«Մաղթում եմ, որ կարողանա գերազանցել ինձ». Կարեն Ասլանյանը` Ալեքսանդր Բաբասյանի հայտարարության և իրենց հարաբերությունների մասին

Tert.am Life–ն իր ընթերցողներին հայտնել է, որ սեպտեմբերի 3–ից Ucom ցանցում գործող «Արմենիա Պրեմիում» հեռուստաալիքի եթերում կմեկնարկի «Դեպի երազանք 2»  25 մասանոց հեռուստասերիալը։ Երկրորդ նախագծում չի խաղա գլխավոր դերակատար Կարեն Ասլանյանը։ Նրա կերպարը, ըստ սցենարի, մահանում է։ Հերոսուհու կողքին հայտնվում է նոր տղամարդ, որին մարմնավորում է Ալեքսանդր Բաբասյանը։

Նախագծի պրոդյուսեր Արմեն Պետրոսյանը մեզ հայտնել էր, որ Կարենը չի կարողացել մասնակցել նախագծին, քանի որ պայմանագիր ունի «Շանթ» հեռուստաընկերության հետ՝ «Այրված անուրջներ» սերիալի շրջանակում։ 

Tert.am Life–ի հետ զրույցում Կարենն առաջին անգամ խոսել է «Դեպի երազանքում» չխաղալու մասին և արձագանքել դերասան Ալեքսանդր Բաբասյանի հայտնած տեսակետին, որ իր և Քրիստինա Եղոյանի տանդեմն ավելի լավ է ստացվելու, քան եղել է Քրիստինայի և Կարենի դեպքում է եղել։

«Ափսոսում եմ, որ չեմ խաղալու «Դեպի երազանք 2»–ում, որովհետև սիրում էի այս նախագիծն ու Արմանի կերպարը։ Բացի այն, որ ես պայմանագիր ունեմ «Շանթի» հետ, նաև հասկանում եմ, որ չես կարող միաժամանակ երկու գործն էլ լավ անել։ Ինքս գործին մոտենում եմ պրոֆեսիոնալ և գիտակցում եմ, չես կարող գնալ նկարահանման, կերպար խաղալ, հետո վազել մի ուրիշ տեղ ու այլ կերպար խաղալ։ Ժամանակին ունեցել եմ նման փորձ և հասկացել եմ, որ ավելի ճիշտ է լինել մի նախագծում։ Կերպարի մեջ մտնելու, այն ապրելու խնդիր կա,– ասաց Կարենը։

Անդրադառնալով Ալեքսանդր Բաբասյանի հայտնած տեսակետին, որ ինքն ու Քրիստինան ավելի լավ զույգ կլինեն, Կարենը նկատեց, որ եթե նախագիծը երկրորդ մաս է ունենալու, նշանակում է, որ առաջին եթերաշրջանը հաջողված է եղել։ 

«Ցանկանում եմ, որ երկրորդ եթերաշրջանը  նույնչափ  ստացված լինի։ Վատ չէ, երբ  մարդը ցանկություն ունի գերազանցելու մյուսին։ Արդյոք դա կստացվի՞, թե՞ ոչ,  կորոշվի ժողովուրդը։ Ոչ Ալեքսանդր Բաբասյանը կարող է որոշել, որ իրենք լավ զույգ կլինեն , ոչ էլ ես կամ Քրիստինան։ Ես միայն կարող եմ նկատել, որ Արմանն ու Նարեն այնքան հաջողված ու լավ զույգ են եղել, որ հնարավորություն են տվել, որպեսզի նկարահանվի «Դեպի երազանք 2»–ը։ Ես մաղթում եմ, որ  Ալեքսանդր Բաբասյանը կարողանա գերազանցել ինձ և ունենա ավելի լավ զույգ»,– ասաց նա։

Կարենի խոսքով` նման հայտարարությունները չեն անդրադառնում իրենց անձնական հարաբերությունների վրա. «Սաշը նշել է, ես էլ եմ ասում, որ նա իմ շատ մտերիմ ընկերն է։ Մենք  հաճախ ենք հանդիպում։ Ես այդ խոսքերի մեջ խնդիր չեմ տեսնում։ Բնականաբար, ամեն մարդ ուզում է գերազանցել մյուսին։ Կստացվի՞, թե՞ ոչ, կորոշի ժողովուրդը»։