«Ընտանեկան հանգստի դեպքում փոքր-ինչ կաշկանդված եմ լինում». Եվա Բաղդասարյանը՝ Լիա Զախարյանի հետ համատեղ հանգստի և երկրից մեկնելու մասին

Արև, տաք ավազ ու ծով. դերասանուհի Եվա Բաղդասարյանի համար հանգստի  լավագույն տարբերակը սա է: Թեև, Եվան դեռ աշխատանքային ռիթմի մեջ է, արդեն ծրագրել է՝ որտեղ և ում հետ է անցկացնելու ամառային հանգիստը: Դերասանուհին Tert.am Life-ին պատմել է այդ մասին և խոսել հանգստի` իր նախընտրելի տարբերակներից: 

Եվայի խոսքով` ամառն իր ամենասիրելի եղանակն է և հանգստի լավագույն ժամանակահատվածը: Այս տարի դերասանուհին որոշել է հանգիստն անցկացնել ծավափնյա երկրում։ «Օգոստոսի սկզբին ծրագրում եմ մեկնել կամ Վրաստան, կամ Եգիպտոս: Ուղղությունս դեռ վերջնական չեմ որոշել, բայց միանշանակա է, որ ծով եմ գնալու,-ասաց դերասանուհին և ավելացրեց, որ հավանաբար ընկերների հետ կմեկնի հնագստի,- Ի տարբերություն ընտանեկան հանգստի, որի դեպքում փոքր-ինչ կաշկանդված եմ լինում, ընկերուհիներիս հետ մեկնելիս ավելի ազատ եմ ինձ զգում: Ընդհանրապես, շատ եմ սիրում ճամփորդել։ Եթե ունենայի շատ գումար ու ժամանակ, կծախսեի միայն իմ ճանապարհորդության, նոր երկրներ տեսնելու ու հետաքրքիր վայրեր բացահայտելու վրա»:

Ծովափնյա հանգիստը Եվային գրավում է նաև գեղեցիկ արևայրուք ունենալու տեսանկյունից: Հենց այդ պատճառով էլ, նրա խոսքով, իր ճամպրուկում առաջնային տեղ են զբաղեցնում գեղեցիկ ու համաչափ արևայրուք ստանալու համար նախատեսված պարագաները:

«Ճամպրուկս դասավորելիս, անպայման փոքրիկ դեղատուփ էլ եմ վերցնում, որովհետև որևէ մեկս ապահովագրված չենք հնարավոր խնդիրներից, նաև շատ հագուստներ, գեղեցիկ լողազգեստներ լուսանկարվելու համար ու ամենակարևորը՝ գումար :)»:

Եվան նշեց, որ ոչ մի տարի ամառը չի անցկացրել առանց հանգստի: Դերասանուհու կարծիքով` դա չափազանց կարևոր է ուժերը վերականգնելու և ավելի մոտիվացված աշխատելու տեսանկյունից.  «Կարծում եմ` աշխատող մարդու համար 7-10 օրն էլ բավական է հանգստի համար: Եղել է տարի, երբ չեմ կարողացել որևէ տեղ մեկնել, Հայաստանի տարածքում եմ անցկացրել հանգիստս: Հիմա  ինձ այստեղ այդքան էլ հետաքրքիր չէ, գրեթե, բոլոր վայրերում եղել եմ: Ամիսներ առաջ էլ քույրիկս էր եկել ՌԴ-ից: Երկար ժամանակ Հայաստանում չէր եղել և միասին այցելեցինք բոլոր տեսարժան վայրերը քաղաքում ու քաղաքից դուրս»:

Դերասանուհին նշեց, որ հանգստի մեկնելիս նոր ծանոթություններ հաստատել խուսափում է, ծանոթանալու դեպքում էլ՝ շփումը վերադարձից հետո չի շարունակում: Եվան ասաց, որ վերջերս է վերադարձել Թբիլիսիից, որտեղ բնակվող շատ ծանոթներ ունի. «Քանի որ մոտ է, ընկերուհուս հետ հաճախ ենք գնում, վայելում մեր սիրելի վրացական խոհանոցն ու վերադառնում»:  

Դերասանուհու խոսքով` գրեթե ամեն շաբաթ, կիրակի օրերին մտերիմ ընկերուհիների հետ քաղաքից դուրս է գնում և ստանում հանգստի անհրաժեշտ չափաբաժինը, որը բավականացնում է ողջ շաբաթվա համար: Եվան համատեղ հանգստի մեծ փորձ ունի մտերիմ ընկերուհու՝ Լիա Զախարյաին հետ: Ասում է՝ այս տարի էլ հնարավոր է միասին հանգստի մեկնեն: «Լիայի հետ շատ ենք հանգստացել Հայաստանի տարածքում: Միասին շատ ուրախ ու հետաքրքիր է, չենք էլ նկատում՝ ինչպես է անցնում ժամանակը: Հիմնականում, այնքան ենք խոսում տարբեր թեմաներից, որ ինչ-որ բանով զբաղվել չենք էլ հասցնում:) Սիրում ենք միասին ֆիլմեր դիտել»,- ասաց Եվան և ավելացրեց, որ Լիայի հետ հաճախ նաև մասնագիտական հարցեր են քննարկում ու միմյանց խորհուրդներ տալիս:

Լիարժեք լիցքաթափվելու համար, այդուհանդերձ, դերասանուհին նախընտրում է Հայաստանից դուրս հանգիստն անցկացնել: Եվան հասցրել է լինել ՌԴ-ում, Ուկրաինայում ու Վրաստանում: Նա նշեց, որ ապագայում նպատակներ ունի նաև մշտական բնակության մեկնել Մոսկվա և այնտեղ շարունակել մասնագիտական գործունեությունը։ «Մոսկվան ինձ շատ է դուր եկել, քանի որ ես սիրում եմ աշխույժ քաղաքներ: Իհարկե, շատ քիչ ժամանակով եմ այնտեղ եղել, գուցե դեռ բացասական կողմերը չեմ բացահայտել, բայց հնարավորինս դրականն եմ ինձ հետ վերցրել: Այնտեղ կյանքն ավելի դինամիկ է ու նաև մասնագիտական առաջընթացի հնարավորություն կա»,-եզրափակեց նա: