«Եթե հարցը չլուծվի, անիմաստ է մասնակցելս». Դավիթ Բադալյանը՝ Բրիտանական The Voice-ի նախընտրական փուլն անցնելու և առաջացած խնդրի մասին

17:07 • 11.06.18

Շոուբիզնես

Երգիչ Դավիթ Բադալյանն անցել է բրիտանական «Ձայնը» նախագծի լսումների փուլն ու Լոնդոն մեկնելու հրավեր ստացել: Երգիչը Tert.am Life-ի հետ խոսել է նախագծին մասնակցելու որոշման, մեկնելու հետ կապված դժվարությունների և իր սպասելիքների մասին:

Դավիթն ասաց, որ շատ վաղուց է երկպրագում բրիտանական The Vօice նախագիծը, ինչով էլ պայմանավորված է եղել մրցույթին հայտ ուղարկելը: Նա նախագծին ներկայացել է բեմական Neitz կեղծանունով և իր հեղինակային Run երգով:

«Վաղուց հետևում եմ Тhe Voice-ին: Նախագիծը կոնկրետ ԱՄՆ-ում ու Անգլիայում, իրոք, մեծ հնարավորություններ է բացում տաղանդավոր արտիստների առաջ: Նույնիսկ այն դեպքում, երբ դուրս ես մնում նախագծից, քեզ կարող են հետաքրքիր համարել ու մեծ շանս տալ: Շատ հայտնի արտիստներ հենց այս տեսակ նախագծերից են սկսել առաջին քայլերը, ինչպես օրինակ Zayn Malik-ը: Չեն հաղթել, բայց նկատվել են: Ես, իհարկե, միանգամից այսպիսի ակնկալիքներով չեմ մասնակցում, բայց ամեն դեպքում պետք է փորձել տեղից շարժվել»,-ասաց Դավիթը:

Դավիթը նշեց, որ նախագծին մասնակցելն իր համար առաջին հերթին մեծ փորձ ձեռք բերելու, նաև հայտնի արտիստների հետ աշխատելու, նոր կապեր հաստատելու հնարավորություն կլինի: Նրա կարծիքով` այն երաժշտությունը, որն ինքն է հեղինակում, դրսի շուկայում շատ ավելի մեծ պահանջարկ կունենա:

«Հայաստանում ամեն բան փոքր-ինչ ստաբիլ է, երգերի արտադրությունն էլ արագ չի զարգանում: Զուտ կոնտենտի պակաս կա, որը հնարավորություն չի տալիս դրսի շուկա մտնել: Դրսում մարդիկ տասն անգամ ավելի մեծ միջոցներ են ծախսում երաժշտական մարքեթինգի վրա: Հայաստանում դա իրենց կարող են թույլ տալ միայն մի քանի արտիստ: Մեծ մասն այդպիսի միջոցներ չունի: Հենց այդ պաճառով շատ տաղանդավոր արտիստներ, ինչպես է օրինակ, Գոռ Սուջյանը, չեն կարողանում իրենց երաժշտական կոնտենտը ստեղծել ու դրսի շուկա մտնել»,- ասաց նա:

Հուլիսի 1-ին Դավիթն արդեն Լոնդոնում պետք է լինի, սակայն մուտքի արտոնագրի հետ կապված խնդիր ունի: «Իրենք բիզնես վիզա են պահանջում, որն ինձ կարող է տրամադրել օրինակ՝ Անգլիայում բիզնես ունեցող ինչ-որ մեկը: Մենք արդեն նամակ ենք ուղարկել ՀՀ նախագահին, միգուցե, աջակցի այդ հարցում, բայց առայժմ որևէ արձագանք չկա: Ես շատ ընկերներ ունեմ, որոնք մասնկացել են նախագծին՝ չունենալով համապատասխան արտոնագիրը: Այդ պատճառով նրանք հնարավորություն չեն ունեցել նախագծի մյուս փուլեր անցնելու: Դա նախագծի կանոնակարգի մեջ է մտնում: Իրենք աշխատանքային պայմանագիր են կնքում այն արտիստի հետ, որն ունենում է Անգլիայում աշխատելու թույլտվություն»:

Երգչի խոսքով` The Voice-ի այս տարվա ժյուրիի ամբողջական կազմն առայժմ հայտնի չէ, բայց Will I am-ն ու Tom Jones-ը, ամենայն հավանականությամբ, կրկին կլինեն: Դավիթը հույս հայտնեց, որ արտոնագրի հետ կապված խնդիրը կլուծվի, հակառակ դեպքում, նախագծում իր ընտրվելը որևէ արդյունք չի ունենա: