«Բազմաթիվ գեղեցկության մրցույթների եմ մասնակցել». երգչուհի Անուշիկ Ավագյանը Costa Blanca fashion week միջազգային մրցույթին կներկայացնի Հայաստանը

15:06 • 09.06.18

Շոուբիզնես

Tert.am Life-ն իր ընթերցողներին արդեն պատմել է, որ Իսպանիայում անցկացվող «Կոստա Բլանկա միջազգային նորաձևության դիզայներական շաբաթ» (Costa Blanca fashion week) մրցույթին Հայաստանից այս տարի 4 մասնակից է լինելու: Նրանց թվում է նաև երգչուհի Անուշիկ Ավագյանը:

Երգչուհին Tert.am Life-ի հետ զրուցել է իր մասնակցության, ավելի վաղ ունեցած մոդելային փորձի և մրցույթից հետո երաժշտական գործունեությունն ակտիվացնելու նպատակների մասին:

Անուշիկի խոսքով Costa Blanca Fashion Week –ին Հայաստանը ներկայացնելու առաջարկն իրեն միանգամից գրավել է: Երգչուհին ասաց, որ մոդելինգով վաղուց է զբաղվում:

«Նախկինում ավելի շատ որպես ֆոտոմոդել եմ ինձ դրսևորել, քանի որ հասակս 1.65 սմ-ից ցածր է: ՌԴ-ում ապրելու տարիներին բազմաթիվ գեղեցկության մրցույթների եմ մասնակցել: Այս առաջարկը ստանալիս էլ՝ մտածեցի, որ կարող եմ փորձել ու միգուցե հաղթեմ: Ես չեմ սիրում, երբ ասում են կարևորը մասնկացությունն է»,-ասաց երգչուհին:

Անուշիկը նշեց, որ դեռ երեք ամիս առաջ է սկսել նախապատրաստվել մրցույթին: Շաբաթը մի քանի օր այցելում է մարզասրահ, միաժամանակ մոդելային քայլքի դասընթացների է հաճախում: Նրա խոսքով, փորձելու է հնարավորինս լավ ներկայանալ մրցույթի բոլոր 4 փուլերում. «Արդեն իսկ ձևավորվել է պրոֆեսիոնալ թիմ՝ սկսած դիմահարդարից մինչև լուսանկարիչ, ում հետ աշխատում ենք: Կարծում եմ՝ կկարողանամ լավագույնս ներկայանալ, իսկ ինչ վերաբերում է հնարավոր քննադատություններին, որ երգչուհին ներկայանում է որպես մոդել, ապա ասեմ, որ համաշխարհային շատ մոդելներ կան, որոնք նաև երգչուհիներ են կամ դերասանուհիներ: Ոչ մի սահմանափակում չկա: Ավելին՝ իմ կարծիքով յուրաքանչյուր երգչուհի պետք է իրեն մոդելի նման դրսևորի: Դա և՛ լուրջ մասնագիտություն է, և՛ գեղեցիկ լինելու տարբերակ»:

Մրցույթից հետո, Անուշիկի խոսքով մոդելային աշխատանքով ավելի ակտիվ զբաղվելու նպատակներ չունի, փոխարենը ասում է, որ դա շարժառիթ կլինի տևական դադարից հետո երգարվեստում ակտիվանալու համար.

«Առաջին հերթին ես երգչուհի եմ և չորս տարեկանից բեմում եմ: Չնայած իմ ամենօրյա ակումբային աշխատանքին՝ ես կարծես մոռացել եմ նոր երգ ու տեսահոլովակ ներկայացնելը: Մրցույթն այդ տեսանկյունից ինձ համար շարժիչ ուժ կլինի: Իսպանիայից վերադառնալուց անպայման նոր երգ ու տեսահոլովակ կթողարկեմ»,-եզրափակեց նա: