Արա Մարտիրոսյանի տարեդարձը, 16-ամյա դստեր հուզմունքն ու Սարոյի գեղեցիկ նվերը

Երգիչ Արա Մարտիրոսյանը, որն այս փուլում Հայաստանում է, օրերս նշել է ծննդյան տարեդարձը։ Կյանքում առաջին անգամ Արան ծննդյան օրը նշել է բեմում, իսկ զգացողությունների և հետաքրքիր դրվագների մասին պատմել է Tert.am Life–ին, ինչպես նաև տրամադրել օրվա լուսանկարները։

«Միշտ սիրել եմ տոնել տարեդարձս, սակայն առաջին անգամ եմ այն բեմում նշում։ Ի սկզբանե չէի ծրագրում այդ օրը համերգ ունենալ, սակայն հանգամանքների բերումով մայիսի վերջին նախատեսվող ակումբային համերգս հետաձգվեց մինչև հունիսի 2, որը տարեդարձիս նախօրեն էր։ Քանի որ կեսգիշերին բեմում էի, ստացվեց, որ տարեդարձս նշեցի բեմում։ Վաղուց ունեի ցանկություն, ինչու ոչ, երազանք գոնե մեկ անգամ ծննդյանս օրը նշել բեմում»,– ասաց երգիչը, որին կեսգիշերին երկրպագուներն ու ընկերները շնորհավորել են տոնական տորթով։

Արայի հանդիսատեսի շարքերում նստած է եղել 16-ամյա դուստրը, որը ևս այս օրերին Հայաստանում է։ Երգիչը պատմեց, որ դուստրը հուզվել է իր ելույթի ժամանակ. «Նա երբեք լաց չէր եղել իմ երգելու ընթացքում։ Երևի, տարիքով էր պայմանավորված, որ այս անգամ լաց եղավ»։

Երգչի կինն ու որդին ԱՄՆ–ում են։ Տարեդարձի առթիվ նրան շնորհավորել են, սակայն անակնկալ չեն մատուցել։ Պարզվում է` Արան պատկանում է այն մարդկանց թվին, որոնք չեն սիրում անակնկալներ մատուցել և ստանալ. «Սիրում եմ, որ ամեն ինչ սպասված է լինում, ես նախապես իմանում եմ` ինչ է ինձ սպասվում»։

Օրվա տպավորիչ շնորհավորանքներից մեկն Արային մատուցել է  երգիչ Սարոն։ «Նա  բեմից շնորհավորեց ինձ` կատարելով «Այստեղ եմ ծնվել, այստեղ մեծացել» երգը։ Չեմ կարծում, որ ընկերս կարող էր ինձ դրանից ավելի լավ նվեր մատուցել»,– նկատեց երգիչը, որի համար կատարումը ոչ միայն գեղեցիկ էր, այլև խորհրդանշական։

Իր կյանքի ամենամեծ ձեռքբերումը երգիչը համարում է երեխաներին, ընտանիքին, երաժշտությունն ու ընկերներին։ «Ես ձեռքբերում եմ համարում նաև իմ աճը երգում, տարիների ընթացքում հասունանալը։ Մենահամերգիս օրը ես ասում էի տարեթիվը, հանդիսատեսն ասում էր երգը։ Դա շատ զարմանալի ու հետաքրքիր պահ էր։ Հանդիսատեսի սերը շատ մեծ ձեռքբերում է»,– ընդգծեց նա։

Համերգից հետո Արան գնացել է տուն ու հանգստացել, հաջորդ օրը նա տարեդարձը նշել է նախ`  մասնակցելով ընկերոջ քրոջ հարսանիքին և մի քանի երգ կատարելով, ապա  4–5 ընկերոջ հետ փոքրիկ խնջույք կազմակերպելով։ Արայի մտերիմ ընկերների թվում են Սարոն և Արման Հովհաննիսյանը։ Սարոն ներկա է եղել խնջույքին, Արմանը` ոչ, քանի որ նոր էր վերադարձել  Երևան։

Երկար տարիներ է` Արան բնակվում է ԱՄՆ–ում, թեև զգուշանում է ասել, թե ԱՄՆ–ն է իր բնակության մշտական վայրը։ Բոլոր զրույցների ժամանակ շեշտում է` հաճախ է գալիս Հայաստան։ Հիմա երգիչը Հայաստանում է դստեր հետ։ Արան խոստովանում է` երեխաները հաճախ չեն լինում Հայաստանում, սակայն սիրով են գալիս հայրենիք։

«Դուստրս սովորում է Միացյալ Նահանգների հայկական դպրոցում, որտեղի նախաավարտական 11-րդ դասարանցիները գալիս են հայրենիք` Հայաստանին ծանոթանալու։  Քանի որ ես Հայաստանում էի, ծնունդս էր, նա դասընկերների հետ չվերադարձավ ԱՄՆ»,– ասաց երգիչն ու հավելեց, որ հայր ու աղջիկ օգտվում են առիթից, զբոսնում Երևանում, լավ ժամանակ անցկացնում։ Հայաստանում արդեն ունեն իրենց սիրելի համատեղ զբաղմունքը` այն է Արայի մայրիկի պատրաստած «վարենիկներն» ուտելը։

Հունիսի կեսին հայր ու աղջիկ կմեկնեն ԱՄՆ, այնուհետև երգիչը Հայաստան կվերադառնա 13-ամյա որդու հետ։