«Հարսի զգեստ հագնելն իմ երազանքն էր». Հասմիկ Վերդյանը՝ հարսի զգեստ հագնելու առիթի, ընտրյալի հետ հարաբերությունների և ամուսնության մասին

Դերասանուհի Հասմիկ Վերդյանն օրերս հարսի զգեստով ու ծաղկեփնջով լուսանկար էր հրապարակել, որի մեկնաբանությունների դաշտում դերասանուհուն բազմաթիվ շնորհավորանքներ էին հղել: Tert.am Life-ի հետ զրույցում Հասմիկն ասաց, որ լուսանկարն իրականում «Ռևիզոր» ներկայացումից հետո է արվել, միաժամանակ, բացահայտեց՝ ե՞րբ է պատրաստվում իրական կյանքում հարսի զգեստ կրել:

«Իմ երազանքն էր լուսանկար ունենալ հարսի զգեստով, քանի որ այդ հնարավորությունն ունեի, որոշեցի ֆիքսել պահն ու նկարը հրապարակեցի: Բազմաթիվ շնորհավորանքներ եմ ստացել, բայց պատասխանել եմ, որ դա ընդամենը դերակատարում էր»:

Այդուհանդերձ, մոտ ապագայում առիթ կլինի դերասանուհուն շնորհավորել իրական կյանքում ամուսնանալու կապակցությամբ: Հասմիկի խոսքով` ինքն ու ընտրյալը` Հենրին, որի հետ ընկերություն են անում արդեն 4 տարի, այս տարի կամուսնանան։ «Աշխատանքի բերումով ընտրյալս այժմ Ռուսաստանում է, հավանաբար, մի քանի ամսից կվերադառնա ու կսկսկենք մտածել այդ ուղղությամբ: Հարսանիք ասվածն ինձ համար ինքնանպատակ չէ, բայց հարսի զգեստ, ինչպես յուրաքանչյուր աղջիկ, երազում եմ հագնել»:

Հասմիկը նշեց, որ իրենից 1 տարով փոքր ընտրյալը մասնագիտությամբ ոստիկան է, բայց երկար ժամանակ է՝ աշխատում է շինարարական ոլորտում: Դերասանուհին հայտնեց, որ արդեն երեք ամիս է՝ սիրելին իրենից հեռու է գտնվում, ասում է՝ հեռավորության վրա սերն ավելի է ամրապնդվում։ «Մենք այս ընթացքում ավելի ենք մտերմացել, պարզապես, կարոտը շատ ուժեղ է, երբ սիրում ես, կարոտում ես: Երբ աշխատանքի մեջ ենք լինում, փոքր-ինչ ցրվում ենք ու մոռանում, որ իրարից հեռու ենք: Դա, կարծես, փրկօղակ լինի, բայց, միևնույն է, կարոտը խեղդում է»,– ասաց նա։

Հասմիկը վստահ է՝ բնավորության ու հայացքների որոշակի տարբերությունը, որ կա իրենց միջև, օգնում է ավելի հետաքրքիր հարաբերություններ կառուցել: Չնայած իրենց մասնագիտական ոլորտների տարբերոթյանը, Հասմիկը նկատեց, որ սիրելիներբևէ սահմանափակումներ չի դրել իր առջև: Ավելին՝ դերասանուհին ասաց, որ սիրելիի համար դերասանի մասնագիտությունը բավականին հետաքրքիր է դարձել:

«Նա, կարծես, ներգրավվել է իմ մասնագիտական գործունեության մեջ, հետաքրքրվում է իմ աշխատանքով: Զգում է, որ սիրով եմ անում իմ աշխատանքը, դա իր համար շատ կարևոր է: Չգիտեմ, ընտանիք կազմելու դեպքում, երբևէ կմտածե՞մ դերասանական աշխատանքից ինքնակամ հրաժարվելու մասին։ Կարծում եմ՝ ընտանիքն ու աշխատանքը փոխկապակցված են, մեկը մյուսին լրացնում են: Չեմ կարող միանշանակ ասել, որ ամենակարևորն ընտանիքն է կամ աշխատանքը»,-ասաց Հասմիկը:

Մինչ անձնական կյանքում կլինեն վերադասավորումներն ու կարգավիճակի փոփոխությունը, դերասանուհին շարունակում է ակտիվ գործունեություն ծավալել Հ. Պարոնյանի անվան երաժշտական կոմեդիայի պետական թատրոնում, որտեղ աշխատում է արդեն 10 տարի. «Բազմաթիվ ներկայացումներում եմ խաղում, իսկ այս փուլում զբաղված եմ նաև Երվանդ Ղազանչյանի բեմադրությամբ Արամ–Աշոտ Պապայանի՝ «Գնա մեռի, արի սիրեմ» ներկայացման մեջ, որը, հավանաբար, հանդիսատեսի դատին կհանձնենք սեպտեմբերին»:

«Մեղրամիս» հեռուստասերիալի ավարտից հետո Հասմիկը հեռուստատեսային նոր նախագծերում ներգրավված չէ։ Դերասանուհին ասաց, որ վերջերս մի առաջարկ է ստացել՝ նկարահանվելու 25 մասանոց հեռուստասերիալում, սակայն նկարահանումները դեռ չեն սկսվել:

«Դեռ այդ մեկ առաջարկն եմ ստացել, որտեղ ինձ բաժին ընկած դերը շատ հավանեցի: Ընդհանրապես, կարծում եմ, որ դերասանուհին հեռուստատեսային առաջարկների նկատմամբ ավելի զգուշավոր պետք է լինի և ամեն մանրուք հաշվի առնի, քանի որ հեռուստատեսությունը նաև դաստիարակչական գործառույթ ունի: Դու պետք է կարողանաս քո կերպարին, խոսքին հնարավորինս ճիշտ և նուրբ մոտեցում ցուցաբերել: Ես, որպես դերասանուհի, կցանականամ ավելի դաստիարակչական բնույթի հեռուստանխագծերում հանդես գալ»,- ասաց դերասանուհին և ավելացրեց, որ հիմնականում հեռուստատեսային նախագծերն են դերասանին հայտնիություն բերում և նպաստում, որ արդեն հայտնի ու սիրված դերասանի խաղին հետևեն նաև թատրոնում:

Այդուհանդերձ, Հասմիկը նշեց, որ երբևէ մտավախություն չի ունեցել, թե էկրաններին երկար ժամանակ չերևալով մոռացության կմատնվի հեռուստադիտողների կողմից։ «Ես իմ գործունեությունը սկսել եմ հենց թատրոնից, շատերն են ինձ այդտեղից բացահայտել և սիրել դեռ այն ժամանակ, երբ որևէ նախագծում չէի նկարահանվում: Ամեն դեպքում, եթե չլինի հեռոսւտատեսային աշխատանքը, միայն թատրոնի հոնորարով բավարարվելը, իսկապես, դժվար է: Շատ լավ կլիներ՝ թատրոնում այնպիսի աշխատավարձ ստանար դերասանը, որ իրեն հարմարվետ զգար ու հնարավորինս ապահովված»,-եզրափակեց դերասանուհին: