«Օրերով իրար չենք տեսնում». Ծովինար Մարտիրոսյանը` երեխաների հետ քիչ շփվելու և ամուսնու 34–ամյակին նվեր չմատուցելու մասին

Դերասան–ամուսիններ Նարեկ Հախնազարյանն ու Ծովինար Մարտիրոսյանն այս փուլում աշխատանքային բազմազբաղ առօրյա ունեն, թատրոնի փորձերին ու ներկայացումներին զուգահեռ նկարահանվում են նաև «Դեպի երազանք 2» 25 մասանոց հեռուստանովելում։ 

Tert.am Life-ի հետ զրույցում Ծովինարը խոսել է ինչպես աշխատանքի, այնպես էլ ընտանիքի մասին, որը, ըստ նրա, տուժում է աշխատանքային խիտ գրաֆիկի պատճառով։ Օրինակ, այսօր Նարեկը նշում է ծննդյան 34-ամյակը, սակայն կինը չի հասցրել յուրահատուկ նվեր մատուցել ամուսնուն:

«Գիշերը երկուսով նկարահանման հրապարակում էինք, աշխատանքային առօրյայի մեջ չհասցրի նրան շնորհավորել կեսգիշերին: Նկարահանումն ուշ ավարտեցինք, տան ճանապարհին նրան համբուրեցի ու ասացի՝ շնորհավոր: Նույնիսկ չեմ հասցրել նվեր գնել»,- ասաց դերասանուհին:

Ծովինարը պատմեց, որ առավոտյան ամուսնուն տոնական տրամադրությամբ, փուչիկներով շնորհավորել են որդիները, իսկ տոնական խնջույք զույգը չի ծրագրել՝ դարձյալ զբաղվածության պատճառով։ «Առաջիկա օրերին ինչ–որ բան կկազմակերպենք ամենամոտ մարդկանց հետ, իսկ այսօր ներկայացման ենք։ Ընդմիջման ժամին Նարեկին խնդրեցի միասին մի տեղ գնանք ու, գոնե, այդ կերպ նշել օրը»,– ասաց նա ու անկեղծացավ՝ ինքն ու Նարեկն ընտանեկան միջավայրում իրար ավելի քիչ են հանդիպում, քան աշխատանքի մեջ՝ թատրոնում ու նկարահանումների ժամանակ:

Կյանքի ուղեկցի ու խաղընկերոջ հետ հարաբերություններին, դերասանուհու խոսքով, հիմնականում ստեղծագործական վեճեր են ունենում. «Նախկինում ավելի էմոցիոնալ էինք։ Այս տարիների ընթացքում շատ բան է փոխվել: Երկուսս էլ հասունացել ենք: Երբ խաղընկերդ ամուսինդ է, հեշտ է իրար սխալներն ասելը, մասնագիտական դիտողություն անելը»:

Ծովինարն ասաց, որ այս շրջանում գերհոգնած է ու հույս հայտնեց, որ ամռանը կկարողանա հանգիստ ունենալ: Դերասանական զույգի բազմազբաղ աշխատանքից ամենից շատ տուժում են ու բողոքում նրանց երեխաները՝ 11 տարեկան Անրին ու 4 տարեկան Արշակը:

«Որքան հնարավոր է, փորձում ենք իրենց ժամանակ տրամադրել, բայց միևնույն է՝ քիչ է: Իրենք մեզ շատ են կարոտում: Առավոտյան արթնանում են, մենք տանից դուրս եկած ենք լինում, երեկոյան շատ ուշ ենք վերադառնում, իրենք արդեն քնած են լինում։ Կարելի է ասել, հաճախ օրերով իրար չենք տեսնում: Հուսամ՝ այս ամենը կկարգավորվի,– ասաց նա ու հավելեց, որ բազմազբաղ առօրյայում փորձում է հասցնել նաև տնային տնտեսուհու պարտականությունները,– Փորձում եմ հնարավորինս հասցնել տնային գործերը: Եթե շատ հոգնած չեմ լինում, տուն եմ մտնում ու միացնում «կին ռեժիմը»,  սկսում եմ անել այն, ինչ չեմ հասցրել նախորդ օրը:)»։

Դերասանուհին ասաց, որ այս հարցում բախտը բերել է, հատկապես, ավագ որդին՝ Անրին, բավականին ինքնուրույն է և իրեն անգամ օգնում է փոքր որդու խնամքի հարցերում։ «Ես Անրիի մեջ նկատում եմ նաև գեներով եկած դերասանական տաղանդը։ Թեև  Արմեն Էլբակյանի բեմադրած «Մուսա լեռան 40 օրը» ներկայացման մեջ խաղում է փոքրիկ հերոսի՝ Ստեփանի դերը, չի ուզում դերասան դառնալ, ֆուտբոլով է հետաքրքրված»,– նկատեց նա։

Խոսելով այս փուլում մասնագիտական գործունեության մասին՝ Ծովինարը հայտնեց, որ Սունդուկյանի անվան ազգային ակադեմիական թատրոնում ներգրավված է նոր ներկայացման մեջ, որի պրեմիերան կլինի այս տարի։ «Պատրաստվում ենք ռեժիսոր Սամսոն Մովսիսյանի բեմադրությամբ «Սասնա ծռեր» ներկայացմանը, որում ներգրավված է մայր թատրոնի երիտասարդ կազմը»,-ասաց դերասանուհին ու ավելացրեց, որ զբաղվածությանը գումարվել է նաև իր դասախոսական աշխատանքն ու քննական շրջանը:

Դերասանուհին արդեն 5 տարի է՝ Աճեմյանի անվան ստուդիայում բեմական խոսք է դասավանդում. «Որպես դասախոս` շատ ընկերական եմ ուսանողներիս հետ, միևնույն ժամանակ, խիստ: Իրականում նրանց հետ տարիքային տարբերությունն այդքան էլ մեծ չէ: Դասախոս-ուսանող հարաբերություններում ես ամենից շատ կարևորում եմ միմյանց նկատմամբ վստահությունը»: