Անահիտ Կիրակոսյանը կրկին մայր է դարձել. ծնողների հուզիչ հանդիպումը ժամանակից 1 ամիս շուտ ծնված փոքրիկի հետ

Դերասանուհի Անահիտ Կիրակոսյանը կրկին մայր է դարձել։ Նրա երկրորդ որդին լույս աշխարհ է եկել այս գիշեր՝ ժամը 1։10-ի սահմաններում` նախանշված ժամանակից 1 ամիս շուտ։ Փոքրիկի ծննդից հետո դերասանուհին առաջին հարցազրույցը տվել է Tert.am Life-ին ու պատմել զգացողությունների, երջանկության մասին և տրամադրել փոքրիկի առաջին լուսանկարները։ Ծնողները փոքրիկին տվել են Մհեր անունը։

«Հայկի ծննդից հետո նույն  զգացողություններն ունեի, ուղղակի հիմա ավելի փորձառու եմ, գիտեմ՝ ինչ է պետք երեխային։ Երբ ծնվելուց անմիջապես հետո երեխային դնում են կրծքիդ ու զգում ես, որ այդ անպաշտպան էակը, որը եկել է իր համար անծանոթ աշխարհ քո կրծքավանդակին հանգստանում է, հասկանում ես, որ կյանքը հենց դրանով է հրաշք»,– ասաց Անահիտը։

Մհերը լույս աշխարհ է եկել ժամանակից 1 ամիս շուտ, սակայն  Անահիտը հայտնեց, որ որևէ բարդություն չկա։ 2.9 կգ քաշով, 49 սմ հասակով ծնված փոքրիկը, մայրիկի խոսքով, ուղղակի որոշել է հիմա ծնվել. «Պտուղը 2 շաբաթ առաջ էր զարգանում և արդեն լիարժեք ձևավորված էր»։

Արտակի և Անահիտի ընտանիքում տոնական դարձած մայիսի 30–ը նրանց համար հուզառատ է եղել։ Գիշերն ամուսինը եկել է Անահիտին տեսակցության։ Ծնողների համար անակնկալ հիվանդասենյակ են բերել նաև նորածին որդուն։

«Երբ երեխային բերեցին մեզ մոտ, մի քիչ նվնվում էր, ես ու Արտակը սկսեցինք խոսել, ծանոթանալ իր հետ։ Պարզվեց, մեր ձայները շատ լավ  ճանաչում էր, անմիջապես հանգստացավ։ Բժիշկն ասում է` տեսեք ինչ է անում բնությունը»,– ասաց դերասանուհին ու շնորհակալություն հայտնեց բժշկական անձնակազմին` հոգատարության համար։

Անդրադառնալով ամուսնուն` Անահիտն ասաց, որ չի դադարում հիանալ նրա ուշադրությամբ, յուրահատուկ հայրիկ լինելով։ «Պատահական չէ, որ միշտ ասում եմ, որ ինձ համար նա աշխարհի ամենալավ հայրիկն է։ Տղամարդիկ որքան էլ սիրում են երեխային, նոր ծնված ժամանակ վախենում են մոտ գալ, գրկել նրան, ինչը պայմանավորված է տղամարդու և երեխայի թույլ կապով։ Արտակի դեպքում ամեն ինչ այլ է. մինչև երեխային ինձ մոտ բերելը, նա արդեն գնացել, տեսել էր փոքրիկին։ Երբ նրան բերեցին մեզ մոտ, միանգամից գրկեց, մերվեց, խոսեց իր հետ։ Երեխան միանգամից ընկալեց պապայի ձայնը, իրենց միջև մի ուրիշ կապ է ստեղծված»,– ոգևորությամբ ասաց մայրիկը։

Անահիտն ընդգծեց, որ ամուսինը շատ էր ցանկանում որդի ունենալ, որպեսզի Հայկիկը եղբայր ունենա։ 4 երեխաների դաստիարակությունը ծնողներին չի վախեցնում, ընտանեկան ջերմությունն ամեն բարդություն լրացնում է։

Ինչ վերաբերում է նորածնի եղբոր հետ քույրերի և եղբոր հանդիպմանը, այն փոքր–ինչ հետաձգվել է։ Ծնողները հավասար պայմաններ են ստեղծել 3 երեխայի համար։ Բոլորը միասին կհանդիպեն ընտանիքի նոր անդամին. «Շատ ոգևորված են, սպասում են Մհերին տեսնելուն։ Ցավոք,  Անուլիկս հենց երեկ սկսեց ջերմել, հիմա չի կարող գալ։ Լաուրաս շատ է ուզում գալ, բայց, երևի թե, 2 օրից կկայանա երեխաների հանդիպումը։  Հայկիկն էլ դեռ չի հանդիպել եղբորը, 3–ն էլ հավասար դիրքերում են»։

Անահիտն վստահություն հայտնեց, որ երեխաները տանն  իրենց անակնկալ կմատուցեն։ Իրենց ընտանքիում միմյանց համար հաճելի անակնկալներ պատրաստելը ավանդույթի պես մի բան են։