«Իմ բոլոր մեքենաներն ինքս եմ գնել». Լուսինե Թովմասյանը` 18 տարեկանից մեքենա վարելու մասին

Երթևեկության ընթացքում որևէ սխալ նկատելիս կամ ոչ ճիշտ կայանված մեքենա տեսնելիս շատերը շտապում են եզրակացնել, թե վարորդը կին է, մինչդեռ կին վարորդները համառորեն փորձում են կոտրել այս մտածելակերպը:

Tert.am Life-ի՝ «Ղեկին կանայք են» խորագրում այս անգամ զրուցել ենք  «Միսս Հայաստան 2003», «Վիցե Միսս Եվրոպա 2006» Լուսինե Թովմասյանի հետ: Լուսինեի խոսքով` վարորդ դառնալու ցանկություն միշտ ունեցել է, մեքենա վարել սկսել է 18 տարեկանից:
 
 
«Հաճախել եմ ավտոդպրոց ու 20 դասընթաց անցել: Մինչ օրս լավ հիշում եմ իմ ուսուցչին՝ Գրիգոր ձյաձյային:) Իսկապես, ուսուցչից շատ բան է գալիս, երևի, նրանից էլ է կախված ՝ կսիրե՞ս վարելը, թե՞ ոչ կամ որքանո՞վ կտիրապետես վարելու հմտություններին: 20 օր տևած դասընթացները շատ բան են ինձ տվել, որ մինչ օրս կիրառում եմ իմ վարորդական կյանքում»,– պատմեց Լուսինեն։

Նա արդեն 14 տարվա վարորդական փորձ ունի, որի ընթացքում երեք ավտոմեքենա է վարել։ Առաջինը եղել է Peugot մակնիշի մեքենան, որը, Լուսինեի խոսքով, ձեռք է բերել սեփական աշխատավարձով, երկրորդ մեքենան BMW mini cooper է եղել . «Իմ բոլոր մեքենաներն ինքս եմ գնել: Ներկայիս ավտոմեքենաս BMW X3 մակնիշի է, որը կանանց համար նախատեսված մոդել է:  Այն ձեռք եմ բերել 2009 թվականին նոր վիճակում հենց BMW-ի ավտոսրահից»:

Լուսինեն իրեն կարգապահ վարորդ է համարում, նույնիսկ չի մտաբերում, թե պետավտոտեսուչները վերջին անգամ երբ են կանգնեցրել իր մեքենան: Գեղեցկուհի վարորդը նշեց, որ երբեմն իրեն ճանաչում են, բայց եթե խախտում է արել, միանշանակ պետք է արձանագրեն դա։ Վարորդ լինելու համար, Լուսինեի կարծիքով, ամենակարևորը համբերություն ունենալն է, հատկապես, երևանյան երթևեկության մեջ:

«Եթե հաշվի առնենք խցանումները, կայանատեղիների բացակայությունը, երևի թե, նաև պետք է համարձակ լինես, որպեսզի կարողանաս մտնել երևանյան երթևեկության ռիթմի մեջ: Ես հիմա հաճախ չեմ վարում մեքենա, որովհետև քաղաքի կենտրոնում եմ ապրում, ինձ ավելի հարմար, միաժամանակ, առողջարար է քայլելը: Բացի այդ, կետրոնում մեքենան կայանելու տեղ գտնելը շատ դժվար է, այդ իսկ պատճառով, երբ շաբաթը մեկ կամ երկու անգամ մեքենան հանում եմ ավտոտնակից, մեծ հաճույքով եմ վարում և չեմ նյարդայնանում»,-ասաց նա:

Լուսինեն նկատեց, որ թեև փորձառու վարորդ է, ամուսինն իրեն միշտ ուղղություն է ցույց տալիս ու դիտողություններ անում վարելու ընթացքում. «Դա ինձ շատ է նյարդայնացնում, դու գիտես, որ հմուտ վարորդ ես, բայց, միևնույն է, կողքից խոսում են: Ամուսինս, երևի, զգուշանալու նպատակով է դա անում, քանի որ միշտ չէ, որ կողքիս է: Նա փորձում է վարորդական իր փորձն ինձ փոխանցել, բայց վերջին երկու տարվա ընթացքում հասկացել է, որ դրա կարիքը չկա»:

Ամենաերկար ճանապարհը, որ վարորդի կարգավիճակում գնացել է Լուսինեն, եղել է Հայաստանից Վրաստան երթուղին: Նա նշեց, որ մեքենա վարելու փորձ ունեցել է նաև եվրոպական երկրներում ու ԱՄՆ-ում. «Այնտեղ երթևեկությունը կանոնակարգված է։ Հայաստանից հետո այդ պայմաններում վարելը փոքր-ինչ դժվար է, բայց միայն սկզբնական փուլում, հետո հասկանում ես, որ վախենալ, ընդհանրապես, պետք չէ»:

Լուսինեն փաստեց, որ 14 տարիների ընթացքում երբևէ խոշոր վթարային իրավիճակում չի հայտնվել: Վերջին անգամ 8 տարի առաջ է վթարային իրավիճակում հայտնվել, իր մեքենային են հարվածել, բայց ոչ իր մեղավորությամբ: Ինչպես շատ կանայք, Լուսինեն ևս մեքենայի կառուցվածքից ու ավտոպահեստամասերից, առանձնապես, շատ բան չի հասկանում. «Ցանկացած անսարքության դեպքում դիմում եմ մասնագետի օգնությանը: Ինքնուրույն կարող եմ միայն ջուր լցնել»:  

Վարելու ընթացքում կողմնակի որևէ գործողություն Լուսինեն չի անում, սելֆիներ անել ևս շատ չի սիրում: Ասում է՝ միայն հասցնում է շատ ջուր խմել: Նրա խոսքով` իր մեքենայի հիմնական ուղևորներն են մայրիկը, դուստրը՝ Արիանան, և քույրիկը՝ Իրինա Թովմասյանն ու նրա երեխաները:

Գեղեցկուհին նշեց, որ վարելիս երաժշտություն լսելը իր դեպքում պարտադիր պայման է, իսկ երգերի ընտրությունը  կախված է օրվա տրամադրությունից: