«Ամեն ինչ շատ նուրբ ու գեղեցիկ է». Կարեն Ասլանյանը` նոր սերիալի և Մարիամ Ալեքսանյանի հետ համբույրի տեսարանների մասին

Հուլիսի 2–ից «Շանթ Պրեմիում» հեռուստաալիքի եթերում կմեկնարկի «Այրված անուրջներ» նոր հեռուստասերիալը, որտեղ խաղում են Կարեն Ասլանյանը, Մարիամ Ալեքսանյանը, Ժաննա Բուտուլյանը, Յուլյա Ֆինկը, Տիգրան Ներսիսյանը, Անի Պետրոսյանը, Սուրեն Առուստամյանը և այլք։

Հեռուստանովելի գլխավոր դերակատար Կարեն Ասլանյանը նոր աշխատանքի մասին առաջին անդրադարձը վստահել է Tert.am Life–ին և պատմել, որ սպասվող հեռուստանախագիծը տարբերվում է մյուս սերիալներից, քանի որ, լինելով երկարատև սերիալ, ունի ամբողջական սյուժե։

Պատմությունը ծավալվում է ուսանող ընկերների միջև, սիրային եռանկյունի է ձևավորվում Կարեն Ասլանյանի, Մարիամ Ալեքսանյանի և Ժաննա Բուտոււլյանի հերոսների միջև։  Կարենի և Մարիամի կերպարները սիրում են իրար, նախագիծը մեկնարկում է նրանց հարսանիքով, որը, սակայն, չեղյալ է համարվում։ Թե ինչու, դերասանը չի բացահայտում, որպեսզի հեռուստադիտողների համար առավել հետաքրքիր լինի։

Կարենի խոսքով` այս առաջարկն ընդունել է, քանի որ սցենարը շատ գրավիչ էր իր համար։ «Լևոնն ապահոված ընտանիքի  տղա է, կուրսում ցանկալի փեսացու է, և նրան փորձում են խանգարել ամուսնանալ։ Խափանված հարսանիքն ու դրան հաջորդած մի շարք իրադարձությունները շատ են հասունացնում կերպարիս։ Ինձ համար շատ հետաքրքիր է խաղալ այս դերը»,– ընդգծեց Կարենը։

Կերպարից կերպար անցնելիս Կարենի համար շատ կարևոր է նորովի ներկայանալը։ Նրա խոսքով` ամեն անգամ փորձում է «Որպես գլխավոր դեր` սա իմ 5-րդ հեռուստասերիալն է, ինչը քիչ չէ։  Ինձ համար շատ  կարևոր է, որ դերերս տարբերվեն իրարից։ Երբ «Առաջնորդներում» Արամիկ խաղալուց հետո «Դեպի երազանքում» մարմնավորեցի Արմանին, կերպարներն այնքան տարբեր էին, մարդիկ, նույնիսկ, ասում էին` սա ուրիշ դերասան է։ Ինձ համար գերխնդիր է, որ կերպարներս իրար չնմանվեն։ Կարծում եմ` կարողացել եմ Լևոնին էլ այնպես մարմնավորել, որ  չնմանվի մյուս կերպարներիս»,– նշեց Կարենը։

Թեև վերջին տարիների Կարենը ներկայանում էր «Արմենիա TV»–ում, «Շանթ» հեռուստաընկերություն տեղափոխվելը դերասանի համար բնականոն էր։ Ժամանակին նա իր առաջին գլխավոր դերը խաղացել է «Անցյալի ստվերներ» հեռուստասերիալում, այնպես որ, սա վերադարձ է հարազատ միջավայր։ «Մեզ մոտ այնքան լավ մթնոլորտ է, որ ես ոչ թե աշխատանքի եմ գնում, այլ լավ ժամանակ անցկացնելու, զուգահեռ նկարահանվելու»,– նկատեց դերասանը։

Խոսելով երկու խաղընկերուհիների` Ժաննա Բուտուլյանի և Մարիամ Ալեքսանյանի մասին` Կարենը նշեց, որ նրանց հետ աշխատանքը շատ հեշտ է ստացվում. «Ժաննայի հետ խաղալու ավելի քան 3 տարվա փորձ ունենք, կես խոսքից հասկանում ենք իրար»։

Անդրադառնալով Մարիամին` նա նշեց, որ վերջինս շատ լավ դերասանուհի է, որը շատ լավ հասկանում է` ինչպես է պետք խաղալ։ «Մեզ մոտ շատ լավ է ստացվում սիրային զույգի մարմնավորելը։ Կարծում եմ` հեռուստադիտողները Լևոնին և Սոնային կընկալեն որպես սիրային զույգ»,– ասաց նա։ Կարենի ու Մարիամի կերպարներն  ունեն համբույրի և բաց տեսարաններ։ Բաց տեսարաններում Մարիամի փոխարեն նկարահանվել է կրկնօրինակող (դուբլյոր), համբույրի տեսարանները Մարիամի հետ են։ Դերասանը վստահեցնում է` ռեժիսորների շնորհիվ նման տեսարանները նկարահանվել են շատ  նուրբ ու գեղեցիկ. «Կարծում եմ` համբույրի իմիտացիա անելը ճիշտ չէ։ Չես կարող խաբել հեռուստադիտողներին, համոզել, որ սիրում եք իրար, եթե չկան նման  տեսարաններ։ Զույգը պետք է ցույց տա իր զգացմունքները, սակայն ոչ գռեհիկ ձևով»։