Նրբագեղ ու շքեղ Տաթևիկ Հովհաննիսյանի երևանյան մենահամերգը

15:01 • 28.05.18

Շոուբիզնես

Այս օրերին Երևանում ջազային տրամադրություն է. 1990 թվականից ԱՄՆ–ում ստեղծագործող Տաթևիկ Հովհաննիսյանը կրկին Հայաստանում է։ Երգչուհին համերգային նոր ծրագիր ունի, որն առաջինը ներկայացրեց հայրենիքում, առաջին համերգն օրերս Գյումրիում էր, երկրորդը երեկ` Երևանում` Արամ Խաչատրյան մեծ համերգասրահում, որտեղ ևս մեկ մենահամերգ կկայանան մայիսի 30–ին։

Tert.am Life–ը ներկայացնում է երեկ կայացած համերգի մանրամասները։

Համերգը մեկնարկեց երաժիշտների 2 կատարմամբ, ապա բեմում հայտնվեց Տաթևիկ Հովհաննիսյանը` շքեղ ու նրբագեղ։ Տարիները 63-ամյա երգչուհուն չեն փոխում։ Ջազի լեդիի այցը Հայաստան մշտապես սպասված է։ Նրա համերգներն անցնում են լեփ–լեցուն դահլիճներում` հանդիսատեսի սիրով ու ջերմ ծափողջույններով ողողված։

Այս սերն է, որ երգչուհուն ստիպում է անհամբերությամբ սպասել հայրենակիցների հետ յուրաքանչյուր հանդիպմանը։

Երգչուհին համերգը մեկնարկեց երգով, ասում է` այդպես ավելի հեշտ է ցրել հուզմունքը, հետո սկսեց խոսել սիրելի հանդիսատեսի հետ։ «Ոչ միայն ես, այլև իմ երաժիշտները միշտ սիրով ու մեծ հաճույքով ենք վերադառնում Հայաստան։ Այն, որ ես սիրով եմ վերադառնում հայրենիք, նորմալ է, բայց իմ երաժշտներն էլ են սիրով վերադառում, որովհետև ջերմությունը, հյուրընկալությունը, երաժշտությունը, եղանակը... ամեն ինչ քաղցրությամբ է հիշվում։ Միշտ հարցնում են՝ չե՞նք գնալու Հայաստան»,- ասաց երգչուհին։

Նա նկատեց, որ 17 տարի է` համագործակցում է այս երաժիշտների հետ, տարիների ընթացքում նրանք շատ լավ են զգում հայկական երաժշտությունը, առաջարկում հայկական էլեմենտներ, որոնք անակնկալի են բերում իրեն. «Մեր երաժշտությունը բաղկացած է հայկական էթնիկ, բրազիլական ելևէջներից։ Իրենք այնպիսի բաներ են առաջարկում, մտածում եմ, որտեղի՞ց եկավ այս հայկական զգացողությունը»։

Երգչուհու նոր ծրագիրը հանդիսատեսն ընդունեց մեծ ոգևորությամբ, համերգի ավարտին հոտնկայս ծափահարությունները երգչուհուն ստիպեցին ևս մեկ անգամ վերադառնալ բեմ ու ևս մի երգ նվիրել հանդիսատեսին, հետո խոնարհվեց, շնորհակալություն հայտնեց ջերմության համար ու մինչև նոր հանդիպում ասաց։