Նարեկ Բավեյանի արտասովոր կերպարն ու Ուկրաինայից ժամանած մոդելը՝ երգչի նոր տեսահոլովակում

Մեկ տարվա դադարից հետո Նարեկ Բավեյանը լսարանին նոր տեսահոլովակ կներկայացնի, որի պրեմիերան նախատեսված է հունիսի 8-ին: Տեսահոլովակը նկարահանվել է «Համով բալա ա»  երգի հիման վրա, որի  երաժշտության և խոսքերի հեղինակը երգիչն է, գործիքավորումն արել է Արա Թորոսյանը՝ Մուրզոն:

Նարեկը Tert.am Life-ին է տրամադրել լուսանկարներ տեսահոլովակի նկարահանման հրապարակից ու որոշ մանրամասներ ներկայացրել նոր աշխատանքի մասին:

Նոր տեսահոլովակ ներկայացնելու մեկ տարվա ընդիմջումը Նարեկը երկար դադար չի համարում: Նա համոզված է, պետք է նոր աշխատանքն ներկայացնես, երբ ունես ասելիք. «Իմ կարծիքով` անիմաստ է  անընդհատ տեսահոլովակ թողարկելը, այնքան որ երկար դադար չունենալու համար»:

Նարեկը նշեց, որ երգը 6/8 ժանրում է՝ ավելի պարային ու ռիթմիկ: Տեսահոլովակի ռեժիսորը Նարեկ Քթոյանն է, ում հետ երգիչն առաջին անգամ է  համագործակցում։ «Չնայած առաջին անգամ էի աշխատում Նարեկի հետ, հուրախություն ինձ, չեմ փոշմանում։ Արդյունքն արդեն տեսնում եմ՝ բավականին հետաքրքիր տեսահոլովակ է նկարահանել: Որպես այդպիսին` սյուժետային զարգացում չկա: Երգին համահունչ՝ գունեղ ու պարային տեսարաններով տեսահոլովակ ենք ստացել: Երեք տարբեր տեսարաններ ենք նկարահանել: Նկարահանումը տևել է մի ամբողջ օր, գրեթե, 24 ժամ աշխատել ենք»,-ասաց երգիչն ու ավելացրեց, որ պարային համարներն ապահովել է Fourside պարային համույթը:

Նարեկը հայտնեց, որ տեսահոլովակում ներկայանում է հետաքրքիր, իր համար անսովոր կերպարով։ Ոճաբանն  Արայիկ Գաբաջյանն է. «Նա շատ հետաքրքիր և բոլորովին նոր կերպար էր մտածել ինձ համար, ոչ ստանդարտ լուծումներ է տվել կերպարիս»:

Տեսահոլովակի հերոսուհու դերում ստեղծագործական թիմը հայուհու չի տեսել: Նարեկի խոսքով` հատուկ տեսահոլովակում նկարահանվելու համար Ուկրաինայից մոդել են հրավիրել: «Շատ հաճախ հարցնում են՝ մեզ մոտ գեղեցկուհի չկա՞ր, իհարկե, շատ գեղեցիկ հայ աղջիկներ կան, բայց շատ քիչ են մարդիկ, ովքեր նկարահանվում են։ Դեմքերը կրկնվում են, նրանց տեսնում ենք տարբեր տեսահոլովակներում, սերիալներում: Դրա համար որոշեցինք մոդելին դրսից հրավիրել, որ առաջինը նկարահնվի հենց իմ տեսահոլովակում»,-ասաց նա:  

Երգիչը նշեց, որ տեսահոլովակի հերոսուհին համարձակ կերպարում է, սակայն չափի մեջ։ «Համարձակ հագուստի հետ կապված հայաստանյան իրականության մեջ խնդիր կա: Ուկրաինուհու դեպքում նման խնդիր չի առաջանում։ Իհարկե, չափից դուրս կամ գռեհիկ ոչինչ չի արվել, բայց, օրինակ, զգեստի կարճության կամ բացվածքի հետ կապված հնարավոր խնդիրներից խուսափելու համար ևս որոշեցինք արտերկրից մոդել ընտրել։ Ոճաբանը կարողացավ իր ամբողջ երևակայությունն օգտագործել ու ստանալ այն կերպարը, որը պատկերացնում էր»:

Երգչից հետաքրքվեցինք, թե ի՞նչ ակնկալիքներ ունի նոր տեսահոլովակից, արդյոք 6/8 ձևաչափում հանդես գալը հեռահար նպատակներ է հետապնդում, որպեսզի երգը դառնա սպասված կատարում տարբեր խնջույքների ու առիթների ժամանակ։ «Միշտ էլ կա այդ ցանկությունն ու նպատակը, որովհետև մեծ ներդրումներ ես անում տեսահոլովակի մեջ, ակնկալում ես, գոնե, ինչ-որ բան հետ բերել: Սակայն փորձը ցույց է տվել, որ կանխատեսումները հաճախ չեն արդարանում: Եթե  կատարումը 6/8 ժանրում է, դեռ չի նշանակում, որ անպայման կսիրվի: Ամեն դեպքում, գործն արել ենք հույսով, որ կսիրվի, կլսեն, ու դա գումար կբերի: Մնացածը կապրենք, կտեսնենք»,- եզրափակեց երգիչը: