«Նա միշտ մտածում էր, որ ամեն բան լավ է լինելու». Կարգին Հասոն այսօր կդառնար 38 տարեկան

15:20 • 13.06.18

Շոուբիզնես

Դերասանուհի Հասմիկ Ղարիբյանը՝ Կարգին Հասոն, այսօր կդառնար 38 տարեկան: Նրա անժամանակ կորստի հետ գործընկերները մինչև այսօր դժվարանում են հաշտվել: Tert.am Life-ը Հասմիկի մտերիմ ընկեր, դերասան Անդրանիկ Հարությունյանի հետ զրուցել է Հայաստանում դերասանուհու անցկացրած վերջին ծննդյան օրվա, իրենց ունեցած ուրախ օրերի ու Հասմիկի կիսատ մնացած երազանքի մասին:

Անդոյի խոսքով` Հասմիկն իր ծննդյան օրը շատ էր սիրում, ասում է` առհասարակ նա կյանքն էր սիրում ու ամեն օրը փորձում էր տոնի վերածել:

«Հասմիկը շատ դրական մարդ էր, մեր հուշերում հենց այդպիսին էլ մնացել է: Նրա նիստուկացը, ապրելակերպն այնպիսին էին, կարծես, ամեն օր իր ծնունդը լիներ: Միշտ լավ մտքերով էր լցված, միշտ մտածում էր, որ ամեն բան լավ է լինելու։ Երբ իմացանք նրա առողջական խնդրի մասին, շոկի մեջ էինք, որովհետև չէինք պատկերացնում այդքան դրական մարդուն այդպիսի հիվանդությամբ,-ասաց Անդոն ու ավելացրեց, որ Հայաստանում Հասմիկի անցկացրած վերջին ծննդյան օրը շատ հետաքրքիր է անցել,-Նա ծնունդը նշեց հենց այն վայրում, որտեղ իմ հարսանիքն էինք նշել: Շատ տպավորիչ և ուրախ օր ունեցանք»:

Անդոն ասաց, որ Հասմիկը կյանքի վերջին տարիներին ընտանիք կազմելու և երեխաներ ունենալու մեծ երազանք ուներ: Նա հասցրեց մասամբ իրականացնել երազանքը, բայց չարաբաստիկ հիվանդությունը թույլ չտվեց երջանկությունը երկար վայելել: Անդոն հիշում է ԱՄՆ հյուրախաղերի մեկնելիս են իմացել, որ Հասմիկն ամուսնանալու է ու մշտական բնակություն հաստատի այնտեղ։

«Նրա ամուսնությունից հետո էլ կապը մշտապես պահում էինք: Իր մահվանից ամիսներ առաջ ԱՄՆ էինք մեկնել, սակայն իր հետ հանդիպել այդպես էլ չհաջողվեց: Զանգում էինք, ասում էինք` Հաս ջան, ուզում ենք քեզ տեսնել, անընդհատ ասում էր` հարմար չէ, ամեն կերպ խուսափում էր հանդիպումից: Երևի չէր ուզում իրեն հյուծված ու վատառողջ վիճակում տեսնենք։ Երևի, ճիշտը դա էր»:

Անդոն նշեց, որ մինչև օրս կապ են պահպանում Հասմիկի ամուսնու հետ: Նրա խոսքով` ինքն այս տարիների ընթացքում չի կարողացել հավատալ Հասմիկի ֆիզիկական բացակայությանը:

«Հիմա էլ, երբ դիտում եմ «Կարգին հաղորդումը», այնպիսի տպավորություն է, որ Հասմիկը կա: Կարգինի տղաներն այնպիսի բան ստեղծեցին, որ միշտ հնարավորություն ունենանք Հասմիկին տեսնելու իր հումորային, դրական կերպարներով: Նա չի մոռացվի: Ես հիմա էլ մտածում եմ, որ ինքը կա, ուղղակի ժամանակ չենք ունենում իրար տեսնելու»,- ասաց նա:

Անդոյի խոսքով` Հասմիկը հպարտորեն էր կրում «Կարգին Հասո» անունը, իր համար դա հաճելի էր: Դերասանը նշեց, որ Հասմիկի հետ ամեն օրն էր տպավորիչ ու հիշվող: Իրենք նաև ընտանիքներով են մտերիմ եղել ու հաճախ են հանդիպումներ կազմակերպել: «Ժամանակ առ ժամանակ երեկոները, երբ ոչինչ չէինք ունենում անելու, զանգում էինք իրար ու հանդիպում Հալաբյան փողոցում: Թումանյանի այգու մոտ սրճարան կար, այնտեղ նստում էինք, թեյ խմում, զրուցում տարբեր թեմաների մասին: Նրա հետ հետաքրքիր պահեր շատ ենք ունեցել: «No comment» ներկայացման մեջ ես ու Հասմիկը 3–4 տեսարանում էինք խաղում: Ներկայացման ժամանակ կուլիսներում բուռն քննարկման մեջ մտանք, ասում, խոսում ու ծիծաղում էինք, հետո հասկացանք, որ արդեն մեր տեսարանի ժամանակն է, մեր բեմելից 2-3 րոպե ուշացել ենք»,- հիշեց Անդոն: