«Ես որոշեցի մնալ իմ մասնագիտության մեջ ու չհանձնվել». Outdance սիթքոմից՝ Սոնա Մաթևոսյանը՝ մասնագիտական գործունեության ու անձնական կյանքի մասին

Դերասանուհի Սոնա Մաթևոսյանը, ով հեռուստադիտողներին ներկայանում է Outdance սիթքոմում, հեռուստատեսային նկարահանումներին զուգահեռ, ակտիվ գործունեություն է ծավալում միանգամից 3 թատրոնում: Ասում է՝ ստեղծագործական կյանքն առանց թատրոնի, չի պատկերացնում: Tert.am Life-ը երիտասարդ դերասանուհու հետ զրուցել է սիրելի մասնագիտության, ունեցած դժվարությունների ու իր կյանքում սիրո դերակատարման մասին:

Սոնան նշեց, որ ներկայումս նկարահանվում է Outdance –ի՝ արդեն երրորդ եթերաշրջանը: Դերասանուհու խոսքով, սկզբնական փուլում են դժվարություններ եղել իր մարմնավորած կերպարին ճանաչելու և լիարժեք դերակատարման մեջ մտնելու առումով: Հիմա արդեն Նելլիի կերպարը Սոնային հարազատ է դարձել. «Շատ սիրում եմ իմ կերպարը և հասցրել եմ կապվել Նելլիի հետ: Նելլին շատ կենսուրախ աղջիկ է, ինչ-որ տեղ՝ միամիտ, բայց ճարպիկ: Ամեն բան ժպիտով է անում: Սիրում է կյանքն ու ավելի շատ սիրում է պարել»:

Սոնան փաստեց՝ նկարահանման հրապարակում մշտապես բարձր տրամադրություն է, իսկ ստեղծագործական թիմի ու խաղընկերների հետ հաճույքով է աշխատում: «Ընկերացել ենք ոչ միայն դերասանական կազմի, այլև ամբողջ ստեղծագործական թիմով, իսկ Անդրանիկ Անտոնյանի հետ կարելի է ասել ավելի մտերիմ հարաբերություններ են, որովհետև իրար ճանաչում ենք շատ ավելի վաղուց, դեռ՝ «Քաղաքում» հեռուստասերիալից: Իսկ ընդհանրապես, բոլորին շատ սիրում եմ և գնահատում. յուրաքանչյուրը՝ վառ անհատականություններ են, վերաբերմունքս էլ յուրաքանչյուրի հանդեպ յուրահատուկ է»,-ասաց նա:

Երիտասարդ դերասանուհու զբաղվածությունը թատրոնում մշտական բնույթ ունի, ինչը Սոնայի խոսքով, իրեն իսկապես երջանկացնում է. «Փորձեր, ներկայացումներ, և շուտով մեծ պրեմիերա ունենք՝ Գ. Սունդուկյանի անվան ազգային ակադեմիական թատնրոնում: «Սասնա ծռեր» էպոսը բեմ կբարձրանա ռեժիսոր Սամսոն Մովսեսյանի բեմադրությամբ, որի մի փոքրիկ մասնիկը նաև ես կլինեմ »,-ասաց նա ու ավելացրեց, որ մայր թատրոնից բացի խաղում է Պատանի հանդիսատեսի թատրոնում և ներգրավված է նաև մանկական ներկայացումներում: Սոնան անկեղծացավ՝ փոքրիկ հանդիսատեսի առաջ խաղալն իսկապես պատասխանատու է. «Նույն ներկայացումը կարող ենք խաղալ ամեն օր, բայց այն կընդունվի յուրովի: Երեխաներն անկանախատեսելի են և իհարկե, ամենաազնիվ հանդիսատեսը: Երեխային երբեք չես կարող ստիպել հանգիստ նստել ու նայել, ծիծաղել, արձագանքել: Այդ մեծ պատասխանատվությունը մեր՝ դերասաններիս, ուսերին է, երբեմն ստացվում է, երբեմն չի ստացվում, բայց որ մեզ մոտ գրանցվում է աճ, դա միայն ու միայն երեխաների շնորհիվ է»:

Այդուհանդերձ, Սոնան նշեց, որ երիտասարդ դերասանների համար այս ասպարեզում շատ  դժվարություններ կան և մինչև բեմ բարձրանալն ու էկրանին հայտնվելը ստիպված ես լինում անցնել դրանց միջով և ի վերջո հաղթահարում ես, եթե կա մեծ աշխատասիրություն: Նա խոստովանեց՝ կյանքում ունեցել է մի շրջան, երբ մտածել է դերասանի մասնագիտությամբ չզբաղվելու մասին, սակայն, զենքերը վայրը չի դրել:

«Երիտասարդ դերասանները բողոքում են, որ գործ չկա, առաջընթաց չկա, պլատֆորմ չունեն, թատրոններում տեղ չկա, իրենք գնահատված չեն ու էլի նման շատ խնդիրներ: Եվ այս դեպքում սերը քո մասնագիտոթւյան հանդեպ բացարձակ կապ չունի: Այնքան հեշտ է հաիսթափվելը: Ես ինքս ունեցել եմ դժվար պահեր, երբ մտածել եմ միգուցե արժե ուրիշ գործով զբաղվել: Բայց ցավոք այսօր այնքան շատ են մարդիկ, ովքեր իրենց մասնագիտությամբ չեն զբաղվում, որ ես որոշեցի, ամեն դեպքում մնալ իմ մասնագիտոթւյան շրջանակում, համբերատար լինել ու չհանձնվել և այդ պայքարը ես ամեն օր եմ տանում ՝կատարելագործվելով մասնագիտությանս մեջ: Գնում եմ դասընթացների տարբեր երկրներ, գիրք եմ կարդում, ֆիլմեր եմ դիտում, ինտերնետի անսահամանափակ հնարավորությունները փորձում եմ ի օգուտ ինձ օգտագործել»,-ասաց Սոնան և ավելացրեց, որ կոնկրետ նշաձող, որին ձգտում է հասնել իր մասնագիտության մեջ, չի սահմանել՝ փոխարենը շարունակում է ինքնակրթվել:

Չնայած բազմազբաղ առօրյային, հանգստի մասին Սոնան չի մոռանում: Ասում է՝ առանց հանգստի և լիցքաթափվելու կդժվարանար նոր ուժ գտնել ու աշխատել. Ինչպես ասում են՝ մարդու մտքին տեղ լինի, ամեն ինչ էլ կհասցնի :) : Երեկոյան ընկերներիս հետ Երևանով զբոսանքն ինձ համար հանգստի ամենալավ միջոցն է»:

Հանգստի արդյունավետ միջոցը բացահայտելուց բացի, Սոնան նշեց, կյանքում ամենից շատ օգտագործող դեղամիջոցը: Նա համոզված է՝ առաջ շարժվելու , ստեղծագործելու  համար ամենաարդյունավետ դեղամիջոցը սերն է: Դերասանուհուց հետաքրքվեցինք՝ իր կյանքում այդ դեղամիջոցի անհրաժեշտ չափաբաժինը կա՞ և արդյոք սիրտն արդեն զբաղված է. « Իմ սիրտը երբեք էլ դատարկ չի եղել, այն լիքն է սիրով այս գեղեցիկ կյանքի նկատմամբ: Կարծում եմ՝ չկա որևէ չափաբաժին. Այդ սերը կա՛մ կա կա՛մ՝ չկա»:

Դերասանուհին հակառակ սեռի մեջ իր համար իդեալներ չի սահմանել, նույնիսկ այդ բառը չի սիրում և կարծում է, որ առանց իդեալների փնտրտուքի ավելի հեշտ է ապրելը. «Իսկ օրինակելի տղամարդ հայրս է ինձ համար. Ճանաչածս ամենաբարի մարդկանցից է: Երջանիկ եմ, որ ես հորս աղջիկն եմ», -ասաց նա ու ավելացրեց, իր կողքին չար, նախանձ ու տգետ մարդը երբեք չի կարող տեղ ունենալ: