«Ես ու Քրիստինան ավելի լավ սիրային զույգ կլինենք, քան Քրիստինան և Կարենն էին». Ալեքսանդր Բաբասյանը` «Դեպի երազանք 2»–ում նկարահանվելու մասին

Tert.am Life–ն իր ընթերցողներին հայտնել է, որ նկարահանվում է «Դեպի երազանք 2» 25 մասանոց հեռտուստանովել, որը Ucom ցանցում գործող «Արմենիա Պրեմիում» հեռուստաալիքի եթերում կլինի օգոստոսի 1–ից։  Tert.am Life–ը եղել է հեռուստանովելի նկարահանման հրապարակում և զրուցել դերասանների հետ։

Ալեքսանդր Բաբասյանը մարմնավորում է հեռուստանովելի գլխավոր հերոսին։ Տևական ժամանակ էկրաններին բացասական հերոսով ներկայացած դերասանն այս անգամ «կինոյի բարի տղան» է։

«Որոշել էի «Կայարան» հեռուստանովելի ավարտից հետո դադար վերցնել, քանի որ 2 տարի նկարահանվելուց հետո դերասանին հանգիստ է պետք, սակայն նկարահանման վերջին օրը Մենչից ստացա այս առաջարկ, որը շատ լավն էր։ Նախ` կերպարն էր լավը,  բացասական հերոս խաղալուց հետո կարևոր է բարի, արդար մարդու մարմնավորելը, երկրորդ` 25 մասանոց նախագիծ էր, երկարատև նախագծում խաղալ, միանշանակ, կհրաժարվեի»,– ասաց դերասանը։

Կերպարից կերպար անցումը, ըստ Ալեքսանդրի, դժվարությամբ է ստացվում։ «Բարդ է մեկուկես տարի կերտել մի կերպար, 2 օր հետո ներկայանալ իր հակապատեր դերով։ Ռեժիսոր Կարեն Ամյանին խնդրել եմ ամեն տեսարանից առաջ ինձ հիշեցնել, որ ես այլևս Առնոյի դերում չեմ,– նշեց Ալեքսանդրը, ով նոր դերի համար փոխել է սանրվածքը և սափրվել։ –Կարծում եմ` դա պրոֆեսիոնալ մոտեցում է։ Մազերի երկարությունը կամ միրուքն այնքան արժեք չունեն, որ դերասանը չհրաժարվի դրանից նոր կերպարի համար։ Ես կարևորում եմ դերից դեր անցման ժամանակ նաև ոճային փոփոխություններ անելը։ Ունենք դերասաններ, որոնք անընդհատ նույն արտաքինով են, նույն կերպ են խաղում։ Ես շատ եմ աշխատում այդ ուղղությամբ, քանի որ կզայրանամ,  եթե տեսնեմ մի կերպարի մեջ եմ մնացել»։

Ալեքսանդրի խոսքով` նկարահանող նոր խմբի հետ արագ է ընկերացել, թեև 2-3 մարդու էր ճանաչում. «Մի քանի նկարահանման օրն ինձ բավական էր բոլորի  հետ մտերմանալու համար։ Նախ` տեսակս է այդպիսին, երկրորդ` նկարահանման խմբի անդամները, իսկապես, շատ լավ ու պրոֆեսիոնալ մարդիկ են»։

Դերասանը կարևորում է հատկապես խաղընկերների, սցենարիստի և ռեժիսորի հետ լավ հարաբերությունները։ Ասում է` միջամտում է նրանց աշխատանքին, քանի որ պետք է կերպարը պետք է դուր գա իրեն։

Դերասանների միջև կապը, երբեմն, միանգամից չի ստացվում։ Ալեքսանդրը նման փորձ ունեցել է դերասանուհի Մերի Հակոբյանի հետ, որի հետ «Դեպի վայրէջք» հեռուստանովելում աստիճանաբար մտերմացան ու սկսեցին խաղալ սիրային զույգի։ Քրիստինայի հետ սիրային տեսարանների նկարահանմանը դերասանը դեռ չի հասել, սակայն վստահ է` ամեն ինչ լավ է ստացվելու, շատ ավելի լավ, քան Քրիստինայի և Կարեն Ասլանյանի միջև է ստացվել «Դեպի երազանք 1»–ում։

«Դերասանների` իրար զգալը պրոֆեսիոնալիզմով պայմանավորված չէ, բայց պետք է փակ դաշտով դերասան չլինես, քանի որ մոնոլոգ չես ներկայացնում։ Կարևոր է էմոցիա տալ և ստանալ։ Որքան էլ լավ խաղաս տեսարանը, եթե խաղընկերոջդ քեզ էմոցիա չտա, չես զգա։ Ես և Քրիստինան դեռ քիչ տեսարաններ ենք ունեցել, սակայն կարծում եմ` հաջողելու ենք։ Երբ մենք ֆոտոշարք էինք անցնում պոստերի համար, հասկացա, որ մեր կապը ստացվում է։ Ես, իհարկե, նայել եմ առաջին հեռուստանովելը, չեմ կարող իմ տեսանկյունից գովեստի խոսքեր ասել, վստահ եմ, որ մեզ մոտ  ավելի լավ կստացվի, որովհետև Քրիստինան ունի այն ունակությունները, որ կարողանա լավ դերասանի հետ լավ խաղալ»,– ասաց Ալեքսանդրը։

Հստակեցմանը` Կարենը լավ դերասան չէ՞ր, արձագանքեց. «Ես սիրային զույգի մասին եմ խոսում։ Ես նայել եմ մի քանի սերիա։ Ես և Քրիստինան ավելի լավ կներկայանանք` որպես սիրային զույգ։ Եթե ես ինչ–որ բանում վստահ չլինեմ, չեմ անի։ Կարենն իմ մանկության շատ լավ ընկերն է։ Երևի, 5 տարեկանից ճանաչում ենք իրար։ Իր մարդկային որակների մասին միայն գովեստի խոսքեր կարող եմ ասել։ Ինչ վերաբերում է Կարեն–Քրիստինա սիրային զույգին, եթե հաջորդը ես պիտի խաղամ, բնականաբար, ցանկություն ունեմ և ամեն ինչ անելու եմ, որ անկախ ընկերական հարաբերություններից` ինձ մոտ ավելի լավ ստացվի։ Իմ մարդկային տեսակն այնպիսին է, որ եթե ինչ–որ բան անում եմ, պետք է լավ լինեմ,  երկրորդը կամ երրորդը լինելու դեպքում, պարզապես, չեմ անի դա։ Ես աշխատելու եմ, որ նախորդ զույգից չէ, բոլորից լավ զույգի խաղանք։ Վստահ եմ, որ իմ ու Քրիստինեի տեսարանները լավ  են լինելու»։

Դերասանը հայտնեց, որ համբույրի տեսարան չի լինելու։ Ասում է` նման տեսարանում նկարահանվել համաձայնում է միայն այն դեպքում, եթե ինքնանպատակ չէ և պրոֆեսիոնալ փայլ կտա տեսարանին։ «Եթե պարզապես համբույր է, ոչ մի սցենարիստ, ոչ մի ռեժիսոր չի կարող ինձ ստիպել համբուրվել,– ասաց նա ու նկատեց, որ նման տեսարաններ խաղալիս  բացարձակ ոչինչ չի զգում,– դա նույնն է, ինչ ձեռք բռնելն ու աչքերի մեջ նայելը»։

Ալեքսանդրը նկատեց, որ խաղընկերների հետ զրույցներ է ունենում նաև մինչև նկարահանումները, որպեսզի տեսարաններն ավելի լավ ստացվեն։

Լուսանկարները` Շաքե Հովհաննիսյանի