Իրինա Հարությունյան. «Ինձ խոչընդոտում են վերադառնալ Ստանիսլավսկու անվան թատրոն»

15:46 • 19.06.18

Շոուբիզնես

ՀՀ վաստակավոր արտիստ, դերասանուհի Իրինա Հարությունյանը սեփական դիմումի համաձայն 5 տարի առաջ լքեց Կոնստանտին Ստանսիլավսկու անվան ռուսական դրամատիկական թատրոնը: Այսօր դերասանուհին ցանկանում է վերադառնալ թատրոն, սակայն, ինչպես ինքն է ասում, իրեն խոչընդոտում են:

Tert.am Life-ի հետ զրույցում Իրինան նշեց, որ թատրոնի ղեկավարությունը իր վերադարձը մերժելու մի քանի պատճառ է առաջ քաշել: Դրանցից մեկն այն է, որ թատրոնն առայժմ գեղարվեստական ղեկավար չունի:

«Գուցե, ես ավելի վաղ վերադառնայի թատրոն, բայց ընտանեկան հարցերով՝ երեխաներիս խնամքով էի զբաղված: Վերադառնալու մասին որոշում կայացրել եմ ավելի վաղ, բայց դիմեցի այս տարվա մարտին, սակայն իմ վերադարձին փորձեցին խոչընդոտել: Ինձ ասացին, եթե թատրոնի գեղարվեստական նոր ղեկավարը կարիք ունենա քեզ նման դերասանի, կարող ես վերադառնալ։ Ամենամեծ պատճառաբանությունն այն էր, որ թատրոնում դերասանի հաստիք չկա: ՀՀ վաստակավոր արտիստը, որը երկար տարիներ ծառայել է այդ թատրոնին, հնարավոր չէ հաստիք չունենա: Ես համոզված ասում եմ, որ հունվարին թատրոն են ընդունել երկու նորաթուխ դերասանուհու, որոնք դեռ Թատերական ինստիտուտի ուսանողներ էին: Երբ հարցրեցի, թե ինչո՞ւ են ռուսական թատրոն ընդունվում անփորձ դերասաններ, տնօրենն ինձ ասաց՝ նրանք ուղղակի պայմանագրային դերասաններ են: Այստեղից հետևություն, որ փորձում են ժամանակավոր կասեցնել իմ վերադարձի գործընթացը և ինձ խորհուրդ են տալիս սպասել»,-ասաց դերասանուհին:

Իրինայի խոսքով՝ իրենց զրույցի ժամանակ և՛ թատրոնի տնօրեն Ֆրեդ Դավթյանը, և՛ Նորա Գրիգորյանը (վերջինս պայքարում է թատրոնի գեղարվեստական ղեկավարի պաշտոնի համար) ասել են, որ իր վերադարձի համար ժամանակ է պետք, քանի որ ինքը սկանդալով է հեռացել թատրոնից։ Ըստ դերասանուհու՝ այդպես չի եղել. «Պարզապես, երջանկահիշատակ Երվանդ Ենգիբարյանի մահվան հետ կապված այնպիսի իրավիճակ էր ստեղծվել, որ ես էմոցիոնալ քայլի գնացի՝ արտահայտելով իմ դիրքորոշումը: Իմ և կոլեկտիվի միջև կոնֆլիկտ չկար: Եթե ես խոչընդոտեի թատրոնի աշխատանքին կամ ոչ պրոֆեսիոնալ մոտենայի իմ աշխատանքին, կհասկանայի իրենց»:

Իրինա Հարությունյանը համոզված է, որ իրեն հետ չընդունելու պատճառները անձնական բնույթի են։ Դերասանուհու կարծիքով` առաջ քաշված ոչ մի պատճառաբանություն հիմնավոր չէ:

«Եթե ես հայալեզու թատրոնի դերասանուհի լինեի, նման պատասխանից հետո կմտածեի ուրիշ թատրոն դիմելու մասին, բայց, ցավոք, ռուսական թատրոնը միակն է: Ես նոր կամ անհայտ դերասանուհի չեմ, որի մասնագիտական կարողությունների վրա կարելի է կասկածել, մտածել` արժե՞ ինձ ընդունել, թե՞ ոչ: Տնօրենի այդ քայլը անարդար եմ համարում, իսկ պատասխանը՝ ոչ բավարար: Նա անգամ չմակագրեց համապատասխան դիմումը, որ կարողանամ դիմել այլ մարմինների, օրինակ, Մշակույթի նախարարությանը իմ խնդրին լուծում տալու համար»,- ասաց դերասանուհին և ավելացրեց, որ արդեն իսկ դիմել է Մշակույթի նախարարությանը, թեև դեռ պատասխան չի ստացել, բայց մեծ հույս ունի, որ խնդիրն արդարացի լուծում կստանա:

Անդրադառնալով Ստանիսլավսկու թատրոնում ներկայումս ստեղծված իրավիճակին և թատրոնի գեղարվեստական ղեկավարի սպասվող ընտրություններին՝ Իրինա Հարությունյանը հայտնեց իր կարծիքը, որ այդ պաշտոնում պետք է նշանակվի մի մարդ, որը այժմ չի աշխատում Ստանիսլավսկու թատրոնում։

«Նորա Գրիգորյանին ճանաչում եմ շատ փոքր տարիքից` որպես Ալեքսանդր Սամսոնիչի դուստր, իսկ Ռոբերտ Հակոբյանին` որպես իմ գործընկեր, որի հետ բազմիցս բեմ եմ բարձրացել: Այսօրվա դրությամբ գտնում եմ, որ այդ պաշտոնում պետք է լինի երրորդ մարդ։ Իմ տպավորությամբ` թեկնածուների առաջադրվելու շարժառիթը ոչ թե ռուսական թատրոնը վերակենդանացնելն է, այլ աթոռակռիվ: Դա ինձ հաճելի չէ, կարծում եմ՝ հանրությանն էլ դուր չի գալիս: Ալեքսանդր Սամսոնիչին ժամանակին դրսից հրավիրեցին, ու նա հիանալի ղեկավարեց թատրոնը, հիմա էլ պետք է այդպես վարվեն: Ես գիտեմ, որ անձնակազմի մեծ մասը թեկնածուներից և ոչ մեկին կողմ չէ: Ինչո՞վ են զբաղված Մշակույթի նախարարությունը կամ Թատերական գործիչների միությունը, որ պետք է գեղարվետսական խորհուրդը ձեռք բարձրացնելով ընտրություն կատարի: Այդ պաշտոնում պետք է նշանակում կատարել, ընդ որում` փորձառու ղեկավարի»,-ասաց դերասանուհին ու հերքեց տարածված լուրերը, թե ինքը հավակնում է լինել թատրոնի գեղարվեստական ղեկավարի պաշտոնում:

Այդուհանդերձ, դերասանուհին նշեց, որ Ստանիսլավսկու թատրոնն այս պահին շատ վատ վիճակում է և հույս հայտնեց, որ նոր գեղարվետսական ղեկավարի ճիշտ ընտրությամբ հնարավոր կլինի թատրոնին նոր շնաչռություն հաղորդել:

Հեղինակ Անահիտ Հակոբյան