«Ընկերներիս հաջողվեց ինձ խաբել». Բեն Ավետիսյանը՝ 27-ամյակի անակնկալի և հոլիվուդյան ֆիլմում նկարահանվելու առաջարկի մասին

Երեկ՝ հունիսի 13-ին, դերասան Բեն Ավետիսյանը երևանյան ռեստորաններից մեկում նշել է ծննդյան 27-ամյակը: Դերասանն ասում  է, որ ինչպես նախորդ տարի, այս տարի ևս տարեդարձը նշելու ծրագիր չունեցել, ինքն անակնկալ կերպով հրավիրվել է իր ծննդյան խնջույքին:

Tert.am Life-ի հետ զրույցում Բենը պատմեց ընկերների մատուցած անակնկալի, ստացած նվերների, ինչպես նաև այս տարվա մասնագիտական կարևորագույն ձեռքբերման մասին: Բենը նկատեց, որ ծննդյան օրը նշել չի սիրում, տարեդարձից մի քանի օր առաջ դեպրեսիվ վիճակում է հայտնվում, սակայն ինչպես նախորդ տարի, այս տարի ևս ընկերները անակնկալ հավաքույթ են կազկակերպել նրա համար:

«Ծննդյանս օրը, կեսգիշերն անց տանից դուրս եկա, բոլոր ընկերներիս ասելի էի, որ գործեր ունեմ, որպեսզի որևէ մեկի մտքով չանցներ անակնկալ անել: Ես չեմ սիրում այդ օրը և փորձում եմ ուշադրության կենտրոնում չլինել, սակայն այս տարի էլ ընկերներիս հաջողվեց ինձ խաբել: Ընկերներիցս մեկը՝ Գարիկ Սաֆարյանը, գաղտնի խնջույք էր կազմակերպել, հրավիրել իմ բոլոր մտերիմ մարդկանց, գործընկերներին, ընդ որում՝ հենց այնտեղ, որտեղ նախորդ տարի էլ էին նույնպիսի անակնկալ մատուցել, բայց այս տարի ավելի հետաքրքիր էր»,-պատմեց Բենը:

Ծննդյան հավաքույթին հայտնի հյուրերից ներկա են եղել Բենի գործընկեր դերասանները «Երևի» հեռուստասերիալից՝ ռեժիսոր Վահե Սայանը, Շուշաննա Թովմասյանը, Ջուլիա Եղշատյանը, Սարգիս Ավետիսյանը և այլք:

Առաջին շնորհավորանքը դերասանը ստացել է մայրիկի կողմից՝ հեռախոսազանգով, արդեն երեկոյան բազմաթիվ շնորհավորանքներ, մաղթանքներ ու նվերներ է ստացել ընկերների կողմից խնջույքի սեղանի շուրջ. «Այս տարի ինձ մաղթել են նպատակների իրականացում, քանի որ ինձ ճանաչողները գիտեն, որ տեսակով նպատակասլաց եմ, և դա ինձ համար կարևոր մաղթանք է: Իսկ ինձ ուղղված ամենակարևոր մաղթանքը ծնողներիս առողջությունն է: Ինքս ինձ էլ ամեն տարի ծննդյանս օրը դա եմ մաղթում»:  

Բենն իր ստացած նվերներից որևէ մեկը չառանձնացրեց, միայն թվարկեց մի քանիսը՝ թևնոց, ոսկյա շղթա, գումար:

Դերասանն ասաց, որ 27 տարեկանում ավելի շատ գործնական նպատակներ է իր առաջ դրել, իսկ իր վաղեմի երազանքներից մեկը շուտով իրականություն կդառնա: Խոսքն ամերիկյան կինոասպարեզում հայտնվելու մասին է, որտեղից Բենն արդեն առաջարկ է ստացել:

«Երբ մեկնել էի ԱՄՆ, այցելեցի և գրանցվեցի Լոս Անջելեսում գտնվող մի ստուդիայում, որը համագործակցում է հոլիվուդյան կինոարտադրողների հետ: Պարզապես, լեզվի խնդիր առաջացավ, քանի որ ինձ ասացին, որ պետք է վարժ տիրապետեմ անգլերենին, երբ արդեն վերադարձել էի Հայաստան, զանգահարեցին ու ասացին, որ ինձ համար հայ մասնագետ են գտել, որն ինձ կօգնի հաղորդկացման հարցում: 10 օր առաջ այնտեղից զանգ ստացա, ասացին, որ ինձ հրավիրում են հոլիվուդյան ֆիլմում նկարահանվելու: Դեռ չեմ կարող ասել՝ ինչ ֆիլմ է, քանի որ ինքս էլ մանրամասներին տեղյակ չեմ, բայց այս հնարավորությունը բաց չեմ թողնի: Այդ ստուդիայի տնօրենը շատ էր հավանել ինձ՝ որպես դերասան, ասաց՝ ինձ թվում է դու մեծ դերեր կունենաս»,-ոգևորությամբ ասաց Բենը:

Մասնագիտական հաջողության կողքին, դերասանը նկատեեց, որ անձնական կյանքում առայժմ որևէ նորություն չունի. «Ընթացիկ հարաբերություններ լինում են, բայց ոչ մի փոփոխություն չկա»,-եզրափակեց նա: