«Մանկական Նոր ալիք»–ում 9-ամյա Վարդան Մարգարյանի հատուկ մրցանակն ու Սերգեյ Լազարևի հետ համեմատությունը

16:29 • 04.06.18

Շոուբիզնես

Tert.am Life-ն իր ընթերցողներին պատմել էր «Մանկական Նոր ալիք» մրցույթում Հայաստանի ներկայացուցիչ Վարդան Մարգարյանի մասին: «Արտեկ»-ում տեղի ունեցած մրցույթից մեր մասնակիցը վերադարձել է հատուկ մրցանակով:

Tert.am Life-ի հետ զրույցում Վարդանի պրոդյուսեր Դավիթ Բադալյանը նշեց` 9-ամյա երգիչը երկու ելույթ է ունեցել մրցույթի ընթացքում և արժանացել ինչպես հանդիսատեսի, այնպես էլ ժյուրիի համակրանքին:

«Այնտեղ բոլորը շատ լավ էին տրամադրված հայերիս և մեր մասնակցի նկատմամբ: Վարդանին зажигалка էին ասում, քանի որ շատ աշխույժ երեխա է: Առաջին փուլում նա կատարեց Արամ MP3-ի «Ասա» երգը, իսկ եզրափակչում ներկայացավ Էլթոն Ջոնի՝ I am still standing երգով: Առաջին օրվա ելույթից հետո Նիկոլայ Բասկովը վերցրեց խոսափողն ու ասաց՝ երեխան ինձ Սերգեյ Լազարևին հիշեցրեց (վերջինս նույնպես ժյուրիի անդամ էր), Լազարևն էլ էր փոքր ժամանակ այսպես թմբլիկ ու աշխույժ երեխա, տեսեք, թե հիմա ով է դարձել: Հուսով եմ՝ Վարդանն էլ այդ նույն աշխուժությամբ Հայաստանը կենրկայացնի «Եվրատեսիլ» մրցույթում»,-պատմեց Դավիթն ու ավելացրեց, իրենք արդեն որոշել են մասնակցության հայտ ներկայացնել «Դեպի մանկական Եվրատեսիլ»–ին:

«Մանկական Նոր ալիքում» երեք հատուկ մրցանակ է եղել, որոնցից մեկը՝ Կոսիգինի ռուսական պետական համալսարանի հատուկ մրցանակը, բաժին է հասել Վարդանին։ «Մրցանակը ենթադրում է, որ նա կարող է նախագծել իր սեփական պատկերացմամբ բեմական հագուստներ, ուղարկել Կոսիգինի ինստիտուտ, որտեղ դրանք կկարվեն իր հետագա գործունեության համար»,- ասաց Դավիթն ու ավելացրեց՝ Վարդանի երազանքների շարքում է ունենալ հագուստի սեփական հավաքածուն և դառնալ ճանաչված մոդելավորող:

Նշենք, որ «Մանկական Նոր ալիք» մրցույթի մասնակիցներն այս տարի 14-ն են եղել՝ 9 երկրներից. Հայաստանից, Բելառուսից, Բուլղարիայից, Իսրայելից, Ուկրաինայից, Վրաստանից, Ղազախստանից և Մոլդովայից: Մրցույթի առաջին տեղը գրավել է Եվա Լեպան (Ուկրաինա), երկրորդ տեղը ՝ Իվենա Ռաբոտովան (Բուլղարիա), երրորդ տեղը՝ Սոֆիա Ֆոմենկոն (Ռուսաստան):