«Հաշվի առնելով քննադատությունները` փոփոխություններ ենք արել». հայտնի է «Միսս հայուհի 2018»–ի անցկացման նոր կարգը

«Միսս հայուհի 2018» մրցույթի անցկացման կարգը հստակեցվել է։ Մրցույթի կազմակերպիչ Գոհար Հարությունյանը մանրամասներն առաջինը պատմել է Tert.am Life–ին ու հայտնել, որ այս տարի մրցույթն անցկացվելու է հեռուստատեսային տարբերակով, համագործակցելու են «Շանթ» հեռուստաընկերության հետ։

Միջոցառմանը ներկա է լինելու սահմանափակ քանակությամբ հանդիսատես` մոտ 500 հոգի։ «Որոշեցինք այս տարբերակով անցկացնել, քանի որ նախորդ տարի բավականին մեծ աշխատանք էինք արել, որպեսզի բեմում գեղեցիկ միջոցառում ունենայինք, սակայն այն ավելի շատ ուղղված էր հանդիսատեսին։ Հեռուստադիտողները տուժեցին, քանի որ ամբողջական տեսարանը չստացան, մինչդեռ մրցույթին հեռուստատեսությամբ հետևողների թիվն ավելի լայն մեծ էր»,– ասաց Գոհարն ու հավելեց, որ հեռուստադիտողներին կմատուցեն դիտարժան շոու։

Մրցույթին աղջիկները կներկայանան լողազգեստով, երեկոյան զգեստով և պարային համարով. «Այս տարի շեշտ ենք դրել խորեոգրաֆիայի վրա։ Աղջիկները կպարապեն մինչև մրցույթը։ Պարային համարի շնորհիվ նրանք ինքնադրսևորվելու հնարավորություն կունենան»։

«Միսս Հայաստան 1998»–ի տիտղոսակիրը նկատեց, որ մինչև մրցույթը 2 շաբաթ հեռուստադիտողին կներկայացնեն աղջիկների մասին պատմող տեսանյութեր և  «Միսս հայուհու» օրագրերը, որպեսզի մինչև մրցույթը հեռուստադիտողներն արդեն ծանոթ լինեն աղջիկներին, ունենան իրենց ֆավորիտները։

Ինչպես արդեն հայտնել ենք, Գոհարը ձեռք է բերել «Միսս աշխարհ» և «Միսս տիեզերք» մրցույթների բացառիկ արտոնագրերը, ըստ այդմ, իր կազմակերպած մրցույթի հաղթողն ու երկրորդ մրցանակակիրը կներկայացնեն Հայաստանը մրցույթներին։

Այս տարի կանցկացվի 2 մրցույթ։ «Հուլիսի 4–ին անցկացվելու է «Տաղանդի» մրցույթ` փակ միջոցառման ժամանակ աղջիկներն իրենց նախընտրությամբ կներկայացնեն իրենց տաղանդը։ Նրանք կներկայանան նաև մրցույթային բոլոր փուլերով` լողազգեստով, երեկոյան զգեստով և հարցազրույցով։ Այդ օրը կընտրվի «Միսս Տիեզերք–Արմենիա»  հաղթողը, որը, ինչպես խոստացել էինք, կներկայացնի Հայաստանը  «Միսս Տիեզերք»  մրցույթում։ Հաղթողը չի պայքարի «Միսս Հայուհի» տիտղոսի համար, քանի որ իրենց հաղթանակները հավասարազոր են լինելու։ «Միսս հայուհու» հաղթողն էլ ներկայացնելու է Հայաստանը «Միսս աշխարհում»։ Քանի որ 2 մրցույթ էլ կազմակերպվում է նոյեմբերին , մի մասնակիցը չի կարող մասնակցել 2 մրցույթին»,– ասաց Գոհարը և նկատեց, որ մինչև միջազգային մրցույթներին մեկնելն այս տարի ավելի շատ ժամանակ կունենան հաղթող մասնակիցների հետ աշխատելու համար։

Բացի հիմնական մրցանակները այս տարի կլինի միայն 2 անվանակարգ` «Միսս տաղանդ» և «Միսս համերաշխություն»: «Միսս տաղանդին» կընտրի հանձնաժողովը, իսկ «Միսս համերաշխությանը»՝ աղջիկները մրցույթից մեկ օր առաջ կայանալիք քվեարկության միջոցով:

Մրցույթի հայտագրումը կավարտվի հունիսի 15–ին։ Ժյուրին կընտրի 20-22 մասնակցի։ Գոհարի խոսքով` իրենք հաշվի են առել նախորդ տարվա առողջ քննադատություններն ու որոշակի շտկումներ արել։ «Այս տարի աղջիկները կներկայանան միանման լողազգեստներով, որպեսզի լինեն հավասար դիօրքերում։ Երեկոյան զգեստները միանման լինել չեն կարող, քանի որ այդ դեպքում շոուն անհետաքրքիր կլինի։ Մարդիկ գեղագիտական հաճույք չեն ստանա։ Շատ քննարկվեցին նաև կոշիկները։ Այս անգամ ևս ընտրել ենք բարձրակրունկ կոշիկներ, սակայն ընտրել ենք «Միսս Տիեզերքի» կոշիկի մոդելները, որոնք ավելի նուրբ են»,– ասաց Գոհարն ու հավելեց, որ աղջիկներն իրենց մասին պատմող տեսանյութերում կներկայանան հնարավորինս բնական տեսքով։

Ամենայն հավանականությամբ, այս դեպքում ևս աղջիկները 2 շաբաթ կապրեն միասին։ Գոհարի խոսքով, եթե անգամ, Երևանի աղջիկները մնան իրենց տանը, Սփյուռքից և մարզերից ժամանած աղջիկները միասին կապրեն։

«Միսս հայուհի» մրցույթի նախընտրական փուլն անցած առաջին 7 մասնակցին կարող եք տեսնել այստեղ։