«Համոզված եմ՝ տպավորիչ ելույթ եմ ունենալու, միակ մտավախությունս հասակիս հետ է կապված» . Իլոնա Նուրբեկյանը Costa Blanca fashion week միջազգային մրցույթին կներկայացնի Կովկասը

17:05 • 07.06.18

Շոուբիզնես

Իսպանիայում անցկացվող «Կոստա Բլանկա միջազգային նորաձևության դիզայներական շաբաթ» (Costa Blanca fashion week) մրցույթին այս տարի կմասնակցի երիտասարդ դերասանուհի Իլոնա Նուրբեկյանը, ում շատերը ճանաչեցին «Ոսկե դպրոց» սիթքոմից: Նա մրցույթին ներկայացնելու է Կովկասի տարածաշրջանը:

Tert.am Life-ի հետ զրույցում Իլոնան ասաց, որ առաջարկը ստանալիս տարակուսել է` համաձայնել, թե ոչ, սակայն, ի վերջո, որոշել է մասնակցել:

«Մասնակցության առաջարկը ստացել եմ հաղորդավար Տիգրան Հարությունյանից: Ես հասկացա, որ պետք է մասնակցեմ, որովհետև դա շատ հետաքրքիր ու նոր փուլ է իմ կյանքում: Մեծ ոգևորությամբ, միաժամանակ, պատասխանատվությամբ կմասնակցեմ մրցույթին,- ասաց Իլոնան և ավելացրեց, որ մտավախությունը կապված է եղել միայն հասակի հետ,- Հասակս 1.64 սմ է, բայց այդ հարցը քննարկվել է, դա խանգարող հանգամանք չէ»:

Մրցույթն անցկացվելու է հոկտեմբերի 5-15-ը, նախապատրաստական աշխատանքներն արդեն սկսվել են։ Իլոնայի խոսքով, պրոֆեսիոնալ թիմ է ձևավորվել: Նա նշեց, որ մրցույթն ունենալու է չորս փուլ, տարազով, լողազգեստով, երեկոյան զգեստով և առօրյա հագուստով ցուցադրություններ:

Իլոնան կարծում է, որ ավելի վաղ ունեցած ֆոտոմոդելի փորձառնությունն այս մրցույթում իրեն կօգնի։ Ինչ վերաբերում է մոդելայի պրոֆեսիոնալ քայլքին, մինչև մրցույթը կաշխատի այդ ուղղությամբ: «Ներքին համոզմունք ունեմ, որ ամեն ինչ լավ է լինելու: Մրցույթին մասնակցում եմ հաղթելու ակնկալիքով: Եթե չհաղթեմ էլ, համոզված եմ, որ շատ տպավորիչ ու արժանավայել ելույթ եմ ունենալու՝ լավագույնս կատարելով իմ առջև դրված խնդիրը»,-ասաց նա ու հավելեց, որ նախորդ տարի դերասանուհի Մերի Հակոբյանի հաղթանակը պարտավորեցնող է, որպեսզի ինքն էլ լավ ներկայանա մրցույթում։

Նշենք, որ Costa Blanca Fashion Week — International Best Male and Female World-2018 մրցույթին կմասնակցեն ևս 3 հայ։ Դերասան, մոդել Հովհաննես Սեմերջյանը կներկայացնի Կովկասը, Հայաստանը մրցույթում կներկայացնեն երգչուհի Անուշիկ Ավագյանը և մոդել Աշոտ Կարապետյանը: