«Նախկին ամուսնուս հետ շփում չունեմ, բայց երեխայիս չեմ արգելում հանդիպել հորը» . Իվետա Եդիգարյանը՝ նորից ընտանիք կազմելու ցանկության և 11–ամյա դստեր մասին

Դերասանուհի Իվետա Եդիգարյանը հեռուստատեսային տևական դադարից հետո եթեր վերադարձավ աշնանը` «Անուղղելիները» սերիալով: Դերասանուհին ասում է, որ հասցրել էր կարոտել դերասանական աշխատանքը դեռևս այն ժամանակ, երբ ԱՄՆ-ում էր գտնվում: Tert.am Life-ը հետաքրքիր զրույց է ունեցել Իվետայի հետ, որի ընթացքում նա խոսել է ինչպես ներկայիս գործունեության, այնպես էլ ամուսնալուծությունից տարիներ անց ընտանիք կազմելու ցանկության ու դստերը միայնակ մեծացնելու դժվարությունների մասին:

Դերասանուհին ասաց, որ առայժմ իր կյանքում փոփոխություն չկա, սակայն ամուսնալուծությունից տարիներ հետո կյանքը վերադասավորելու ցանկություն ունի և չի բացառում կրկին ընտանիք կազմելը. «Դեռևս միայնակ եմ, բայց հնարավոր է՝ մի գեղեցիկ օր իմ կյանքում նորություն լինի, քանի որ կյանքն իսկապես լի է անկանկալներով, հենց դրանով էլ հետաքրքիր է: Ցանկացած մարդու համար էլ երբեք ուշ չէ կյանքը նորից դասավորելն ու ընտանիք կազմելը,-ասաց նա և ավելացրեց, որ ներկայումս նախկին ամուսնու հետ շփում չունի։ –Ժամանակին սիրել եմ, բայց հիմա չեմ էլ կարող ասել, որ ընկերներ ենք մնացել: Ոչ ընկերներ ենք, ոչ էլ թշնամիներ: Առհասարակ, աշխատում եմ շատ չշփվել նրա հետ: Որպես մարդ` մենք իրար չենք հասկացել, ինչպես լինում է նաև ընկերների, գործընկերների միջև»:

Իվետան, սակայն, չի սահմանափակել դստեր՝ Անգելինայի շփումը հայրիկի հետ, թեև նշեց, որ երեխայի խնամքի ու դաստիարակության հոգսերն ամբողջությամբ իր ուսերին են: «Աղջիկս, երբեմն, հանդիպում է հոր հետ, շփումը պահպանվում է։ Սխալ եմ համարում արգելք դնելը: Ամուսնալուծությունից հետո սկզբնական շրջանում շատ դժվարությունների հանդիպեցի, հիմա սկսել եմ չնկատել այդ դժվարությունները: Երբ դրանք հաղթահարում ես, դառնում են սովորական: Չեմ վախենում դժվարություններից, համառորեն շարունակում եմ առաջ գնալ ու ձգտել ավելիին՝ թեկուզ իմ երեխայի ապագայի համար: Եթե ճակատագիրն այդպես է դասավորվում, հոգ չէ, պետք է միշտ ձգտել առաջ»,-ասաց նա:

Իվետան նշեց, որ թեև միայնակ է մեծացնում դստերը, մայրը շատ հարցերում օգնում է իրեն. «Մայրս օգնում է դստերս դասապատրաստաման հարցում, ինչի շնորհիվ նա լավ գնահատականներ է ստանում: Ես էլ փորձում եմ, որքան հնարավոր է, շատ ժամանակ հատկացնել դստերս, եթե անգամ, երկու ժամ եմ ազատ լինում, նախընտրում եմ ժամանակս իր հետ անցկացնել: Հիմա ինքն արձակուրդում է, և ավելի հաճախ է ինձ հետ լինում, երբեմն էլ, ինձ հետ նկարահնման հրապարակ է գալիս»:

Սնգելինան շուտով կդառնա 11 տարեկան, արդեն որոշակի նախընտրություն ունի ապագա մասնագիտության հարցում՝ մայրիկի ճանապարհը շարունակել է ուզում: «Նա, ինչպես և շատ երեխաներ, փոքրուց երազում է դերասանուհի, երգչուհի դառնալու մասին, թեև դեռ հստակ չեմ կարող ասել, թե ապագայում ինչ մասնագիտություն կընտրի։ Ինքս չեմ ասում, որ, անպաման, պետք է ընտրի իմ ճանապարհը, եթե իր մեջ եղավ այդ տաղանդն ու շնորհը, անպայման կշարունակի,- ասաց Իվետան և ավելացրեց, որ դուստրն արդեն հասցրել է փոքրիկ դերակատարում ունենալ Ալբերտ Մկրտչյանի՝ «Լակոտը» ֆիլմում, որն առայժմ չի ցուցադրվել և մոնտաժային փուլում է գտնվում: –Ես դեռևս չեմ տեսել իր խաղը, երբ ֆիլմը կլինի էկրաններին, կկարողանամ կարծիքս հայտնել»: 

Արդեն 5 տարի է, ինչ Իվետան ԱՄՆ-ից վերադարձել է Հայաստան, բայց ստեղծագործական տևական դադարից հետո է առաջարկ ստացել նկարահանվելու Գոռ Վարդանյանի ֆիլմում: Իվետայի խոսքով, ավելի ուշ ստացավ իր համար անսպասելի, միաժամանակ, բավականին սպասված առաջարկ՝ նկարահանվել  «Վերվարածները» հեռուստասերիալի շարունակությունը հանդիսացող «Անուղղելիները» սերիալում:

«Մեր սերիալի անձնակազմի բոլոր անդամների մոտ միշտ կար նորից միասին լինելու, «Վերվարածների» շարունակությունը նկարահանելու ցանկություն: Հեռուստադիտողներից էլ էինք նմանատիպ բազմաթիվ արձագանքներ ստանում: Որևէ այլ ֆիլմում նկարահանվելու դեպքում այդքան չէի ուրախանա: Շատ լավ հիշողություններ կային դրա հետ կապված, բոլորս էլ մեր կերպարներին կարոտել էինք»,- ասաց դերասանուհին և ավելացրեց, որ իր համար դերասանի մասնագիտությունն առաջնային է:

«Ինձ միշտ ավելի շատ համարել եմ դերասանուհի, քան երգչուհի, չնայած հիմա ակումբում երգում եմ։ ԱՄՆ-ում նույնպես երգել եմ, բայց այնտեղ որևէ նախագծում չէի նկարահանվում։ Առանց դերասանական խաղի, կարծես,  ինչ-որ բան կիսատ ու դատարկ լիներ»,– ասաց նա ու հավելեց, որ Հայաստան կարոտած էր վերադարձել, սակայն կային նաև երևույթներ, որոնք իրեն նյարդայնացնում էին։ Հիմա էլ սկսել ` ամերիկյան կյանքը, այնտեղի ընկերներին կարոտել. «Հուսով եմ՝ առիթ կլինի ու կգնամ ԱՄՆ իրենց տեսնելու»:

Երգչուհու գործունեությունն Իվետան շարունակում է ակումբում, այս ուղղությամբ անհատական կարիերան զարգացնելու, նոր երգեր ու տեսահոլովակներ թողարկելու նպատակներ չունի։ «Երգարվեստն իմ կյանքում իր ուրույն տեղն ունի: Ես առավոտյան շտապում եմ նկարահանումների, երեկոյան հանդես եմ գալիս որպես երգչուհի: Ես երգում եմ այն, ինչ ինձ հոգեհարազատ է: Տարիներ առաջ ունեցա անհատական տեսահոլովակ, որին հաջորդեց Վարդան Սարգսյանի հետ իմ զուգերգը: Հետո Էդգար Գևորգյանի հետ սիրո մասին զուգերգ ունեցանք, որը շատերի կողմից սիրվեց: Իհարկե, նոր երգեր ունենալու ցանկություն կա, բայց դա պահանջում է և՛ ժամանակ, և՛ ֆինանս: Կարծում եմ՝ եթե տեսահոլովակ ես նկարահանում, պետք է անընդհատ աշխատես, մի տեսահոլովակին հաջորդի մյուսը, դրա համար էլ իմաստ չեմ գտնում մի տեսահոլովակ ներկայացնել" Ամեն դեպքում, մարդիկ ինձ ընդունում ու սիրում են որպես դերասանուհի, երբ տեսնում են երգելիս, դա ևս հավանում են: Շատ ժամանակ հենց այդ կերպ եմ տարբեր խնջույքների և միջոցառումների ժամանակ որպես երգչուհի հանդես գալու առաջարկներ ստանում»,-եզրափակեց նա: