«Մտածում էի` երկուսով ենք լինելու». Էրիկը ՝ 30-ամյակի անակնկալի մասին

17:50 • 05.06.18

Շոուբիզնես

Էրիկ Կարապետյանն այսօր նշում է 30–ամյակը: Տարվա լավագույն երգիչը Tert.am Life-ի հետ զրույցում պատմել է կեսգիշերն անց ստացած անակնկալի մասին ու ասել, որ բազմաթիվ շնորհավորանքներ է ստացել՝ դժվարանալով հիշել դրանցից առաջինը:

«Արդեն հասցրել եմ բազմաթիվ զանգեր ու նամակներ ստանալ աշխարհի տարբեր ծայրերից՝ իմ ընկերների, երկրպագուների, ծանոթ ու անծանոթ մարդկանց կողմից: Լավ մաղթանքներ եմ ստացել, ինչի համար բոլորին շնորհակալ եմ: Շատ հաճելի է»,-ասաց երգիչը:

Էրիկը նշեց, որ երեկ է վերադարձել Գերմանիայից, որտեղ Միհրան Ծառուկյանի հետ համերգային շրջագայության էին մեկնել: Երգիչն ասաց, որ վերադարձից հետո փոքր-ինչ հոգնած է եղել ու չի ծրագրել ծննդյան օրվա հետ կապված որևէ խնջույք կազմակերպել, սակայն իրավիճակը փոխել է կեսգիշերն անց իրեն մատուցված անակնկալը:

«Իսկապես չէի պատրաստվում ինչ-որ բան անել, բայց արի ու տես, որ եղբայրս և ընկերներս արդեն որոշել էին, որ պետք է անակնկալ հավաքույթ կազմակերպեն ինձ համար: Դա շատ անսպասելի կերպով եղավ: Գիտեի, որ տեղ ենք գնում, որտեղ ի սկզբանե երկուսով պիտի լինեինք (երգիչն ընկերություն է անում Սվետլանա Իշխանյանի հետ), բայց պարզվեց` շատերն արդեն սպասում էին ինձ: Հրավիրվել էին ինձ հարազատ մարդիկ, իմ ընկերներն ու գործընկերները»,-պատմեց նա:

Հոբելյարի խոսքով` տարիքի հետ էական տարբերություն չի զգում, միայն նկատել է, որ ավելի հասուն է դատում ու իմաստնանում։ «Ամեն դեպքում 30-ը շատ մեծ տարիք չէ: Միայն կարող եմ ասել, որ տարեցտարի ավելի հասուն մտածելակերպ եմ ձեռք բերում, ավելի եմ արժևորում այն բաները, որոնց նախկինում գուցե այլ կերպ էի վերաբերվում: Տարիքի հետ ինձ մոտ ուրիշ արժեքներ են առաջ գալիս, նյութականը տեղը զիջում է հոգևոր արժեքներին»,- ասաց Էրիկն ու ավելացրեց, հիմա ընտանիքն իր համար առաջնային տեղում է:

Երգչից հետաքրքվեցինք նաև, թե երբ է պատրաստվում կառուցել իր ընտանիքը. «Միանշանակ ունեմ այդպիսի ծրագիր: Այդ օրն էլ է գալու:) Ես, ինչպես յուրաքանչյուր նորմալ հայ տղամարդ, դա անելու եմ: Երբ լինի, անպայման, կիմանաք այդ մասին»,- եզրափակեց նա: