Մանսուրյանի գնահատականը Հայկոյին, «Հարսանիք թիկունքում» ներկայացման տոմսերի մեծ վաճառքն ու Երևանում սպասվող պրեմիերան

Պատերազմող երկրի թիկունքի մասին պատմություն ստեղծելու ցանկությունը Գյումրու Վարդան Աճեմյանի անվան դրամատիկական թատրոնում վերածվեց նոր ներկայացման`«Հարսանիք թիկունքում» խորագրով, որն արդեն 4 անգամ խաղացել են Գյումրիում։ Հերթը Երևանինն է։

Tert.am Life-ը ներկայացման գրանցած հաջողության, հանդիսատեսի բուռն արձագանքի ու այն Երևանում խաղալու մասին խոսել է  Գյումրու դրամատիկական թատրոնի տնօրեն Տիգրան Վիրաբյանի հետ:

Ներկայացման հիմքում մի ընտանիքի պատմություն է, որի միջոցով ներկայացվում է այն, ինչ կատարվել է Ապրիլյան պատերազմի թիկունքում: Դրամատուրգ Անահիտ Աղասարյանի՝ «Ապրիլ և ապրել» պիեսը գրվել է հենց Գյումրու դրամատիկական թտարոնի պատվերով: Ներկայացման  ռեժիսորը Լյուդվիգ Հարությունյանն է:

«Տարեկան ունենալով մոտ 40-45 հազար հանդիսատես՝ Գյումրու թատրոնը չէր կարող չխոսել այդ թեմայի մասին: Թատրոնի յուրահատկությունն այն է,  որ դու կարողանում ենք ժամանակի շնչով ապրել: Մենք ունենք նաև պատանի հանդիսատես, որին չենք կարող չդաստիարակել ռազմահայրենասիրական ոգով: Գլխավոր ռեժիսորի հետ խոսելիս ի սկզբանե հասկացանք, որ թիկունքի մասին պատմություն պետք է ստեղծենք, որովհետև հիշում եք՝ այդ օրերին թիկունքը որքան կարևոր էր ու ամուր: Ես անընդհատ համեմատություն եմ անում Ալբերտ Մկրտչյանի «Հին օրերի երգը» ֆիլմի հետ, որտեղ նույնպես պատմությունը թիկունքի մասին էր, բայց որքան պատերազմ կա, վառոդի հոտ կա այդ ֆիլմում։ Նույնն այստեղ է, մեկուկես ժամ հանդիսատեսը դահլիճում զգում է վառոդի հոտը: Ներկայացումը դիտել են նաև Ապրիլյան պատերզմի ժամանակ զոհված ու վիրավորված տղաների ծնողները: Ամեն ծնող ներկայացման մեջ գտնում է իր երեխային, ամեն մարդ գտնում է մի հերոսի, որին նմանեցնում է իր հարևանին կամ բարեկամին»,-ասաց Տիգրան Վիրաբյանը:

Նրա խոսքով`  այս ներկայացման հանդեպ հանդիսատեսի ունեցած հետաքրքրությանը նպաստել է ոչ միայն ընտրված թեման, այլև ստեղծագործական խումբը, որն հավաքվել է նախագծի շուրջ: Ներկայացման համար գրվել է հատուկ երաժշտություն, որի հեղինակը երգիչ, երգահան Հայկոն է: Նկարչական ձևավորումը վստահվել է Գարեգին Եվանգուլյանին, զգեստների ձևավորումը՝ Լուսինե Խաչատրյանին: Ներկայացման մեջ ընդգրկված են թատրոնի երեք սերնդի ներկայացուցիչներ ու թատերական ինստիտուտի ուսանողներ` 25-30 դերասան՝ ՀՀ ժողովրդական արտիստ, պետական մրցանակի դափնեկիր Անահիտ Քոչարյանը, ՀՀ վաստակավոր արտիստ Սուսաննա Բաղդասարյանը, ՀՀ վաստակավոր արտիստ Հովհաննես Հովհաննիսյանը, միջին սերնդի դերասաններից՝ ՀՀ վաստակավոր արտիստ Տիգրան Գաբոյանը, Նառա Սանթոյանը, երիտասարդ դերասաններից՝ Տարոն Գրիգորյանը, Ջեմմա Ադամյանը և այլք:

«Հուրախություն մեզ, ինչպես այսօրվա, այնպես էլ առաջիկա հինգ ներկայացումների տոմսերն արդեն սպառված են: Սա  խոսում է այն մասին, որ այս նախագիծը հաջողված է: Այս օրերին մենք 100-150 հյուրեր ունենում ենք նաև մայրաքաղաքից: Մեր ընկերներից մեկը կատակով ասում է ՝ դարձել ենք տուրիստական գործակալություն, անընդհատ հյուրանոցներում համարներ ենք փնտրում հյուրերի համար: Դա ծանր, բայց շատ հաճելի պարտականություն է մեզ համար, որովհետև հասկանում ենք, որ կարողացել ենք վերադարձնել Գյումրու մշակութային կյանքի երանելի ժամանակները, երբ այստեղ գալիս էին ներկայացում դիտելու, Մինասի նկարները նայելու, երաժշտություն լսելու համար»,-ասաց թատրոնի տնօրենը: 

Տիգրան Վիրաբյանի խոսքով` ներկայացումը Գյումրուց դուրս բերելու նպատակ ունեն: Որոշմանը նպաստել է հանդիսատեսի արձագանքը մայրաքաղաքից և սփյուռքից: Նա նշեց, որ հարյուրավոր նամակներ են ստացել ներկայացումը Երևան բերելու խնդրանքով, ապա տեղեկացրեց, որ հուլիսի 14-ին ներկայացումը կխաղան Երևանի Գաբրիել Սունդուկյանի անվան ագզային ակադեմիական թատրոնում:

«Սեպտեմբերին ներկայացումը 7 օրով կլինի Արցախում, քննարկվում ենք նաև այն նաև երկրից դուրս տանելու հարցը:Այն անհանգստությունը, որ այդ օրերին կար Հայաստանում, կար նաև Սփյուռքում: Մեր Սփյուռքի հանդիսատեսի համար էլ ներկայացումը հետաքրիր ու սպասված կլինի,- ասաց նա և ավելացրեց, որ ներկայացումը պարբերաբար փոփոխությունների են ենթարկում` հաշվի առնելով լսարանի օբյեկտիվ կարծիքները։ –Որքան դժվար է բեմարդել այնպիսի պատմություն, որը կատարվել է մեր օրերում, այնքան էլ հեշտ է, որովհետև խորհուրդ տվողները շատ են: Փորձերի ընթացքում հյուրընկալել ենք և՛ Արկադի Տեր-Թադևոսյանին` Կոմանդոսին, որն այդ ժամանակահատվածում մեծ աշխատանք էր անում, և՛ այլ մարդկանց, որոնց կարծիքները լսել ենք: Ներկայացման համար երաժշտությունը գրելիս Հայկոն ներկա էր լինում բոլոր փորձերին։ Արդյունքում ստացվեց այնպիսի երաժշտություն, առանց որի ներկայացումը չեմ պատկերացնում: Երբ  մաեստրո Տիգրան Մանսուրյանը դիտեց առաջին փորձը, արցունքոտ աչքերով ասաց՝ խնդրում եմ զանգահարիր Հայկին, բան ունեմ ասելու: Զանգեցի Հայկոյին, մաեստորն ասաց՝ շնորհավորում եմ քեզ, տղաս, դու ֆանտաստիկ երաժշտություն ես գրել այս ներկայացման համար»:  

Տիգրանը նկատեց, որ ներկայացման երաժշտության հիման վրա նկարահանված տեսահոլովակը նույնքան մեծ հաջողություն ունեցավ, որքան ներկայացումը։ ««Հարսանիք թիկունքում» տեսահոլովակի ռեժիսորը Հրաչ Քեշիշյանն է, որը նույնպես մեր թատրոնի լավ բարեկամն է: Մեր ներկայացման շուրջ փորձել ենք հավաքել հանրապետության լավագույն մասնագետներին և այդ ներկայացումն այդպիսի կազմով ուղղակի դատապարտված էր հաջողության»,-եզրափակեց նա: