«Միակ մարդը, ով գոհ չէ իմ վարելուց՝ Հայկոն է». Անահիտ Սիմոնյանը՝ ղեկին

Վաղուց արդեն կոտրված կարծրատիպ է, որ կանայք ղեկին զիջում են տղամարդկանց: Հայկական շոու-բիզնեսի հայտնի կին վարորդներն իրենց հերթին ամեն ինչ անում են դա ապացուցելու համար: 

Tert.am Life-ի՝ «Ղեկին կանայք են» շարքում այս անգամ զրուցել ենք երգչուհի, դիզայներ Անահիտ Սիմոնյանի հետ: Անահիտը պատմեց, որ մեքենա վարել սկսել է 18 տարեկանից և արդեն 10 տարվա վարորդական կենսագրություն ունի:

«Ես, կարծես, ծնված օրվանից գիտեի, որ մեքենա եմ վարելու. փոքր տարիքում շատ էի սիրում հեծանիվ վարել ու հասկանում էի, որ հետագայում նաև մեքենա կունենամ, որովհետև միշտ դեմ եմ եղել այն կարծրատիպին, որ կինը պետք է ղեկին չնստի: Երբ սովորում էի Կոնսերվատորիայում, հենց այդ ժամանակ մեքենա վարելու կարիքը զգացի ու գնացի ավտոդպրոց: Սովորեցի երթևեկության կանոնները և սկսեցի վարել», -ասաց երգչուհին:

Անահիտի առաջին ավտոմեքենան եղել է Volkswagen (Ժուկ) մակնիշի, որը հայրիկն էր նվիրել երգչուհուն: Ներկայումս նա վարում է  Mercedes CLA մակնիշի ավտոմեքենա, որը  ձեռք է բերել նոր վիճակում: Այն երգչուհու վարորդական կյանքում 4-րդն է. «Ներկայիս մեքենաս մեկ տարի առաջ նվիրել է ամուսինս: Այն, ինչպես և մյուս բոլոր մեքենաներս, սև է: Ես շատ եմ սիրում այդ գույնը: Սպիտակ մեքենաները համեմատում եմ սառնարանի հետ»: 

Անահիտն իրեն բնորոշեց որպես կարգապահ վարորդ, որը լավ տիրապետում է երթևեկության կանոններին. «Երևանում այնպիսի երթևեկություն է, որ եթե այստեղ կարողանում ես վարել, ամբողջ աշխարհում կարող ես մեքենա վարել: Այստեղ դու պետք է մտածես ոչ միայն քո վարելու մասին, այլև ուշադիր լինես հետևից եկող ու կողքից սլացող մեքենաներին: Դրա համար հարկավոր է ունենալ ճիշտ կողմնորոշվելու կարողություն: Այսօր շատ աղջիկներ վարել սովորում են ոչ թե ավտոդպրոց հաճախելով, այլ անհատական պարապմունքներով, որևէ մեկի օգնությամբ, հետո միանգամից սկսում են վարել, բայց կարծում եմ՝ դա շատ սխալ է: Ընդհանրապես յուրաքանչյուր վարորդ, լինի կին, թե տղամարդ,  պարտադիր պետք է ավտոդպրոց հաճախի, որպեսզի ոչ միայն իմանա ոտքը գազին սեղմելն ու արգելակելը, այլև երթևեկության կանոններին տիրապետի»:

Անահիտի խոսքով` սեփական օրինակով կարողանում է կոտրել կարծրատիպը, թե կանայք լավ վարորդներ չեն։ «Նույնիսկ մեքենայիս տղամարդ ուղևորներն ասում են, որ շատ հանգիստ են նստում իմ մեքենա, քանի որ ես լավ եմ վարում։ Իրականում այդպես էլ կա: Միակ մարդը, ով գոհ չէ իմ վարելուց, Հայկոն է: Նա է միշտ կողքից խոսում է ու ավելի շատ խանգարում»,– ասաց երգչուհին։

Նա հայտնեց, որ թեև ավտոպահեստամասերին, դրանց գործառույթներին ծանոթ է, բայց մեքենայի անսարքության դեպքում դիմում է մասնագետի օգնությանը: Երգչուհին փաստեց, որ իր մասնակցությամբ քիչ վթարներ են եղել: Վերջինը երեք տարի առաջ էր, բայց, Անահիտի խոսքով, մեկ այլ վարորդի անփութության պատճառով: Նման իրավիճակներում հայտնվելիս Անահիտն առաջինը զանգում է ամուսնուն՝ Հայկոյին: 

Հարցին, թե հայտնի լինելը որքանո՞վ է օգնում պետավտոտեսուչների հետ շփման հարցում, ե՞րբ են վերջին անգամ կանգնեցրել իր մեքենան, երգչուհին պատասխանեց. «Երկու ամիս առաջ, ամրագոտի չգցելու համար: Հաշվի առնելով ակտերիս քանակը՝ ես միշտ տուգանվում եմ ավելի շատ սխալ կայանելու պատճառով: Իհարկե, եղել են դեպքեր, երբ ինձ ճանաչել են, ընդառաջել են ու բարի ճանապարհ մաղթել, բայց կան նաև դեպքեր, երբ չեն ճանաչել և մենք կրկին շատ ջերմ ու նորմալ կերպով ենք բաժանվել»:

Երգչուհին նշեց, որ երևանյան խցանումների ժամանակ նյարդերը տեղի չեն տալիս, հիմնականում աշխատում է չվարել այն փողոցներով, որոնք խցանված չեն, իսկ երբ հայտնվում է խցանման մեջ՝ դիմում է երաժշտության օգնությանը:

«Միացնում եմ իմ սիրած երգերն ու վայելում: Թե ինչ երգ կլսեմ, կախված է տրամադրությունից, բնականաբար, երբ ունենում եմ մելանխոլիկ տրամադրություն, լսում եմ դանդաղ երգեր, հակառակ դեպքում, ռիթմիկ: Ռուսական էստրադան եմ շատ սիրում, նաև ռեպ,- ասաց նա և ավելացրեց, որ ամուսնու երգացանկից էլ երգեր ունի իր փլեյլիստում,– երբ շատ եմ կարոտում Հայկոյին, մեքենայիս մեջ իր երգերն եմ լսում»:

Անահիտի խոսքով` իր մեքենայի հիմնական ուղևորներն ընտանիքի անդամներն ու ընկերներն են: Երգչուհին ասաց, որ չի սիրում վարորդի կարգավիճակով երկար ճանապարհ գնալ: «Ամենաերկար ճանապարհը, որ գնացել եմ, դեպի Եղեգնաձոր է եղել, կեսից քունս տանում էր, հասկացա, որ ես երկար ճանապարհ չեմ կարողանում գնալ»:

Մեքենայում երգչուհին, ինչպես և շատ կանայք, հասցնում է շպարը թարմացնել և այլ գործողություններ անել. «Մեքենայիս մեջ նաև սնվում եմ, քանի որ ժամանակս քիչ է լինում ինչ-որ տեղ դա անելու համար»:

Երգչուհին ասաց, որ մեքենային արտաքինից դիզայենրական լուծումներ չի տվել և խոստովանեց, որ նման բաներ արել է առաջին մեքենայի դեպքում։

«Մեքենայիս մեջ մշտապես օրհնված խաչն է կախված և քանի որ աղջկա մեքենա է, միշտ օծանելիք կա»,-եզրափակեց երգչուհին: