Նորա Գրիգորյանը և Ռոբերտ Հակոբյանը՝ Ստանիսլավսկու անվան թատրոնի գեղարվեստական ղեկավարի պաշտոնում առաջադրվելու և առաջացած լարվածության մասին

13:08 • 16.06.18

Շոուբիզնես

Կոնստանտին Ստանիսլավսկու անվան ռուսական դրամատիկական թատրոնում հունիսի 21-ին նշանակված է թատրոնի գեղարվեստական ղեկավարի ընտրությունը: Այս պաշտոնում իրենց թեկնածությունն առաջադրել են ռեժիսոր Նորա Գրիգորյանը և նույն թատրոնի դերասան Ռոբերտ Հակոբյանը: Tert.am Life-ը զրուցել է նրանց հետ, պարզել, թե ինչու է գեղարվեստական ղեկավարի նշանակման հարցը դարձել հակասությունների պատճառ և որոշակի լարվածություն առաջացրել թատրոնում:

Մեզ հետ զրույցում, Ստանսիլավսու անվան թատրոնի նախկին գեղարվեստական ղեկավար Ալեքսանդր Գրիգորյանի դուստրը՝ Նորան, ասաց, որ հոր մահից հետո որևէ հավակնություն չի ունեցել այդ պաշտոնին նշանակվելու համար, պարզապես ակտիվ աշխատել է որպես ռեժիսոր և բեմադրել տարբեր ներկայացումներ:

«Ի սկզբանե խոսակցություները գնում էին գլխավոր ռեժիսորի նշանակման մասին: Ես իմ թեկնածությունը ցանկացել եմ առաջադրել հենց այդ պաշտոնում, իսկ գեղարվեստական ղեկավարի պաշտոնում առաջադրվել եմ այն բանից հետո, երբ իմացել եմ, որ Ռոբերտ Հակոբյանը նույնպես հավակնում է այդ պաշտոնին: Նա էլ ասում է՝ իբրև ինձ խանգարելու համար է այդ քայլին գնացել: Դա ինձ համար շատ ծիծաղելի է: Երբ նա մտավ ու ասաց, որ իրենից բացի ուրիշ մարդու չի պատկերացնում այդ պաշտոնում, դա արդեն նրա ինքնասիրահարվածության աստիճանն է ցույց տալիս: Ներողություն, բայց ես իրեն չեմ տեսնում այդ պաշտոնում: Միգուցե, ես երիտասարդ եմ, բայց ունեմ կոլեկտիվի հետ աշխատելու փորձ, բազմաթիվ բեմադրություններ, և գուցե նաև գենետիկան էլ դեր ունի: Դա էլ կարելի է հաշվի առնել այն ժամանակ, երբ նա խոսում է կլանային մոտեցմամբ առաջնորդվելու մասին: Եթե հայրիկս իր կենդանության օրոք ինձ նշանակեր գեղարվեստական ղեկավարի պաշտոնում, գուցե կլանային մոտեցման մասին խոսելը տեղին լիներ: Հորս 52 տարվա ղեկավարման փորձը փնովելը, չարախոսելը այն ղեկավարի մասին, ով ընդամենը մեկ դերով նրան դարձրել է վաստակավոր դերասան, կարծում եմ, ճիշտ չէ: Նույն կերպ ես կարող եմ ասել Ռոբերտ Հակոբյանի մասին, որ նա հայտարարել է՝ գեղարվեստական ղեկավարի պաշտոնում ընտրվելուց հետո իր աղջկան անպայման հրավիրելու է մեր թատրոն աշխատելու»,-ասաց Նորան:

Նրա խոսքով, թատրոնում այդքան էլ նորմալ մթնոլորտ չէ, թեև ներկայացումների փորձերը շարունակվում են: Նորայի կարծիքով ամեն բան կկարգավորվի միայն գեղարվեստական ղեկավարի ընտրությունից հետո: Նա ասաց, որ ընտրության սկզբունքով հարցը լուծելը Մշակույթի նախարարության հանձնարարականն է, իսկ թե ինչպիսի ընտրակարգ է լինելու, առայժմ հայտնի չէ: Դա կորոշի թատրոնի տնօրեն Ֆրեդ Դավթյանը:

«Ես հիմա թատրոն շատ քիչ եմ գնում, որովհետև չեմ ուզում ձայներ հավաքողի տպավորություն թողնել: Ես առաջարկել եմ պիես և եթե գեղարվեստական խորհուրդը հաստատի, պատրաստ եմ բոլոր դերասանների հետ աշխատել: Շատերն ինձ արդեն ասում են, որ աջակցելու են իմ թեկնածությունը: Ես ներկայացնելու եմ հստակ ծրագիր, իսկ եթե չկարողանամ իրականացնել այդ ծրագրում առկա դրույթները, պատրաստ եմ թողնել այդ պաշտոնը»,-ասաց նա:

Tert.am Life-ը թեմայի վերաբերյալ զրուցեց նաև գեղարվեստական ղեկավարի մյուս թեկնածուի՝ Ստանիսլավսկու անվան թատրոնի դերասան Ռոբերտ Հակոբյանի հետ: Վերջինս էլ նշեց՝ իր թեկնածությունն այս պաշտոնում առաջադրել է, որպեսզի այլընտրանք լինի Նորա Գրիգորյանին. «Ես ոչ թե ասել եմ, որ միակն ու անկրկնելին եմ այդ պաշտոնի համար, ինչպես շատերը գրում են, այլ պարզապես առաջադրել եմ իմ թեկնածությունը, քանի որ հասկացա՝ Նորա Գրիգորյանը միակն է, իսկ ես չեմ կարծում, որ նա կարող է զբաղվել այդ պաշտոնով»:

Նորա Գրիգորյանի թեկնածությանը դեմ լինելու հիմնական պատճառը, դերասանի խոսքով, նրա մասնագիտական որակների հետ է կապված և անձնական որևէ լարվածություն չկա:

«Մտավախությունները միայն նրա մասնագիտական պատրաստվածության տեսանկյունից են: Իմ սուբյեկտիվ կարծիքով այդ պաշտոնը չպետք է անցնի հորից աղջկան և այդ կլանային մոտեցմանը ես դեմ եմ: Ընդհանրապես բոլոր թատրոնների մասին է խոսքս,-ասաց նա և ավելացրեց, որ թատրոնում ակտիվ գործունեությունը դեռ մասնագիտական պատրաստվածոթւյան մասին չի խոսում,- բազմաիթվ ակտիվ մարդկանց եմ տեսել: Նորան մոտավորապես 10 մանկական ներկայացում է բեմադրել, բայց կարևորը քանակը չէ, այլ որակը: Ակտիվությունը ոչ ոք չի անտեսում, բոլորս էլ ակտիվ ենք թատրոնում, բայց միայն դրանով պետք չէ առաջնորդվել: Ներկայացումը չպետք է մի խաղաշրջան ապրի, հետո հանվի: Նորա Գրիգորյանից բացի ոնր ռեժիսոր թատրոն չի եկել, որ գոնե տարբերությունը զգացվի»:

Անդրադառնալով հարցին, թե արդյոք ինքը հայտարարել է, որ պատրաստվում է ընտրվելուց հետո դստերը թատրոն հրավիրել, դերասանը ասաց. « Չեմ հայտարարել նման բան: Աղջիկս Թատերական ինստիտուտի առաջին կուրսում է սովորում, դեռ շուտ է իր գալը: Բայց եթե գեղարվետսական խորհուրդն իր հավանությունը կտա, ինչու ոչ, թող կանչեն: Չե՞ն ասել, որ կնոջս էլ եմ ուզում թատրոն բերել: Կարելի է այնպիսի բաներից խոսել, որոնք ճշմարտություն են: Կնոջս չեմ բերի, ինքն իր թատրոնից չի էլ գա, իսկ աղջիկս կգա, երբ իրեն կվստահեն: Եթե կարդարացնի այդ վստահությունը՝ ինչու ոչ»,-եզրափակեց դերասանը:

Հեղինակ Անահիտ Հակոբյան