ArmComedy-ի բողոքի ակցիան և պահանջը` տեղափոխվել «Արմենիա TV»

15:29 • 08.06.18

Շոուբիզնես

«Սիրո և եթերի թավշյա տեղափոխություն» պաստառներով ArmComedy նախագիծը գնում է երկրի փոփոխությունների հետևից և փոխում հասցեն` ATV հեռուստաընկերությունից տեղափոխվելով «Արմենիա TV»։ Հայկական հեռուստաեթերում քաղաքական հումորի առաջամարտիկները` Սերգեյ Սարգսյանն ու Նարեկ Մարգարյանը վստահեցնում են` փոխում են հասցեն, բայց ոչ ուղղվածությունն ու իրենց հատուկ սրությունը:

«Արմենիա TV»–ում նախագիծը կունենա Armcomedy Live անվանումը։ Առաջին հաղորդումը եթերում կլինի հունիսի 16-ին, մինչ այդ Սերգեյն ու Նարեկը Tert.am Life-ին պատմել են տեղափոխության պատճառների և հեռուստադիտողներին սպասվող անակնկալների մասին։

Մինչ նոր նախագծի եթեր հեռարձակվելը, կլինեն անոնսներ, որոնցից մեկն արդեն եթերում է: Հեղափոխության սցենարով՝ Գյումրիից Երևան քայլարշավով տղաները պահանջում են հաղորդումը տեղափոխել «Արմենիա TV», պահանջը կատարվում է:

«Երկրում իրավիճակ է փոխվել, քանի որ ամեն ինչ սկսել է դեպի լավը գնալ, մենք էլ ենք փոփոխություն ակնկալում»,- իրեն հատուկ հումորով ասաց Սերգեյը: Նարեկն էլ հավելեց. «Այո՛, ոգեշնչվեցինք փոփոխություններով և, կարծես, եղավ այն փոփոխությունը, որը ցանկանում ենք տեսնել»:

Armcomedy Live-ն իր հետ տանում է այն ամենը, ինչն արդեն սիրվել է հեռուստադիտողների կողմից՝ դրան ավելացնելով նոր խորագրեր, դեմքեր, հետաքրքիր, հումորային դրվագներ: Տղաները վստահեցրին՝ սրության պակաս հեռուստադիտողը չի զգա, եթե ոչ հակառակը` ավելի սուր կլինեն։

«Քաղաքական մասով, իհարկե, փորձելու ենք նոր թեմաներ գտնել, ձեռքը պահել զարկերակին, իսկ սրությունը չի պակասելու, հումորն էլ միայն ավելանալու է: Մի խոսքով, ով սիրում էր նախորդ հաղորդումը, իր համար, գրեթե, ոչինչ չի փոխվի, իսկ ով չէր դիտում, սա լավ առիթ է, որպեսզի սկսի նայել: Լինելու են բազմաթիվ նոր էջեր, որոնց միջոցով հումորային տարբեր ժանրերը մեկտեղելու ենք: Ցանկացած ճաշակի հեռուստադիտող ինչ-որ լավ բան կկարողանա գտնել»,-ասաց Նարեկը:

Բացի շաբաթվա լրահոսի այլընտրանքային ու հումորային վերլուծությունը, Նարեկն ու Սերգեյը տաղավարում կհյուրընկալեն տարբեր բնագավառների մարդկանց։

Թե ինչու հաղորդման անվանմանն ավելացավ Live բաղադրիչը, տղաներն ունեն իրենց բացատրությունը. «Live-ը այսօր ամենանորաձև բաներից մեկն է, դրան գումարած հաղորդումը լինելու է «այս պահին հանդիսատեսի հետ» ձևաչափում, այսինքն` տաղավարում լինելու է հանդիսատես: Այդ առումով չենք խաբում, որ ուղիղ եթերում ենք, գուցե,մի օր էլ լինենք լիարժեք ուղիղ եթերում»,-նկատեց Նարեկը։

Տղաները բոլոր խաղաքարտերը չբացեցին՝ ինչպես իրենց վերջին՝ 747-րդ հաղորդման ավարտին են պահել ինտրիգը: Սերգեյը վստահեցրեց՝ շատ գեղեցիկ տաղավար են ունենալու, Նարեկն էլ հաստատեց՝ իրենց համար բոլոր պայմաններն ապահովել են: «Ես ու Սերգեյը երկու պայման էինք դրել տաղավարի հետ կապված, պետք է լիներ սեղան և առնվազն 2, բայց ոչ ավելի, քան 15 աթոռ: Կարծես թե, պայմաններն ընդունել են։ Բաժակներն էլ մենք մեզ հետ կբերենք»,-ասաց Նարեկը:

Armcomedy Live –ում հեռուստադիտողը կտեսնի նախորդ նախագծից արդեն հայտնի փոքրիկ Կառլին: Նրանց կմիանա նաև «Սթենդ-ափ» և «Երեկոյան Ազոյան» նախագծերից հայտնի Աղաս Մանուկյանը: