահանման հրապարակից և մանրամասներ ներկայացրել նոր աշխատանքի մասին:

Թեև Սոնան բազմիցս կատարել է ժողովրդական երգեր, այս ժանրի երգի հիմա վրա տեսահոլովակ ներկայացնելը երգչուհու առաջին փորձն է: Սոնան պատմեց, որ ժողովրդական երգի հիման վրա տեսահոլովակ նկարահանելու ցանկություն վաղուց  ուներ, երգն էլ ավելի վաղ էր ձայնագրվել:

«Ես շատ եմ սիրում ժողովրդական երգեր: Այդ երգերը չես կարող հենց այնպես կատարել, պետք է հասկանաս՝ ինչի մասին ես երգում, այդ ամենը պիտի ներսիցդ գա: Ես, երևի, կարողացել եմ այդ էներգիան, ոգին ներդնել երգում, քանի որ այդ ամենն ինձ փոխանցվել է գեներով` պապիկս ժողովրդական երգիչ է եղել, տատիկս էլ երգել է Թաթուլ Ալթունյանի խմբում»,-ասաց Սոնան և ավելացրեց, որ տեսահոլովակում ներկայացնելու է Մուշի, Սասունի ու Վանի ազգագրական երգերի շարան, որոնք նաև պարային տրամադրություն են ապահովում:

«Սյնպիսի երգեր եմ ընտրել, որոնք շատ տարածված չեն, բայց շատ սիրված են: Երգելու եմ Անդրանիկ Սարկավագի երգերից, ում հետ վաղուց եմ համագործակցում։ Նրա երգչախումբն էլ ձայնակցել է ինձ: Կատարում եմ նաև աշուղ Ռազմարի երգերից: Երբ խորհրդի համար զանգահարեցի նրան , ասաց `շնորհակալ եմ Սոնա ջան, կարևորն այն է, որ երգի բառերը չփոխես և կատարես այնպես, ինչպես կա։ Ես այդպես էլ երգել եմ, երգը բարբառով է գրված, փորձել եմ դա պահպանել: Երգի գործիքավորումն էլ շատ գեղեցիկ է արված, հին հայկական գործիքներ ենք օգտագործել»,- պատմեց երգչուհին։

Սոնան նշեց, որ տեսահոլովակի ռեժիսորը Ռուբեն Գրիգովն է, ում հետ համագործակցել է նաև իր նախորդ՝ «Իմ հավերժություն» տեսահոլովակի նկարահանման  ժամանակ: Նա նշեց, որ տեսահոլովակը նկարահանել են տաղավարում:

«Նկարահանումները տևել են մեկ օր: Պարզ, հասարակ աշխատանք ենք արել՝ զերծ ավելորդություններից: Տեսահոլովակում նկարահանվել են նաև պրոֆեսիոնալ պարողներ՝ Էդգար Ալեքսանյանը, Սուսաննա Հովհաննիսյանը և Անդրանիկ Հախնազարյանը: Նրանք ավանդական տարազներով չեն, ժամանակակից մոտեցում ենք ցուցաբերել՝ պահելով հայկական շունչն ու ազգային ոգին: Վստահել եմ ռեժիսորին, որովհետև նա իր աշխատանքը լավ է անում, -ասաց երգչուհին և ավելացրեց, որ տեսահոլովակում ինքը ներկայացել է երկու հագուստով։ –Առաջին կերպարում հանդես եմ գալիս Վանի ավանդական տարազով, որն ինձ տրամադրել է Վերգինե Ալավերդյանը, մյուս հագուստս դասական ոճում է, մոդելավորել է Գեղամ Շերոյանը»:

Սոնան հույս հայտնեց, որ նոր երգը կսիրվի ինչպես ավագ սերնդի, այնպես էլ՝ երիտասարդների կողմից: Երգչուհին կարևորեց, որ հին հայկական երգերը մոռացության չմատնվեն, կատարվեն գրագետ ու ճիշտ մատուցմամբ:

«Եթե մարդու մոտ մի բան չի ստացվում, պետք է դրանով չզբաղվի՝ լինի ջազ, ժողովրդական, թե այլ ժանրի երգեցողություն: Ես փորձում եմ տարբեր ոճերում հանդես գալ, դրա համար ճանապարհ եմ անցել, արդեն 20 տարի է՝ բեմում եմ և կարող եմ ինձ թույլ տալ նման երգեր կատարել:  Ամեն դեպքում ժողովուրդը տարբերակում է լավ ու որակյալ երաժշտությունը»,-եզրափակեց երգչուհին: 

]