«Իմ ու ամուսնուս խոսքը միշտ համընկնում է». Հերմինե Ստեփանյանը՝ դստեր դաստիարակության և ընտանիքի համալրման մասին

Երեխայի դաստիարակության լավագույն մեթոդն օրինակ ծառայելն է. այս համոզմանն է դերասանուհի, հաղորդավարուհի Հերմինե Ստեփանյանը, ում դուստրը` Մարիան, շուտով կդառնա 5 տարեկան։ Հերմինեն ասում է՝ փոխըմբռնումն ու երկխոսությունն էլ կարևոր բաղադրիչներ են երեխայի հետ շփման մեջ: Tert.am Life-ի հետ զրույցում դերասանուհին պատմել է դստեր հետ իրենց սիրելի զբաղմունքների, ընտանիքի համալրման ցանկության մասին:

Հերմինեի և լուսանկարիչ Արմեն Աղայանի դուստրը լույս աշխարհ եկավ զույգի ամուսնությունից միայն երեք տարի անց` իր հետ բերելով նոր գույներ: Հերմինեի խոսքով` երեխայի դաստիարակության շատ հարցերում ինքն ու ամուսինը  համակարծիք են, Մարիային «երես տալու» գործառույթ ոչ ինքը, ոչ էլ ամուսինը չեն կատարում:

«Ամենալավն այն է, որ իմ ու ամուսնուս խոսքը միշտ համընկնում է: Եթե նա Մարիային թույլատրել է մի ավել մուլտֆիլմ էլ դիտել, նոր գնալ քնելու, ես այդ պահին ասում եմ՝ լավ եթե հայրիկը ասել է, այդպես կանենք, նույնիսկ եթե համաձայն չեմ լինում: Դա արվում է նրա համար, որ իր մոտ էլ խնդիր չառաջանա որևէ մեկիս կողմն անցնելու և անելու այն, ինչն ինքն այդ պահին կգերադասի»,-ասաց Հերմինեն:

Նրա խոսքով` Մարիայի ամենամեծ հակումն ու նմանությունն իր հետ կյանքը սիրելն է։  «Ես իրեն փորձում եմ սովորեցնել ամեն ինչի մեջ լավը գտնել: Պետք է ուրախանալ, հիանալ,-ասաց Հերմինեն և ավելացրեց, որ իր և դստեր ամենասիրելի զբաղմունքներից մեկը Հայաստանով շրջելն ու փոքր գյուղեր այցելելն է։ –Ճանապարհին ես իրեն ասում եմ՝ նայիր, ինչ սիրուն են ծառերը դասավորված, ամպերը ինչ փափուկ են, ինչ գեղեցիկ է արևը մայր մտնում, հետո արդեն ինքն էլ է ասում՝ մամա, տես ինչ սիրուն է անձրևը թափվում: Այդ ժամանակ հասկանում եմ, որ կարողացել եմ նրա մեջ սերմանել  փոքր բաներից մեծ երջանկություն քաղելու կարողությունը: Երևի թե, դա ամենակարևորն է»:

Հաղորդավարուհին վստահ է` երեխան ծնողին ընդօրինակելով է դաստիարակվում, ուստի պետք է կարողանաս քեզ դրսևորել այնպես, ինչպես ուզում ես տեսնել երեխայիդ: Այդ տեսանկյունից Մարիան չափազանց ուշադիր է. «Երկու անգամ տարրական հարցերի շուրջ Մարիան ինձ հիշեցրել է՝ մամ, դու այսինչ կերպ ես վարվել: Դա մեկ անգամ ևս եկավ ապացուցելու, եթե ուզում ես քո երեխան լինի դաստիարակված, ինքդ պիտի լինես դաստիարակված, եթե ուզում ես խոսի գեղեցիկ, նախ դու պիտի խոսես գեղեցիկ, եթե ուզում ես քո երեխան գիրք կարդա, ամեն օր քնելուց առաջ ոչ միայն իր համար պետք է գիրք կարդաս, այլև պիտի ունենաս քո գիրքը: Մի անգամ Մարիան մի օր ասաց՝ այսօր քո անկողինը ես կպատրաստեմ, ասացի՝ լավ: Գնացի տեսա, իմ լուսամփոփը վառել է,  անկողինս բացել ու գիրքս դրել բարձիս վրա: Դրանից ավելի ճիշտ մեթոդ դաստիարակելու համար, ես դեռ չգիտեմ: Չեմ հիշում, որ այս  5 տարվա ընթացքում իր նկատմամբ խիստ պատժիչ միջոցների դիմած լինեմ»։

Հաղորդավարուհու խոսքով, մշակութային կյանքին դուստրը դեռ վաղ տարիքից է հաղորդակից դարձել: Իրենց տանը հաճախ են հյուրընկալվում օպերային երգիչներ, լուսանկարիչներ, ռեժիսորներ և արվեստի բնագավառի շատ մարդիկ: «Ինքս մշակույթի մարդ եմ, Մարիան դեռ 7 ամսական էր, երբ ինձ հետ տանում էի Կոմիտասի անվան կամերային երաժշտության տան համերգներին, որտեղ մինչև 5 տարեկան երեխաների մուտքն արգելված էր, բայց մեզ համար բացառություն էին անում:) Միևնույն ժամանակ ես շատ եմ սիրում, երբ երեխաների տրամաբանությունը լավ է աշխատում, խնդիրներ են լուծում և միայն մշակությով տարված չեն լինում: Մարիան լեզուների հանդեպ մեծ սեր ունի: Արդեն 6 ամիս է՝ անգլերենի է հաճախում և նույնիսկ մեզ է դիտողություններ է անում խոսելիս»,- ասաց Հերմինեն: 

Չնայած ընտանիքի միակ երեխան է, Հերմինեի խոսքով, Մարիան եսասեր չէ. «Նա աչքերը բացել է ու տանը շատ երեխաների տեսել: Իր մոտ էգոիզմը շատ թեթև է արտահայտվում, երևի, ճիշտ այնպես, ինչպես մյուս բոլոր երեխաների մոտ: Իր ընկերուհիները մեր տանը չեն տարբերվում իրենից: Ես կարող եմ շատ հանգիստ  իր ընկերներին բերել, գիշերը մնան Մարիայի հետ: Շատ հաճախ եմ հավաքույթներ կազմակերպում մեր տանը՝ մեկ նկարչություն ենք անում, մեկ՝ տորթ թխում: Շատ քիչ է լինում, որ Մարիան մենակ մնա:  Երբ  երեխա ես ունենում, սկսում ես շփումներդ ավելի ակտիվ դարձնել այն մարդկանց հետ,  ոքվեր իր տարիքի երեխաներ ունեն: Բացի այս ամենը, նա  մեկուկես տարեկանից մանկապարտեզ է հաճախում»:

Այդուհանդերձ, Մարիան ծնողներին արդեն դիմել է քույրիկ ունենալու խնդրանքով: Հերմինեն նշեց, որ խնդրանքը չի մերժվել, արդեն ծրագրում է երկրորդ երեխան ունենալ: «Աղջիկ երեխաների հետ ավելի լավ է հարաբերվում: Ինձ երջանիկ ու հարուստ եմ համարում, որ ունեմ քույր, եղբայր, հորեղբոր աղջիկներ, հորաքրոջ երեխաներ: Կյանքը ցույց է տալիս, որ հենց այդ մարդիկ են անդավաճան ու միշտ քո կողքին։ Այդ  կարևոր օղակից երեխայիս զրկելը, երևի թե, ճիշտ չի լինի»,-եզրափակեց նա: