«Ես հարուստի տղա չեմ». «Ոսկե դպրոցի» Բագրատը` անցած ուղու, երգչի կարիերա սկսելու և անձնական կյանքի մասին

Դերասան-երգիչ մասնագիտական համադրությունը լավագույնն է Հայկ Մուրադյանի համար, որը հեռուստադիտողներին ներկայանում է «Ոսկե դպրոց» սիթքոմում: Մինչ ընտանիքի անդամները քննարկում էին նրա մասնագիտության ընտրության հարցը, Հայկը որոշել ու ընդունվել է Թատերական ինստիտուտ: Ասում է՝  ծնողները հույս ունեին, որ որոշ ժամանակ անց կմտափոխվի, սակայն նա իր որոշման մեջ հաստատուն է եղել:

Tert.am Life-ը երիտասարդ դերասանի հետ զրուցել է հեռուստատեսությունում հայտնվելու, երգչի անհատական կարիերա սկսելու ծրագրերի ու անձնական կյանքին առնչվող թեմաների մասին:

23-ամյա դերասանը երկու տարի առաջ է ավարտել Թատերական ինստիտուտը: Ասում է՝ դերասանի մասնագիտությանը սիրահարվել է դեռ փոքր տարիքից, երբ սկսել է նկարահանվել մասսայական տեսարաններում, էպիզոդիկ դերերում: Ավելի ուշ, 3-րդ կուրսի ուսանողին նկատել են` տեսնելով նրա  լուսանկարը, հետաքրքրվել են ու գտել նրան։ 

«Լուսանկարներս տեսնելիս չգիտեին` դերասանական կրթություն ունե՞մ, թե ոչ: «Արմենիա» հեռուստաընկերության օպերատոր Գրիգոր Դավթյանից հետաքրքրվել էին, նա էլ հաստատել էր, որ Թատերական ինստիտուտում եմ սովորում: Հետո մի քանի ուսանողների համար քասթինգ իրականացրին, որը կարողացա անցնել։ Առաջին լուրջ դերակատարումը եղավ «Կայարան» հեռուստասերիալում,- պատմեց Հայկն ու ավելացրեց, որ ավելի ուշ «Ոսկե դպրոցում» նկարահանվելու առաջարկը ստացել է ադմինիստրատիվ խմբի կողմից։ –Սիթքոմի պրոդյուսեր Վաչե Թովմասյանի հետ խոսեցինք ընդհանուր սյուժեի, իմ կերպարի մասին, հետո տեղում անցա փորձնական նկարահանումը, մեկ ժամ անց ինձ զանգահարեցին ու ասացին, որ մասնակցությունս հաստատվել է»:

Հայկը փաստեց, որ ի  տարբերություն սիթքոմում իր հերոսի՝ Բագրատի, ինքը տեսակով հանգիստ է, տաքարյուն չէ, թեև հազվադեպ իրավիճակներում է այդպիսին դառնում: «Դպրոցում ես այդքան անկարգ չեմ եղել, ինչպես Բագրատը, ոչ էլ հարուստ մարդու տղա եմ:) Իմ ու կերպարիս միջև նմանություններ, գրեթե, չկան»,-ասաց նա և հավելեց, որ հենց դրանով էլ իր համար հետաքրքիր է խաղալ Բագրատի դերը:

Դերասանը նկատեց, որ իր մարմնավորած կերպարի վերաբերյալ բազմաթիվ դրական արձագանքներ է ստանում՝ հատկապես դպրոցահասակ երեխաների կողմից: Շատերն էլ, Հայկի խոսքով, հաճախ իրեն նույնացնում են Բագրատի հետ և օգնության կանչում։ «Մի այդպիսի դեպք եղավ, երբ նամակ ստացա տղա երեխայի կողմից, որը գրել էր՝ կռիվ ենք արել, կգա՞ս:) Շատ է պատահում, որ ինձ սիրավեպ են վերագրում սիթքոմի խաղընկերուհուս` Բագրատի ընկերուհուն մարմնավորող Իլոնայի հետ։ Երբեմն, այնպիսի բաներ եմ լսում, որոնք ընդհանրապես իրականության հետ կապ չունեն, որ իսկապես զարմանում եմ»:

Մինչև «Ոսկե դպրոցում» նկարահանվելը Հայկը մտերիմ է խաղընկերներից Եվա Զոհրաբյանի հետ, մյուսների հետ ծանոթացել է նկարահանման հրապարակում։ Ասում է` հասցրել է մտերմանալ բոլորի հետ: «Սիթքոմում, գրեթե, բոլորս մի տարիքային խմբից ենք, միևնույն սերնդից, ինչն  ավելի հետաքրքիր և հաճելի է դարձնում մեր աշխատանքը»,-ասաց նա:

Հեռուստատեսությունում հայտնվելուց հետո Հայկին շատերն են սկսել ճանաչել: Հայտնիությունը, երիտասարդ դերասանի համար հաճելի է, միևնույն ժամանակ, պարտավորեցնող: Ինչպես ինքն է ասում, հիմա իր վարքագծում որոշակի փոփոխություններ է  մտցրել. «Նախկինում, հնարավոր է, ավելի ազատ լինեի իմ վարքագծում, հիմա ավելի զգուշավոր եմ: Օրինակ՝ փողոցը միշտ անցումով եմ անցնում: Որևէ բան անելիս, միշտ մտածում եմ՝ հնարավոր է, ինչ-որ երեխա դա տեսնի ու իր համար օրինակ դառնա»:

Անդրադառնալով անձնական կյանքին՝ դերասանը նկատեց, որ 23 տարիների ընթացքում երբևէ չի սիրել, լուրջ հարաբերություններ չի ունեցել: Նա բացառում է, որ իր կողքին կարող է լինել ոչ խելացի աղջիկ, ինչպիսին իր հերոսի ընկերուհին է՝ Վիկան: «Իրականում ինձ այդ տեսակ աղջիկը չի կարող հետաքրքրել: Իմ կողքին պետք է լինի շատ համեստ, խելոք, միաժամանակ, խելացի աղջիկ»,- ասաց Հայկը:

Դերասանը նշեց, որ անձնական կյանքը դասավորելու մասին առյաժմ չի էլ մտածում, ավելի շատ զբաղված է մասնագիտական գործունեությամբ՝ շատ է ցանկանում նկարահանվել գեղարվեստական ֆիլմում: Հայկի ապագայի ծրագրերից է անհատական երգ ձայնագրելը, տեսահոլովակ նկարահանելն ու երգչի կարիերա սկսելը:

Չնայած մասնագիտական զբաղվածությանը, Հայկը նշեց, որ չի մոռանում սիրելի զբաղմունքների մասին, որոնցից մեկն էլ որսորդությունն է, սպորտով զբաղվելը: Վերջինը՝ իր դեպքում արդեն կենսակերպ է դարձել:

«Սպորտն իմ կյանքի անբաժան մասնիկն է, առանց մարզասրահ գնալու և մարզվելու չի ստացվում: Ես, ընդհանրապես, շատ եմ կարևորում առողջ ապրելակերպը թե՛ ֆիզիկական պատրաստվածության, թե՛ սննդակարգ պահելու առումով»,-եզրափակեց նա: